ពិព័រណ៍ការងារនឹងរៀបចំឡើងចាប់ពីថ្ងៃទី២៣-២៤ ខែមិថុនា នៅទីតាំង អគារ Kampus ជិតស្ពានអាកាសក្បាលថ្នល់
ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈនឹងរៀបចំ ព្រឹត្តិការណ៍ពិព័រណ៍ការងារ២ថ្ងៃពោលគឺចាប់ពីថ្ងៃទី២៣-២៤ ខែមិថុនា ឆ្នាំ២០២២ នៅទីតាំងអគារ Kampus ជិតស្ពានអាកាសក្បាលថ្នល់ សង្កាត់ទន្លេបាសាក់ ខណ្ឌចំការមន។
ក្រសួងការងារបានបញ្ជាក់ដល់ក្រសួង ស្ថាប័ន និយោជក អ្នកផ្តល់ ការអប់រំ បណ្ដុះបណ្តាល អ្នកស្វែងរកការងារ សិស្ស-និសិ្សត និង សាធារណជនឱ្យជ្រាបថា ទីភ្នាក់ងារជាតិមុខរបរ និង ការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ ក្រោមកិច្ចសហការជាមួយ សហភាពសហព័ន្ធយុវជនកម្ពុជា (UYFC) រាជធានីភ្នំពេញ និងឧបត្ថម្ភ គាំទ្រដោយអង្គការអន្តរជាតិខាងការងារ (ILO) នឹងរៀបចំកម្មវិធី «ពិព័រណ៍ការងារ ” ដែលនឹងប្រព្រឹត្តទៅរយៈពេលពីរថ្ងៃ គឺចាប់ពី ថ្ងៃទី២៣-២៤ ខែមិថុនា ឆ្នាំ២០២២ វេលាម៉ោង ៨ព្រឹក ដល់ម៉ោង ១៧ ល្ងាច នៅទីតាំងអគារ Kampus ជិតស្ពានអាកាសក្បាលថ្នល់ ។
ក្រសួងបានបន្តឱ្យដឹងថា កម្មវិធីពិព័រណ៍ការងារនេះ ត្រូវបានរៀបចំ ឡើងជាវេទិកាជួបជុំគ្នាដោយងាយស្រួលនៅមួយកន្លែងរវាងនិយោជក អ្នកផ្តល់ការអប់រំបណ្ដុះបណ្ដាល និងអ្នកស្វែងរកការងារ ដើម្បី ផ្សព្វផ្សាយ ព័ត៌មានឱកាសការងារ ជ្រើសរើសកម្លាំងពលកម្ម ដាក់ពាក្យស្នើសុំការងារ និងព័ត៌មានស្តីពីការបណ្តុះបណ្តាលជំនាញ ព្រមទាំងសិក្ខាសាលាចែករំលែកបទពិសោធន៍ ការ ប្រឹក្សាយោលបល់ការងារ អាជីព និងត្រៀមខ្លួនចូលការងារ ដោយវាគ្មិនដែលមានបទពិសោធន៍ជ្រាលជ្រៅក្នុងទីផ្សារការងារ។
ក្នុងព្រឹត្តិការណ៍ពិព័រណ៍ការងារនេះ នឹងមានក្រុមហ៊ុនធំៗចំនួន ២២ ចូលរួមតាំងបង្ហាញអំពីតម្រូវការជ្រើសរើសកម្លាំង ពលកម្មប្រមាណ ៣,២០០កន្លែង ហើយសង្ឃឹមថា នឹងទាក់ទាញអ្នកចូលរួម និងដាក់ ពាក្យ រកការងារដែលជាយុវជន និងកម្លាំងពលកម្មវ័យក្មេង រាប់ពាន់នាក់៕
ដោយ៖ម៉ាដេប៉ូ