ភ្នំពេញ ៖ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន និងឯកឧត្តម Mikami Massahiro ឯកអគ្គរាជទូត ជប៉ុន ប្រចាំនៅកម្ពុជា នាព្រឹកថ្ងៃទី១៨ ខែកក្កដា ឆ្នាំ២០២២ បានអញ្ជើញជាអធិបតី ក្នុងពិធីប្រគល់រថយន្តដឹកសំរាម សំណល់រឹង ចំនួន ១៥គ្រឿង ដល់រដ្ឋបាល ក្រុង ស្រុក អង្គភាព និងប្រតិបត្តិករ ដែលកំពុងផ្តល់សេវាសម្អាត ប្រមូល ដឹកជញ្ជូន និងទុកដាក់សំរាម សំណល់រឹង ចំនួន ១៥បន្ថែម ។

ពិធីប្រគល់រថយន្តដឹកសំរាម សំណល់រឹងនេះ គឺក្នុងគោលបំណងរួមគ្នាគាំទ្រគម្រោង ៣សេវា ៣គាំទ្រ ដើម្បីការរស់នៅស្អាត ភូមិឋានស្អាត ក៏ដូចជាការឆ្លើយតបនឹងគោលនយោបាយ ច្បាប់ បទដ្ឋានគតិយុត្ត និងទស្សនវិស័យរបស់រាជរដ្ឋាភិបាល ក្រោមពាក្យស្លោក “ មានអនាម័យ មានសោភ័ណភាពល្អ និងមានបរិស្ថានល្អ”និង“កម្ពុជាស្អាត ផ្តើមចេញពី យើងម្នាក់ៗ ” ឈរលើគោលការណ៍ “ការរស់នៅស្អាត ភូមិឋានស្អាត សុខភាពល្អ ជីវិតរីករាយ អនាគតរុងរឿង ” និង “ រៀបចំបង្កើត និងដាក់ឱ្យអនុវត្តប្រព័ន្ធគ្រប់គ្រងសំរាម សំណល់រឹងទីប្រជុំជន មានលក្ខណៈទំនើប គ្រប់ជ្រុងជ្រោយ ដោយគិតគូរអំពីប្រសិទ្ធភាពសេដ្ឋកិច្ច លទ្ធភាពធនធាន ហិរញ្ញវត្ថុ និរន្តរភាពបរិស្ថាន និង ទិដ្ឋភាពសង្គម ” ធ្វើឱ្យប្រសើរឡើងនូវការគ្រប់គ្រងសំរាម សំណល់រឹងទីប្រជុំជន ប្រកបដោយប្រសិទ្ធិភាព តម្លាភាព និងគណនេយ្យភាព សំដៅបាននូវសោភ័ណភាព កិច្ចគាំពារបរិស្ថាន សុខភាពសាធារណៈ និងបរិស្ថាន ក៏ដូចជារួមចំណែកធ្វើឱ្យភូមិ ឃុំ សង្កាត់ កាន់តែមាន បរិស្ថានស្អាត ការរស់នៅ ប្រកបដោយ ផាសុខភាព សុខុមាលភាព និងសោភ័ណភាព ទាក់ទាញ សមស្របទៅនឹងកំណើននគរូបនីយកម្ម និងការអភិវឌ្ឍសេដ្ឋកិច្ចដ៏ឆាប់រហ័ស។

រដ្ឋបាល ក្រុង ស្រុក អង្គភាព និងប្រតិបត្តិករ ទាំង ១៥ មកពីខេត្តចំនួន ១១ បានមកទទួលរួមមាន ៖
1.ខេត្តកែប រថយន្ត១គ្រឿង (ក្រុងកែប)
2.ខេត្តតាកែវ រថយន្ត៣គ្រឿង+ធុងដាំស្ទ័រ ៥ធុង(ក្រុងដូនកែវ ” ក្រុមហ៊ុន ប្រាក់ច័ន្ទរដ្ឋា “) ១គ្រឿង, ស្រុកបាទី ១គ្រឿង+ធុងដាំស្ទ័រ ៥ធុង ” ក្រុមហ៊ុន ប្រាក់ ច័ន្ទរដ្ឋា ” និងស្រុកគិរីវង់ ១គ្រឿង
3.ខេត្តកំពង់ស្ពឺ រថយន្ត១គ្រឿង (ក្រុងច្បារមន)
4.ខេត្តកោះកុង រថយន្ត ១គ្រឿង (ស្រុកស្រែអំបិល)
5.ខេត្តសៀមរាប រថយន្ត ១គ្រឿង (ស្រុកបន្ទាយស្រី)
6.ខេត្តស្ទឹងត្រែង រថយន្ត១គ្រឿង ( ក្រុងស្ទឹងត្រែង)
7.ខេត្តស្វាយរៀង រថយន្ត១គ្រឿង(ស្រុកកំពង់រោទិ៍)
8.ខេត្តពោធិ៍សាត់ រថយន្ត១គ្រឿង(ស្រុកបាកាន)
9.ខេត្តព្រះសីហនុ រថយន្ត១គ្រឿង(ស្រុកកំពង់សិលា)
10.ខេត្តបន្ទាយមានជ័យ រថយន្ត១គ្រឿង (ស្រុកព្រះនេត្រព្រះ)
11.ខេត្តកំពង់ឆ្នាំង រថយន្ត៣គ្រឿង (ក្រុងកំពង់ឆ្នាំង ស្រុករលាប្អៀរ និងកំពង់ត្រឡាច) ៕ ដោយ / គ្រី សម្បត្តិ