មាត់ថា ទេ! តែដៃលូក៖នាយកប្រតិបត្តិនៃអង្គការអភិវឌ្ឍន៍ផ្នត់គំនិត រិះគន់គណបក្សភ្លើងទៀន
ភ្នំពេញ៖ នាយកប្រតិបត្តិនៃអង្គការអភិវឌ្ឍន៍ផ្នត់គំនិតបានធ្វើការរិះគន់ទៅលើគណបក្សភ្លើងទៀនដែលបង្ហាញពីភាពមិនច្បាស់លាស់របស់ខ្លួនពាក់ព័ន្ធនឹងការប្រកាសបដិសេធមិនទទួលស្គាល់ការបោះឆ្នោតតែទទួលអាសនៈនៃការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ ឆ្នាំ២០២២ និងមិនបានឆ្លុះបញ្ចាំងពីឆន្ទៈ រួមរបស់គណបក្សភ្លើងទៀន ដោយសារថ្នាក់ដឹកនាំគណបក្សមួយនេះហាក់បីដូចជានៅស្តាយអាសនៈដែលទទួលបាន។
លោកបណ្ឌិត សេក សុជាតិ នាយកប្រតិបត្តិនៃអង្គការអភិវឌ្ឍន៍ផ្នត់គំនិតបានមានប្រសាសន៍ប្រាប់ AMS នៅល្ងាចថ្ងៃទី0៩ ខែមិថុនានេះថា គណបក្សភ្លើងទៀនបានប្រកាសមិនទទួលស្គាល់លទ្ធផលបោះឆ្នោត តែទទួលយកអាសនៈក្រុមប្រឹក្សាឃុំ សង្កាត់ ដែលខ្លួនទទួលបាន។ នេះ គឺមិនបានឆ្លុះបញ្ចាំងពីឆន្ទៈរួមរបស់គណបក្សភ្លើងទៀនដោយសារថ្នាក់ដឹកនាំគណបក្សមួយនេះហាក់បីដូចជានៅស្តាយអាសនៈដែលទទួលបានជាងពីរពាន់អាសនៈ ដែលទទួលបានពីការបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៥ ដែលបានប្រព្រឹត្តទៅកាលពីថ្ងៃទី០៥ ខែ មិថុនា ឆ្នាំ២០២២។ លោកបន្តថា ក៏ប៉ុន្តែយើងឃើញថា គណបក្សភ្លើងទៀន គឺចង់បានមែនទែនចំពោះអាសនៈដែលខ្លួនទទួលបាន ប៉ុន្តែបែរជាបដិសេធចំពោះការប្រកាសលទ្ធផលដែលបង្ហាញឱ្យឃើញថា ខ្លួនមិនពេញចិត្តចំពោះការ បោះឆ្នោត តែហាក់បីដូចជាបញ្ច្រាស់នៅអ្វីដែលជាគោលការណ៍របស់គណបក្សនយោបាយនីមួយៗ។ លោកបណ្ឌិត សេក សុជាតិ យល់ឃើញថា ការបដិសេធលទ្ធផលបោះឆ្នោត តែទទួលយកអាសនៈនេះ គឺបង្ហាញពីភាពមិនច្បាស់លាស់របស់គណបក្សភ្លើងទៀន នៅក្នុងការរៀបចំការបោះឆ្នោតនេះ។
ដោយឡែក អ្នកនាំពាក្យគណ:កម្មាធិការជាតិរៀបចំការបោះឆ្នោត ឯកឧត្តម សោម សូរីដា បានមានប្រសាសន៍ប្រាប់ AMS កាលពីល្ងាចថ្ងៃទី០៦ ខែមិថុនានេះថា គណបក្សនយោបាយចំនួនបួនដែលនាំមុខគេក្នុងការទទួលការ គាំទ្រពីប្រជាពលរដ្ឋក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២ គឺ១. គណបក្សប្រជាជនកម្ពុជា ទទួលបានសំឡេង ៥,៣៣៧,៧៥៤ សំឡេង គិតជាភាគរយស្មើ ៧៤,៣២ភាគរយ។ ២. គណបក្សភ្លើងទៀនទទួលបាន ១,៦១០,៤៣៤សំឡេងស្មើ ២២,២៦ភាគរយ ។ ៣. គណបក្សហ្វ៊ុនស៊ិនប៉ិច ទទួលបាន ៩១,៧៩៣សំឡេងស្មើ ១ ,២៧ភាគរយ និងគណបក្សខ្មែររួបរួមជាតិ ទទួលបាន៦៣,៩៤៧សំឡេងស្មើ ០,៨៨ភាគរយ។ ចំណែកគណបក្សខ្មែរស្រឡាញ់ជាតិ ទទួលបាន ៣៣,៣០៥សំឡេងស្មើ ០,៥២ភាគរយ។
ឯកឧត្តម សោម សូរីដា បានបញ្ជាក់ថា ប្រជាពលរដ្ឋដែលបានអញ្ជើញទៅបោះឆ្នោតមានចំនួន ៧,៣៨២,៤៤៩នាក់ស្មើនឹង៨០,១៩ភាគរយនៃចំនួនអ្នកមានឈ្មោះក្នុងបញ្ជីបោះឆ្នោតសរុប៩,២០៥,៦៨១នាក់ ។ ចំណែកឯសន្លឹកឆ្នោតបានការមានចំនួន ៧,២៣៦,២៤៤សន្លឹក,សន្លឹកឆ្នោតមិនបានការមានចំនួន ១៤៦,២០៥សន្លឹក ស្មើនឹង ១,៩ភាគរយសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២នេះ។
សូមជម្រាបថា ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ បានប្រព្រឹត្តទៅកាលពីថ្ងៃទី៥ ខែមិថុនា ឆ្នាំ២០២២ ដោយមានគណបក្សនយោបាយចំនួន ១៧ចូលរួមប្រកូតប្រជែង៕
ដោយ៖ពលជ័យ