នៅចំពោះមុខមេដឹកនាំប្រទេស BRICS រួមមានលោក Xi Jinping ប្រធានាធិបតីចិន, លោក Cyril Ramaphosa ប្រធានាធិបតីអាហ្វ្រិខាងត្បូង, លោក Bolsonaro ប្រធានាធិបតីប្រេស៊ីល, លោក Putin ប្រធានាធិបតីរុស្ស៊ី និងលោក Modi នាយករដ្ឋមន្ត្រីឥណ្ឌា សម្តេចតេជោនាយករដ្ឋមន្រ្តីកម្ពុជា បានលើកឡើងថាបច្ចុប្បន្នតំបន់ និងសកលលោក បាននិងកំពុងបន្តប្រឈមកាន់តែស្រួចស្រាល់ឡើងៗ ហើយកាន់តែស្មុគស្មាញ និងមិនអាចប៉ាន់ប្រមាណដោយសារការប្រកួតប្រជែងផ្នែកភូមិសាស្ត្រនយោបាយ សង្គ្រាមយោធា ពាណិជ្ជកម្ម និងបច្ចេកវិទ្យា ការប្រែប្រួលអាកាសធាតុ ការរឹតបណ្តឹងនូវគោលនយោបាយរូបិយវត្ថុជាដើម។

“ដើម្បីស្តារឡើងវិញនូវសេដ្ឋកិច្ចសកលចេញពីវិបត្តិខាងលើ ទាមទារឱ្យមានការប្រកាន់ខ្ជាប់នូវស្មារតីបើកចំហ និងគាំទ្រប្រព័ន្ធពាណិជ្ជកម្មពហុភាគី និងពង្រឹងពហុភាគីនិយម ជាពិសេសលើកកម្ពស់ការបើកចំហសម្រាប់ពាណិជ្ជកម្មអន្តរជាតិ និងកាត់បន្ថយរបាំងពាណិជ្ជកម្មនានា ជាពិសេសលើទំនិញយុទ្ធសាស្ត្រ ដូចជាស្បៀងអាហារ ថ្នាំពេទ្យ និងថាមពល ដើម្បីជំរុញកំណើនសេដ្ឋកិច្ចប្រកបដោយចីរភាព និងពង្រឹងភាពធន់នៃខ្សែច្រវាក់តម្លៃតំបន់ និងសកល។”