ហាណូយ៖ ទេសចរណ៍វៀតណាមនឹងបន្តទាញយកទីផ្សារសក្តានុពល ដូចជា ប្រទេសឥណ្ឌា និងជំរុញយុទ្ធនាការ នៅសហរដ្ឋអាមេរិក និងសហភាពអឺរ៉ុប ដើម្បីសម្រេចគោលដៅ កត់ត្រាការមកដល់របស់ភ្ញៀវបរទេសចំនួន ៥លាននាក់ នៅឆ្នាំ២០២២នេះ ។

លោក Nguyen Trung Khanh អនុប្រធានរដ្ឋបាលជាតិទេសចរណ៍វៀតណាម បាននិយាយនៅក្នុងសន្និសីទមួយ នាពេលថ្មីៗនេះថា ឧស្សាហកម្មទេសចរណ៍បានបង្ហាញសញ្ញានៃភាពប្រសើរឡើងគួរឱ្យកត់សម្គាល់បន្ទាប់ពីរដ្ឋាភិបាលបានបើកដំណើរការទេសចរណ៍អន្តរជាតិ និងអនុញ្ញាតឱ្យចូលដោយគ្មានការដាក់ឱ្យនៅដាច់ដោយឡែកពីគេ ចាប់ពីថ្ងៃទី ១៥ ខែមីនា។

នៅក្នុងឆមាសទីមួយនៃឆ្នាំនេះ វៀតណាមទទួលបានភ្ញៀវទេសចរបរទេសចំនួន ជាង ៦០ម៉ឺននាក់ កើនឡើង ជិត ៧ដង បើធៀបនឹងពេលដូចគ្នា កាលពីឆ្នាំ២០២១ នៅពេលដែលការរឹតបន្តឹងការចូលទាក់ទងនឹងជំងឺរាតត្បាត នៅតែជាធរមាននោះ។ ទោះជាយ៉ាងណាក៏ដោយ នេះគ្រាន់តែជា ១២ ភាគរយ នៃគោលដៅចំនួន ៥លាននាក់ ដែលបានកំណត់សម្រាប់ឆ្នាំនេះ។

លោក Khanh បាននិយាយថា សម្រាប់ពេលវេលានៅសល់ នៃឆ្នាំនេះ ឧស្សាហកម្មទេសចរណ៍គួរតែផ្តោតលើការទាក់ទាញភ្ញៀវទេសចរពីទីផ្សារសក្តានុពលដូចជាប្រទេសឥណ្ឌា សហរដ្ឋអាមេរិក និងមជ្ឈិមបូព៌ា។

យោងតាមស្ថិតិរបស់រដ្ឋបាលជាតិទេសចរណ៍វៀតណាម សហរដ្ឋអាមេរិកបានបញ្ជូនចំនួនភ្ញៀវទេសចរណ៍ច្រើនជាងគេ លំដាប់ទីពីរទៅកាន់ប្រទេសវៀតណាម បន្ទាប់ពីប្រទេសនេះបានបើកព្រំដែនឡើងវិញ។

មុនពេលជំងឺរាតត្បាត ឥណ្ឌាគឺជាទីផ្សារទេសចរណ៍មួយក្នុងចំណោមទីផ្សារទេសចរណ៍ដែលរីកលូតលាស់លឿនបំផុតរបស់វៀតណាម ជាមួយនឹងការកើនឡើង ២៨ភាគរយក្នុងឆ្នាំ២០១៩ ៕ ប្រភពពី VNexpress , ប្រែសម្រួលដោយ៖ សារ៉ាត