មនុស្សរាប់ពាន់នាក់ តវ៉ាប្រឆាំងនឹងជនជាតិរវ៉ាន់ដាពេញទីក្រុងហ្គោម៉ាក្នុងប្រទេសកុងហ្កោ
ក្រុមអ្នកតវ៉ាប្រឆាំងជនជាតិរវ៉ាន់ដា បានបង្កចលាចលពាសពេញទីក្រុងហ្គោម៉ាភាគខាងកើតប្រទេសកុងហ្កោ ដោយមានការចុះរុះរើហាងនានា និងឆែកឆេររថយន្ត ដែលពួកគេសង្ស័យថា ដឹកជញ្ជូនជនជាតិរវ៉ាន់ដា។
មនុស្សរាប់ពាន់នាក់ បានដើរតាមដងផ្លូវ ដើម្បីតវ៉ាប្រឆាំងនឹងប្រទេសរវ៉ាន់ដានៅព្រឹកមួយថ្ងៃបន្ទាប់ពី រដ្ឋាភិបាលកុងហ្គោ អះអាងជាថ្មី ថា ប្រទេសនេះ គាំទ្រក្រុមឧទ្ទាម M23។
ក្រុមបាតុករ ដែលខ្លះបានដោះអាវខ្លួនទទេ បានប្រញាប់ប្រញាល់ធ្វើដំណើរទៅកាន់ព្រំដែនប្រទេស រវ៉ាន់ដា ដោយស្រែកពាក្យស្លោកប្រឆាំង នឹងប្រធានាធិបតីរវ៉ាន់ដាគឺ លោក Paul Kagame ។
ប៉ូលីសខាងកុប្បកម្ម បានបាញ់ឧស្ម័នបង្ហូរទឹកភ្នែក ដើម្បីបំបែកហ្វូងមនុស្ស។ នេះបើយោងតាមអ្នកយកព័ត៌មាន AFP ដែលបាននិយាយថា យ៉ាងហោចណាស់ អ្នកតវ៉ាម្នាក់ បានរងរបួស។
នៅថ្ងៃក្រោយមក ក្រុមអ្នកតវ៉ា បានចូលប្លន់ហាងក្នុងសង្កាត់ពាណិជ្ជកម្មក្នុងទីក្រុងហ្គោម៉ា។ អ្នកខ្លះ ក៏បានឈប់ និងឆែកឆេររថយន្តដឹកប្រជាជនរវ៉ាន់ដា ដែលភាគច្រើនទំនងជារត់គេចឆ្លងព្រំដែនក្នុងអំឡុងពេលមានភាពចលាចល។
កងទ័ពរវ៉ាន់ដាម្នាក់ ដែលជាបាតុករម្នាក់ប្រាប់សារព័ត៌មាន AFP ថា៖ «យើង កំពុងអំពាវនាវឱ្យរដ្ឋាភិបាលផ្តល់ឯកសណ្ឋាន និងអាវុធ ដើម្បីឱ្យយើងអាចប្រយុទ្ធបាន»។
ការប៉ះទង្គិចគ្នារវាងសាធារណរដ្ឋប្រជាធិបតេយ្យកុងហ្គោ និងប្រទេសជិតខាងភាគខាងកើតរបស់ខ្លួន បានកើនឡើងជាមួយក្រុមឧទ្ទាម M23ក្នុងរយៈពេលប៉ុន្មានសប្តាហ៍កន្លងទៅ។
កងជីវពល Tutsi ជាកងកម្លាំងចម្បងរបស់កុងហ្គោ ដែលជាក្រុមប្រដាប់អាវុធមួយក្រុមនៅភាគខាងកើតប្រទេសនេះ ធ្លាប់ត្រូវបានគេបណ្ដេញចេញពីប្រទេសបន្ទាប់ពីការវាយលុករួមគ្នា ដោយកងទ័ពអង្គការសហប្រជាជាតិ និងកងទ័ពកុងហ្គោ។ ថ្មីៗនេះ កងជីវពលនេះ បានត្រលប់មកវិញ និងបានប៉ះទង្គិចគ្នាជាញឹកញាប់ជាមួយកងទ័ពកុងហ្គោក្នុងអំពើហឹង្សា ដែលបានធ្វើឱ្យមានភាពតានតឹងនៅអាហ្វ្រិកកណ្តាល។
ប្រភព៖ France24
