សាំងហ្គាពួរ ៖ ប្រទេសសិង្ហបុរីបានប្រកាសពីការឆ្លងកូវីដប្រចាំថ្ងៃ ខ្ពស់បំផុតពុំធ្លាប់មាន ចាប់តាំងពីខែមីនា ២០២២មក ខណៈដែលពលរដ្ឋខ្លួន ៩២ភាគរយបានចាក់វ៉ាក់សាំងដូសមូលដ្ឋានរួច ។

ក្រសួងសុខាភិបាលសិង្ហបុរីបានឲ្យដឹងថា កាលពីថ្ងៃទី២៨ មិថុនា មានការឆ្លងកូវីដ ចំនួន ១១៥០៤ករណី ជាចំនួនឆ្លងប្រចាំថ្ងៃដ៏ខ្ពស់ពុំធ្លាប់មាន ក្នុងរយៈពេលជាង ៣ខែមកនេះ។ ក្រសួងថា ក្នុងចំណោមនេះ មាន១០៧៣២នាក់ជាការឆ្លងក្នុងសហគមន៍ ក្រៅពីនេះ គឺជាករណីនាំចូល។ បើធៀបនឹងថ្ងៃទី២៧ មិថុនា ចំនួននេះកើនឡើងជាង២ដង។

ក្នុងចំណោមប្រជាជនសិង្ហបុរីសរុប មានប្រមាណ៩២ភាគរយហើយ ដែលបានចាក់វ៉ាក់សាំងគ្រប់២ដូស ខណៈដែលការចាក់ដូសជំរុញក៏មានកំណើនគួរឲ្យកត់សម្គាល់។ សិង្ហបុរីមានករណីកូវីដ១៩ សរុប កើនដល់ ១,៤២៥,១៧១នាក់ហើយ គិតត្រឹមព្រឹកថ្ងៃទី២៩ មិថុនា៕ ប្រែសម្រួល៖ សារ៉ាត