ភ្នំពេញ៖ តុលាការទីក្រុងប៉ារីស ប្រទេសបារាំងគ្រោង នឹងបើកសវនាការលើសំណុំរឿងសម្តេចតេជោ ហ៊ុន សែន និងលោក ឌី វិជ្ជា ប្តឹងទណ្ឌិត សម រង្ស៊ី ពីបទបរិហារកេរ្តិ៍ នៅថ្ងៃទី០១ ខែកញ្ញា ឆ្នាំ២០២២ខាងមុខនេះ។ ខណៈដែលការបើកសវនាការឈានចូលជិតមកដល់ក្រុមមេធាវីជនជាតិបារាំងចំនួន៤រូប ដែលជាមេធាវីតំណាងរបស់សម្តេចតេជោ ហ៊ុន សែន និងលោក ឌី វិជ្ជា ជាដើមបណ្តឹងប្តឹងទណ្ឌិត សម រង្ស៊ី ពីបទបរិហារកេរ្តិ៍ នៅតុលាការទីក្រុងប៉ារីស ប្រទេសបារាំង បានជួបពិភាក្សាជាមួយសម្តេចតេជោនៅភូមិគ្រឹះរបស់សម្តេច នាទីក្រុងតាខ្មៅ។

នៅក្នុងជំនួបពិសេសនេះសម្តេចតេជោ ហ៊ុន សែន បានធ្វើការគូសបញ្ជាក់អំពីអង្គហេតុពិត ចំណុចសំខាន់ៗ និងអំពើទុច្ចរិតរបស់ទណ្ឌិត សម រង្ស៊ី ដល់ក្រុមមេធាវីការពារបណ្តឹងរបស់សម្តេច និងមូលហេតុដែលនាំឱ្យមានការតាមប្តឹងទណ្ឌិត សម រង្ស៊ី ដល់ប្រទេសបារាំង។ នេះបើយោងតាមសារព័ត៌មាន freshnews។

ប្រភពដដែលបានបន្តថា ក្រុមមេធាវីបារាំង ក៏បានពិនិត្យ និងប្រមូលភស្តុតាងសំខាន់ៗ ដែលមានភាពច្បាស់លាស់ជាមូលដ្ឋានរឹងមាំ សម្រាប់ដាក់បន្ទុកលើទណ្ឌិត សម រង្ស៊ី ក្នុងពេលសវនាការ ដែលគ្រោងធ្វើនៅថ្ងៃទី១ ខែកញ្ញា ឆ្នាំ២០២២ខាងមុខនេះ។

សូមរម្លឹកថា បណ្តឹងរបស់សម្តេចតេជោ ហ៊ុន សែន និងបណ្តឹងរបស់លោក ឌី វិជ្ជា ប្តឹងទណ្ឌិតសម រង្ស៉ី បានដាក់ចូលតុលាការទីក្រុងប៉ារីស ប្រទេសបារាំង កាលពីថ្ងៃទី២០ ខែសីហា ឆ្នាំ២០១៩ និងត្រូវបានចៅក្រមស៊ើបសួរសម្រេចធ្វើការចោទប្រកាន់លើទណ្ឌិត សម រង្ស៊ី ពីបទបរិហាកេរ្តិ៍ជាសាធារណ:ប្រឆាំងបុគ្គល នៅថ្ងៃទី០៨ ខែមិថុនា ឆ្នាំ២០២០។

សម្តេចតេជោ ហ៊ុន សែន សម្រេចប្តឹងទណ្ឌិត សម រង្ស៊ី ចំពោះសារដែលបុគ្គលនេះ បានដាក់ផ្សាយនៅក្នុង ទំព័រហ្វេសប៊ុករបស់ខ្លួន និងសំដីដែលបុគ្គលនេះបាននិយាយ នៅក្នុងកិច្ចសម្ភាសន៍ជាមួយវិទ្យុសំឡេងសហរដ្ឋអាមេរិក ជាភាសាខ្មែរ (VOA) ដែលនៅក្នុងនោះបុគ្គល សម រង្ស៊ី បានធ្វើការចោទប្រកាន់យ៉ាងឆ្កួតលីលា និងធ្ងន់ធ្ងរចំពោះ សម្តេចតេជោ ហ៊ុន សែន។ ទណ្ឌិតសម រង្ស៊ី បានអះអាងដោយមួលបង្កាច់ថា៖ (១) សម្តេចតេជោ បានសម្លាប់ ឬជាមេក្លោងឱ្យគេសម្លាប់លោក ហុក ឡងឌី (២) សម្តេចតេជោ បានបញ្ជាឱ្យសម្លាប់លោកជា វិជ្ជា និងចុងក្រោយ (៣) សម្តេចតេជោ បានភូតកុហកអំពីមូលហេតុនៃការស្លាប់របស់លោក ហុក ឡងឌី ដោយកុហកថា ឧទ្ធម្ភាគចក្រដែលលោក ហុក ឡងឌី រងគ្រោះទទួលមរណភាព គឺត្រូវរន្ទៈបាញ់ ក្នុងខណៈដែលបុគ្គល សម រង្ស៊ី អះអាងថា ឧទ្ធម្ភាគចក្រនេះត្រូវបានផ្ទុះដោយគ្រាប់បែក ដែលបានដាក់បង្កប់នៅក្នុងនោះទៅវិញ។ ទាំងនេះជាការចោទប្រកាន់ បែបបរិហារកេរ្តិ៍ ដែលត្រូវបានផ្សព្វផ្សាយនៅក្នុងទំព័រហ្វេសប៊ុករបស់បុគ្គល សម រង្ស៊ី។ តាមឆន្ទៈមនសិការ បុគ្គលិកលក្ខណៈផ្ទាល់ និងនយោបាយរបស់សម្តេចតេជោ ដែលតែងតែអត់ឱននិងអនុគ្រោះ សណ្តោសប្រណីចំពោះជនរួមជាតិរបស់សម្តេច, សម្តេចតេជោ គឺមិនចង់ប្តឹងបុគ្គល សម រង្ស៊ី នោះទេ ប៉ុន្តែការចោទប្រកាន់ខាងលើនេះ គឺមិនអាចអត់ឱនឱ្យបានជាដាច់ខាត និងជាមូលហេតុដែលនាំឲ្យសម្តេចតេជោ បានសម្រេចចិត្តប្តឹងបុគ្គលម្នាក់ ដែលជាជនរួមជាតិរបស់សម្តេច។ តុលាការបារាំង នឹងត្រូវធ្វើការវិនិឆ្ឆ័យថា «ករណីនេះ គឺជាការរំលោភបំពាន លើដែននៃសេរីភាពបញ្ចេញមតិ»៕
ដោយ៖ពលជ័យ
រូបភាព៖ Freshnews