បាងកក៖ ខេត្តឈៀងម៉ៃ និងឈៀងរ៉ៃ ត្រូវបានរាយការណ៍ថា ហាក់ដូចជាញ័រ រងឥទ្ធិពលពីការរញ្ជួយដី នៅប្រទេសមីយ៉ាន់ម៉ា នៅព្រឹកព្រលឹមថ្ងៃសុក្រនេះ។ គិតត្រឹមម៉ោងជាង១០ព្រឹក ថ្ងៃទី២២ កក្កដានេះ មិនទាន់មានសេចក្តីរាយការណ៍ពីការខូចខាតទ្រព្យសម្បត្តិ ឬរបួសដែលបណ្តាលមកពីការរញ្ជួយដីនេះនៅឡើយទេ។

នាយកដ្ឋានអង្កេតការរញ្ជួយដីថៃបាននិយាយថា ការរញ្ជួយដីកម្រិត ៦.៤ រិចទ័រដំបូង ត្រូវបានចាប់បាន បន្ទាប់ពីពាក់កណ្តាលអធ្រាត្រនៅប្រទេសមីយ៉ាន់ម៉ា ចំណុចកណ្តាលនៃការរញ្ជួយដីនេះត្រូវបានគេរកឃើញប្រហែល ៨៧ គីឡូម៉ែត្រ ទៅភាគឦសាននៃស្រុក Mae Sai នៃខេត្ត Chiang Rai ។

ការរញ្ជួយដីកម្រិតស្រាលៗជាច្រើនត្រូវបានចាប់បាន នៅពេលក្រោយ ជាមួយនឹងការរញ្ជួយកម្រិត ៥.៣ រិចទ័រចុងក្រោយត្រូវបានកត់ត្រា នៅម៉ោង ៥៖២២នាទីព្រឹក។ នាយកដ្ឋាននេះរាយការណ៍ទៀតថា ការរញ្ជួយដីអាចកើតមាននៅក្នុងស្រុក Muang, Mae Chan, Chiang Khong និង Chiang Saen និងស្រុក Muang នៃខេត្ត Chiang Rai ៕ ប្រភពពីបាងកកប៉ុស្តិ៍, ប្រែសម្រួលដោយ៖ សារ៉ាត