កៀវ៖ ប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គី បានសន្យាថា អ៊ុយក្រែននឹងបន្តប្រយុទ្ធជាមួយរុស្ស៊ី រហូតទាល់តែខ្លួនដណ្តើមគ្រប់គ្រងឧបទ្វីបគ្រីមៀ មកវិញ។

លោក ហ្សេលេនស្គី បាននិយាយនៅក្នុងសុន្ទរកថាតាមវីដេអូមួយថា សង្រ្គាមរុស្ស៊ីប្រឆាំងនឹងអ៊ុយក្រែន… ប្រឆាំងនឹងអឺរ៉ុបសេរីទាំងមូល បានចាប់ផ្តើមជាមួយនឹងឧបទ្វីបគ្រីមៀ ហើយវាគួរតែបញ្ចប់ដោយគ្រីមៀ… ជាមួយនឹងការរំដោះរបស់ខ្លួន ដោយលោកបានប្តេជ្ញាថា ឧបទ្វីបគ្រីមៀ គឺជាអ៊ុយក្រែន ហើយយើងនឹងមិនបោះបង់វាឡើយ។

ឧបទ្វីបគ្រីមៀ បានបោះឆ្នោតយ៉ាងលើសលប់ដើម្បីរួបរួមជាមួយរុស្ស៊ី ក្នុងការបោះឆ្នោតប្រជាមតិឆ្នាំ ២០១៤។ ពាក់ព័ន្ធនឹងបញ្ហានេះ លោក ហ្សេលេនស្គី បានអះអាងថា នឹងមិនមានសន្តិភាពនៅក្នុងសមុទ្រខ្មៅ និងតំបន់មេឌីទែរ៉ាណេនោះទេ ដរាបណារុស្ស៊ីអាចប្រើប្រាស់ឧបទ្វីបរបស់យើងធ្វើជាមូលដ្ឋានយោធា។

ទោះជាយ៉ាងណាក៏ដោយ ប្រធានាធិបតីអ៊ុយក្រែនរូបនេះបានទទួលស្គាល់ថា ខ្លួនមិនអាចនិយាយបានទេថាតើពេលណាដែលអ៊ុយក្រែន អាចទាមទារយកឧបទ្វីបគ្រីមៀមកវិញ ប៉ុន្តែលោក ហ្សេលេនស្គី បាននិយាយថា យើងកំពុងបន្ថែមសមាសធាតុថ្មីជានិច្ច ទៅក្នុងរូបមន្តរំដោះឧបទ្វីបនេះចេញពីកណ្តប់ដៃរបស់រុស្ស៊ី។

សូមរម្លឹកថា កាលពីខែមុន អនុរដ្ឋមន្ត្រីការពារជាតិអ៊ុយក្រែនបានអះអាងថា អ៊ុយក្រែននឹងប្រើប្រាស់អាវុធដែលផ្គត់ផ្គង់ដោយលោកខាងលិច វាយកម្ទេចកងនាវាចរសមុទ្រខ្មៅរបស់រុស្ស៊ី ដែលមានមូលដ្ឋាននៅទីក្រុងកំពង់ផែ ស៊ីវ៉ាស្តូប៉ូល គ្រីមៀ ហើយដណ្តើមយកឧបទ្វីបមកវិញ។ គាត់បានប្រាប់ប្រព័ន្ធផ្សព្វផ្សាយអង់គ្លេសថា ប្រតិបត្តិការបែបនេះ នឹងត្រូវអនុវត្តក្នុងពេលឆាប់ៗនេះ ឬក៏ពេលក្រោយ៕ ប្រភព៖ RT ប្រែសម្រួល៖ ទីណា និងបុត្រា