អេហ្ស៊ីបបង្កើនការបម្រុងទុកស្រូវសាលី ខណៈអង្គការសហប្រជាជនព្រមានគ្រោះអត់ឃ្លានកាន់តែធ្ងន់ធ្ងរដល់២៧៦លាននាក់
ប្រទេសអេហ្ស៊ីបដែលមានតម្រូវការនាំចូលស្រូវសាលីច្រើនបំផុតក្នុងពិភពលោកបានបង្កើនការបម្រុងទុកស្រូវសាលីដែលសម្រាប់ប្រើប្រាស់ដល់ទៅ៦ខែ ដោយបង្កើនពីកម្រិតបម្រុងទុកមធ្យមរយៈពេល៤ខែ ខណៈពេលដែលអង្គការសហប្រជាជាតិកំពុងបង្កើនកិច្ចខិតខំដើម្បីនាំចេញស្រូវសាលីទៅកាន់ទីផ្សារពិភពលោកឡើងវិញ។
សារព័ត៌មាន Middle East Monitor បានផ្សាយថា លោក អាលី ម៉ូសែលហី (Ali Moselhi) រដ្ឋមន្ត្រីហិរញ្ញវត្ថុប្រទេសអេហ្ស៊ីប បានលើកឡើងថា ប្រទេសនេះបានផ្តោតការទិញស្រូវសាលីដែលដាំដុះនៅក្នុងប្រទេសចាប់តាំងពីដើមរដូវកាលប្រមូលផល ដែលមានបរិមាណដល់ទៅ៣,៩លានតោន។
លោករដ្ឋមន្ត្រី និយាយថា៖«ការបម្រុងទុកស្រូវរបស់អេហ្ស៊ីបមានប្រសិទ្ធភាពសម្រាប់រយៈពេលប្រហែល១០០ថ្ងៃ ខណៈពេលដែល ការបម្រុងទុកស្ករសមានគ្រប់គ្រាន់សម្រាប់រយៈពេលដែលត៦ខែ»។
ប្រទេសអេហ្ស៊ីបជាប្រទេសនាំចូលស្រូវសាលីច្រើនបំផុត ជាមួយការប្រើប្រាស់សរុបប្រចាំឆ្នាំមានចំនួន២២,៥លានតោន។ ផលិតកម្មស្រូវសាលីសរុបរបស់ប្រទេសនេះ មានប្រមាណ១៣,៥លានតោន។
ស្រូវសាលីសកលលោកនិងការផ្គត់ផ្គង់គ្រាប់ធញ្ញជាតិបានរងផលប៉ះពាល់អវិជ្ជមានតដោយសារការឈ្លានពានរបស់រុស្ស៊ីលើប្រទេសអ៊ុយក្រែន កាលពីខែកុម្ភៈ។ ប្រទេសទាំងពីរនេះដែលកំពុងធ្វើសង្គ្រាមនេះ ស្ថិតក្នុងចំណោមប្រទេសនាំចេញស្រូវសាលីធំបំផុតទាំង៦ក្នុងពិភពលោក។
លោក លោក អង់តូនីញ៉ូ ហ្គោទែរ៉េស (Antonio Guterres) អគ្គលេខាធិការអង្គការសហប្រជាជាតិ នៅពេលថ្លែងទៅកាន់កិច្ចប្រជុំកំពូលមេដឹកនាំប្រទេសឧស្សាហកម្មលួតលាស់ G7 បានព្រមានពីវិបត្តិគ្រោះអត់ឃ្លានជាសកលដែលមិនធ្លាប់កើតមាន ដោយមានមនុស្ស២៧៦លាននាក់ប្រឈមអសន្តិសុខស្បៀង ដោយអំពាវឲ្យដំណើរការនាំចេញ និង ការបន្ធូរ បន្ថយ បំណុល។
យោងតាមកម្មវិធីស្បៀងអាហារពិភពលោក (WFP) ក្នុងរយៈពេល២ឆ្នាំកន្លងមកនេះ ចំនួនមនុស្សដែលមានអសន្តិសុខស្បៀងអាហារខ្លាំងបំផុតនៅជុំវិញពិភពលោក បានកើនឡើងទ្វេដងដល់២៧៦លាននាក់។
អគ្គលេខាធិការអង្គការសហប្រជាជនរូបនេះ បានលើកឡើងថា ស្ថានភាពឆ្នាំ២០២៣ អាចកាន់តែអាក្រក់។ ការចំណាយខ្ពស់បំផុតសម្រាប់កសិករគឺជីកសិកម្ម និង ថាមពល។ តម្លៃជីបានហក់ឡើងជាងពាក់កណ្តាលនៅក្នុងឆ្នាំមុន ហើយ តម្លៃថាមពលជាង២ភាគ៣។
លោក បានអះអាងថា មន្ត្រីរបស់អង្គការសហប្រជាជាតិ លោក Martin Griffiths ដែលជាប្រធានផ្នែកកិច្ចការមនុស្សធម៌ កំពុងបន្តពិភាក្សាដោយមានបំណងទទួលបាននូវកិច្ចព្រមព្រៀងជាកញ្ចប់ដែលនឹងធ្វើឲ្យអ៊ុយក្រែននាំចេញស្បៀងអាហារមិនត្រឹមតែតាមផ្លូវគោកនោះទេ ប៉ុន្តែតាមផ្លូវសមុទ្ទខ្មៅ និង នាំយកស្បៀងអាហារនិងជីកសិកម្មរបស់រុស្ស៊ីទៅកាន់ទីផ្សារពិភពលោកដោយគ្មានការរឹតត្បិត៕