ក្រុមម្ចាស់ផ្ទះបឹងត្របែក នឹងម្ចាស់ផ្ទះច្បារអំពៅ បានបរាជ័យដូចគ្នា  ក្នុងសប្តាហ៍ទី១៥ នៃពានរង្វាន់ជើងឯកវិទ្យាល័យ លើកទី១ ឆ្នាំ២០១៩ ។ ដោយម្ចាស់ផ្ទះបឹងត្របែក ចាញ់ វិទ្យាល័យឥន្ទ្រទេវី ក្នុងលទ្ធផល ០ទល់នឹង៦ ចំណែក ម្ចាស់ផ្ទះច្បារអំពៅ ចាញ់ វិទ្យាល័យព្រះស៊ីសុវត្ថិ ២ទល់នឹង៦ ។
ឆ្លងកាត់១៣ប្រកួត  វិទ្យាល័យឥន្ទ្រទេវី  មាន៣៧ពិន្ទុ ឈ្នះ១២ប្រកួត ស្មើរ១ប្រកួត រក្សាចំណាត់ថ្នាក់លេខ២ ក្នុងតារាងបណ្តោះអាសន្ន លេខ១ក្រុមវិទ្យាល័យឬស្សីកែវ ឆ្លងកាត់១៣ប្រកួត មាន៣៩ពិន្ទុ ឈ្នះ១២ ស្មើរ១ លេខ៣ សាលារៀនវេស្ទឡាញ៍ មាន២៧ពិន្ទុ ស្របពេលដែលវិទ្យាល័យ ហ៊ុន សែន ចាក់អង្រែ បន្តឈរបាតតារាងដោយ១៣ប្រកួត ចាញ់ទាំងអស់ ។
គួររំលឹកថា ការប្រកួតពានរង្វាន់បាល់ទាត់ជើងឯកវិទ្យាល័យ លើកទី១ បង្កើតឡើងក្រោមគំនិត ផ្តួចផ្តើមរបស់សហព័ន្ធយុវជនកម្ពុជារាជធានីភ្នំពេញ និងសមាគមក្លឹបបាល់ទាត់បឹងកេត ក្នុងគោលបំណងរួមចំណែកលើកកម្ពស់វិស័យកីឡាបាល់ទាត់ នៅព្រះរាជាណាចក្រកម្ពុជា ឲ្យកាន់តែមានសកម្មភាពផុសផុល និងរីកចំរើនកាន់តែប្រសើរខ្លាំងក្លាបន្ថែមទៀត សំដៅបណ្ដុះស្មារតីស្រឡាញ់កីឡាសុខភាពជៀសឆ្ងាយ ពីគ្រឿងញៀន សម្រិតសម្រាំងធនធានកីឡាករបន្តវេន ព្រមទាំងរឹតចំណងមិត្តភាពសាមគ្គីភាព និងកិច្ចសហប្រតិបត្តិការ ក្នុងចំណោមសិស្សានុសិស្សតាមវិទ្យាល័យនានា ទាំងគ្រឹះស្ថានអប់រំ ចំណេះទូទៅរដ្ឋ និងឯកជន  ។
សូមបញ្ជាក់ថា ការប្រកួតបាល់ទាត់ជ្រើសរើសជើងឯកវិទ្យាល័យ លើកទី១ ឆ្នាំ២០១៩ ទទួល បានការឧបត្ថម្ភធំពីក្រុមហ៊ុន Cambodia Airways និងក្រុមហ៊ុនភេសជ្ជៈ POCARI SWEAT និងមានសហការផ្សាយផ្ទាល់ពីអគ្គនាយកដ្ឋានវិទ្យុ និងទូរទស្សន៍អប្សរា ៕