កម្ពុជាក្នុងរយៈពេល២៤ ម៉ោងចុងក្រោយនេះ ការឆ្លងថ្មីកូវីដ១៩ មានចំនួន៦នាក់ បន្ថែមទៀត ដែលនាំឲ្យការចាប់ផ្តើមរកឃើញឆ្លងសាជាថ្មីកន្លងមកនេះ មានរយៈ៩ថ្ងៃជាប់គ្នាហើយ។

យោងតាមក្រសួងសុខាភិបាល ការឆ្លងថ្មីទាំង ៦ករណីនៅថ្ងៃនេះ សុទ្ធជាករណីឆ្លងនៅក្នុង សហគមន៍ទាំងអស់ ។ គិតក្នុងរយៈពេល៩ថ្ងៃចុងក្រោយ ការរកឃើញការឆ្លងកូវីដ១៩ជាថ្មី ក្នុងប្រទេសកម្ពុជានេះ មានតួលេខសរុប ៤៦នាក់។

មន្ត្រីរាជរដ្ឋាភិបាលខណៈការឆ្លងបានវិលត្រឡប់មកវិញនេះ បានអំពាវនាវពលរដ្ឋបង្កើនការ ប្រុងប្រយ័ត្ន និងត្រូវបន្តទទួលវ៉ាក់សាំងដូសជំរុញដោយមិនត្រូវភ្លេចឡើយ។

យោងតាមក្រសួងសុខាភិបាល យុទ្ធនាការចាក់វ៉ាក់សាំងដូសទី៥ រយៈពេល ២៨ថ្ងៃមកនេះ មានពលរដ្ឋទៅចាក់បានចំនួន ៣៤ម៉ឺន ៤៧២នាក់។ តួលេខអ្នកចាក់វ៉ាក់សាំងដូសទី៤ ក្នុង រយៈពេល ២៤ម៉ោងមកនេះបានចំនួន ១ម៉ឺន ៤ពាន់ ៦៥៨នាក់ ដែលកើនឡើងចំនួន ២ពាន់ ៦២៨នាក់ បើប្រៀបធៀបនឹងម្សិលមិញ, ចំណែកតួលេខអ្នកចាក់វ៉ាក់សាំង ដូសទី៣ នោះវិញ, រយៈពេល ២៤ម៉ោងមកនេះមានចំនួន ៧ពាន់ ៤០៣ ដែលច្រើនជាងម្សិលមិញចំនួន ២៣៨ នាក់ ផងដែរ ។ តួលេខអ្នកចាក់វ៉ាក់សាំងដូសមូលដ្ឋានទូទាំងប្រទេសគិតត្រឹមថ្ងៃ០៧ កក្កដា បានកើនដល់ចំនួន ១៥លាន ៩ម៉ឺន ៣ពាន់ ៨០៨នាក់ ដែលស្មើនឹង ៩៤,៣៤ ភាគរយ ។