ម៉ូស្គូ ៖ ប្រធានាធិបតីរុស្ស៉ីលោក វ្ល៉ាឌីមៀ ពូទីន គ្រោងធ្វើដំណើរទៅកាន់ប្រទេសតាហ្ស៊ីគីស្ថាន និងតួកម៉េនីស្ថាននៅក្នុងសប្ដាហ៍នេះ ដែលវានឹងក្លាយជាការបំពេញទស្សនកិច្ចនៅក្រៅប្រទេសជាលើកដំបូង ចាប់តាំងពីការចាប់ផ្តើមប្រតិបត្តិការយោធាពិសេសនៅអ៊ុយក្រែនកាលពីថ្ងៃទី២៤ ខែកុម្ភៈមក ។

បើតាមការគ្រោងទុកនោះ លោក ពូទីន នឹងបំពេញទស្សនកិច្ចទៅកាន់ប្រទេសតាហ្ស៉ីគីស្ថាន និងតួកម៉េនីស្ថាន ហើយក្រោយមក លោកនឹងត្រូវជួបពិភាក្សាការងារជាមួយប្រធានាធិបតីឥណ្ឌូណេស៊ី លោក ចូកូ វីដូដូ ក្នុងទីក្រុងម៉ូស្គូ ។ នេះបើតាមលោក ប៉ាវែល ហ្សារូប៊ីន ជាអ្នកឆ្លើយឆ្លងព័ត៌មានប្រចាំវិមានក្រឹមឡាំង មកពីស្ថានីយ៍ទូរទស្សន៍ រ៉ូស៊ីយ៉ា វ័ន ។

ជាងនេះទៅទៀត លោក ពូទីន ក៏មានគម្រោងបំពេញទស្សនកិច្ចទៅកាន់ទីក្រុង ក្រូដណូ ប្រទេសបេឡារូសផងដែរ នៅថ្ងៃទី៣០ ខែមិថុនា ហើយនៅថ្ងៃទី១ ខែកក្កដា ប្រធានាធិបតីរុស្ស៉ីរូបនេះនឹងចូលរួមក្នុងវេទិកាមួយជាមួយប្រធានាធិបតីបេឡារូស លោក អាឡិចហ្សាន់ឌឺ លូកាស់ឈិនកូ ៕ ប្រភព ៖ Reuters ប្រែសម្រួល ៖ ទីណា និងបុត្រា