មនុស្សរាប់ម៉ឺននាក់ប្រមូលផ្តុំគ្នាប្រឆាំងអំពើហិង្សាកាំភ្លើងនៅទីក្រុងវ៉ាស៊ីនតោន និងទូទាំងសហរដ្ឋអាមេរិក
វ៉ាស៊ីនតោន៖ បាតុកររាប់ម៉ឺននាក់ប្រមូលផ្ដុំគ្នានៅទីក្រុងវ៉ាស៊ីនតោន និងកន្លែងផ្សេងៗទៀតទូទាំងសហរដ្ឋអាមេរិកកាលពីថ្ងៃសៅរ៍ ដើម្បីទាមទារឱ្យសមាជិកសភាអនុម័តច្បាប់ទប់ស្កាត់អំពើហិង្សាដោយកាំភ្លើង បន្ទាប់ពីការសម្លាប់រង្គាលកាលពីខែមុននៅសាលាបឋមសិក្សាមួយក្នុងរដ្ឋតិចសាស់។
ការប្រមូលផ្ដុំដែលរៀបចំឡើងដោយក្រុមអ្នកប្រមូលផ្ដុំដើម្បីជីវិតយើង (MFOL) មានការចូលរួមពីមនុស្សប្រមាណ ៤០ ០០០ នាក់នៅក្រុងវ៉ាស៊ីនតោន ខណៈការតវ៉ាទូទាំងប្រទេសមានចំនួន ៤៥០ កន្លែងខុសៗគ្នា។ ក្រុម (MFOL) ជាក្រុមប្រមូលផ្ដុំ ដែលបង្កើតឡើងដោយសិស្សសាលារួចផុតពីការសម្លាប់រង្គាលនៅវិទ្យាល័យ Marjory Stoneman Douglas ក្នុងរដ្ឋផ្លរីដា នៅឆ្នាំ ២០១៨។
បាតុកម្មទូទាំងប្រទេសកាលពីថ្ងៃសៅរ៍ ធ្វើឡើងប៉ុន្មាន៣សប្ដាហ៍បន្ទាប់ពីខ្មាន់កាំភ្លើងបើកការបាញ់សម្លាប់រង្គាលក្នុងសាលាបឋមសិក្សាមួយកន្លែងនៅក្រុង Uvalde រដ្ឋតិចសាស់ ដោយសម្លាប់ក្មេងចំនួន ១៩ នាក់ និងគ្រូបង្រៀន២នាក់ ដែលការបាញ់ប្រហារនេះ ធ្វើឡើងតែ ១០ ថ្ងៃប៉ុណ្ណេះ បន្ទាប់ពីការបាញ់សម្លាប់មនុស្ស ១០ នាក់នៅក្រុង Buffalo ក្នុងរដ្ឋញូវយ៉ក។
អភិបាលក្រុងវ៉ាស៊ីនតោនឌីស៊ី អ្នកស្រី Muriel Bowser ទាក់ទាញការអបអរសាទរយ៉ាងខ្លាំងពីហ្វូងមនុស្សនៅទីនោះ ពេលអ្នកស្រីអំពាវនាវឱ្យមានច្បាប់ស្ដីពីការគ្រប់គ្រងកាំភ្លើងរួម។ អ្នកស្រីនិយាយថា៖ «យើងមិនចាំបាច់រស់នៅបែបនេះទេ» ហើយបន្ថែមថា ប្រជាជនក្នុងប្រទេសផ្សេងទៀតក៏មិនរស់នៅបែបនេះដែរ។
ការបាញ់ប្រហារប៉ុន្មានចុងក្រោយ បានបន្ថែមភាពបន្ទាន់ថ្មីដល់ការជជែកដេញដោលរបស់ប្រទេស ជុំវិញអំពើហិង្សាដោយកាំភ្លើង ទោះបីជាការរំពឹងទុកសម្រាប់ច្បាប់ស្តីពីការគ្រប់គ្រងរបស់សហព័ន្ធនៅតែមិនប្រាកដប្រជា ដោយសារការប្រឆាំងយ៉ាងម៉ឺងម៉ាត់របស់គណបក្សសាធារណរដ្ឋចំពោះការកំណត់ណាមួយលើអាវុធក្ដី។
ប៉ុន្មានសប្តាហ៍ថ្មីៗនេះ ក្រុមអ្នកចរចាព្រឹទ្ធសភាទ្វេភាគីមួយក្រុមបានប្តេជ្ញាថានឹងសម្រេចលើកិច្ចព្រមព្រៀងមួយទោះបីពួកគេមិនទាន់ឈានដល់កិច្ចព្រមព្រៀងក្ដី។ កិច្ចខិតខំប្រឹងប្រែងរបស់ពួកគេគឺផ្តោតលើការផ្លាស់ប្តូរតិចតួច ដូចជាការលើកទឹកចិត្តរដ្ឋនានាឱ្យអនុម័តច្បាប់ «Red Flag» ដែលអនុញ្ញាតឱ្យអាជ្ញាធររក្សាទុកកាំភ្លើងពីបុគ្គលដែលចាត់ទុកថាមានគ្រោះថ្នាក់។
ប្រធានាធិបតីសហរដ្ឋអាមេរិកលោក ចូ បៃដិន Joe Biden ដែលបានបង្ហាញពីការគាំទ្រចំពោះបាតុកម្មកាលពីថ្ងៃសៅរ៍ កាលពីដើមខែនេះ បានជំរុញឱ្យសភាហាមឃាត់អាវុធវាយប្រហារ ពង្រីកការត្រួតពិនិត្យសាវតានៃអ្នកកាន់កាំភ្លើង និងអនុវត្តវិធានការផ្សេងៗទៀត។
ក្នុងឆ្នាំ ២០២០ កាំភ្លើងបានក្លាយជាមូលហេតុនាំមុខគេនៃការស្លាប់ក្នុងចំណោមមនុស្សអាយុចន្លោះពី ១ ឆ្នាំដល់ ១៩ ឆ្នាំនៅសហរដ្ឋអាមេរិក ច្រើនជាងគ្រោះថ្នាក់ចរាចរណ៍ ការប្រើគ្រឿងញៀលជ្រុល ឬជំងឺមហារីក។ យោងតាមអ្នកផ្ដល់ទិន្នន័យស្ដីពីអំពើហិង្សាកាំភ្លើង Gun Violence Archive គិតត្រឹមតែឆ្នាំ ២០២២ នេះតែឯង ការបាញ់ប្រហារទ្រង់ទ្រាយធំនៅសហរដ្ឋអាមេរិក បានកើតឡើងចំនួន ២៥៤ ករណី និងជារួមសម្លាប់មនុស្សជាង ១៩ ៣០០ នាក់។
ប្រភព៖ Reuters
