ភ្នំពេញ ៖ បុរសពីរនាក់ស្រវឹងស្រាជោគ បើករថយន្តtoyota prius មួយគ្រឿង ជ្រុលទៅបុកម៉ូតូមួយគ្រឿងទៀតដែលជិះដោយនារីពីរនាក់ដើរលក់ម្ជូរពេលយប់ពេញទំហឹង បណ្ដាលឲ្យនារីម្នាក់របួសខ្ទេចជើងមួយចំហៀង បង្កការភ្ញាក់ផ្អើលកាលពីវេលាម៉ោង ២ រំលងអាធ្រាតឈានចូលថ្ងៃទី២៥ ខែមិថុនា ឆ្នាំ២០២២ នៅចំណុចមុខមន្ទីពេទ្យសែនសុខ តាមបណ្តោយផ្លូវ ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

យោហតាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញនារីពីរនាក់ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៩ ពណ៌ខ្មៅ ពាក់ផ្លាកលេខភ្នំពេញ1HI-7684 ដឹកម្ជូរដើរលក់តាមហាងពេលយប់ ដោយធ្វើដំណើរទិសដៅពីកើតទៅលិច លុះមកដល់ចំណុចកើតហេតុខាងលើក៍មានរថយន្តម៉ាកtoyota prius មួយគ្រឿងពណ៌ទឹកប្រាក់ ពាក់ផ្លាកលេខភ្នំពេញ2AZ-5220 បើកបរដោយបុរសម្នាក់រួមដំណើរនឹងបុរសម្នាក់ទៀតក្នុងស្ថានភាពស្រវឹងស្រាធ្វើដំណើរបញ្ច្រាសទិសដៅគ្នាពីលិចទៅកើត និងបានរេចង្កូតទៅបុកម៉ូតូពេញទំហឹងបណ្ដាលឲ្យនារីម្នាក់រងរបួសខ្ទេចជើងខាងឆ្វេងមួយចំហៀង និងម្នាក់ទៀតរងរបួសស្រាល។ ភ្លាមៗនោះរថយន្តបង្កមិនបានឈប់ទទួលខុសត្រូវនោះទេ ដោយបានព្យាយាម បើករត់រហូតមកដល់ចំណុចមុខការ៉ាសសាំងមួយកន្លែង តាមបណ្តោយផ្លូវ ១៩៨៦ កែងនឹងផ្លូវ ១០០៣ ត្រូវបានបងប្អូនប្រជាពលរដ្ឋនាំគ្នាដេញឃាត់ជាប់ រួចប្រគល់ជូនសមត្ថកិច្ច។

ក្រោយកើតហេតុ សមត្ថកិច្ចបានធ្វើការឃាត់ខ្លួនអ្នកបើកបរនិងអ្នករួមដំណើរដាក់ក្នុងរថយន្តបញ្ជូនទៅអធិការដ្ឋានខណ្ឌសែនសុខដើម្បីធ្វើការសួរនាំ ចំណែករថយន្តនិងម៉ូតូសមត្ថកិច្ចជំនាញធ្វើការវាស់វែងយកទៅរក្សាទុករង់ចាំធ្វើការដោះស្រាយគ្នាតាមផ្លូវច្បាប់ ៕ ដោយ ៖ ជីម ភារ៉ា