សមត្ថកិច្ចចុះបង្ក្រាបនិងឃាត់ខ្លួនជនសង្ស័យ ១១នាក់ ពាក់ព័ន្ធករណីប្រើប្រាស់ដោយខុសច្បាប់ នូវសារធាតុញៀន
ភ្នំពេញ ៖ កម្លាំងសមត្ថកិច្ចចម្រុះ នៃអធិការដ្ឋាននគរបាលខណ្ឌជ្រោយចង្វារ ដឹកនាំបញ្ជាដោយលោកវរៈសេនីយ៍ទោ លៀក ចាន់រាបសា អធិការនគរបាលខណ្ឌជ្រោយចង្វារ សហការជាមួយកម្លាំងគណៈបញ្ជាការឯកភាពខណ្ឌជ្រោយចង្វារ ដឹកនាំដោយលោក កៅ សារ៉ាវុធ អភិបាលរង កាលពីវេលាម៉ោង ០៤ និង១០នាទី ថ្ងៃទី០២ ខែកក្កដា ឆ្នាំ២០២២ បានធ្វើការចុះឆ្មក់បង្រ្កាប និង ឃាត់ខ្លួនមនុស្សសង្ស័យចំនួន ១៧នាក់ ដោយសង្ស័យពាក់ព័ន្ធករណីគ្រឿងញៀន ស្ថិតនៅចំណុចវិហារឯករង្សី នៅភូមិ១ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
ក្រោយពីធ្វើការសាកសួរ និងធ្វើតេស្តរកសារធាតុញៀន ជាលទ្ធផលមនុស្សចំនួន ១១នាក់ រកឃើញមានសារធាតុញៀន និងមនុស្សចំនួន ០៦នាក់ មិនមានសារធាតុញៀន ហើយត្រូវបានសមត្ថកិច្ចអនុញ្ញាតឱ្យត្រឡប់ទៅផ្ទះវិញ ។
បច្ចុប្បន្ន ជនសង្ស័យចំនួន ១១នាក់ ខាងលើនេះ ត្រូវបានកម្លាំងសមត្ថកិច្ចជំនាញ កំពុងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធី ៕ ដោយ ៖ ឆៃហួត