បន្ទាយមានជ័យ ៖ ឯកឧត្តម អ៊ុ រាត្រី អភិបាលខេត្ត បន្ទាយមានជ័យ នៅថ្ងៃទី១៧ ខែសីហា ឆ្នាំ ២០២២ បានដឹកនាំកងកម្លាំងប្រដាប់អាវុធទាំង៣ប្រភេទ រដ្ឋបាលអភិបាលក្រុងសិរីសោភ័ណ ចៅសង្កាត់ ចុះជួយច្រូតស្រូវរបស់ប្រជាពលរដ្ឋដែលលិចលង់ដោយសារទំនន់ទឹកភ្លៀង នៅសង្កាត់ភ្នៀត និងសង្កាត់កោះពងសត្វ ក្រុងសិរីសោភ័ណ ដែលនៅសេសសល់ ត្រូវជំនន់ទឹកភ្លៀងជន់លិច ក្រោយពីភ្លៀងធ្លាក់ប៉ុន្មានថ្ងៃជាប់គ្នា ខណៈដែលពលរដ្ឋកំពុងប្រមូលផល បានមួយចំនួន ដោយមួយចំនួ នមិនទាន់ប្រមូលផល។

ពលរដ្ឋដែលជាម្ចាស់ស្រែ បានថ្លែងអំណរគុណ ចំពោះថ្នាក់ដឹកនាំកងកម្លាំងប្រដាប់អាវុធទាំងអស់ ដែលបានចុះជួយប្រមូលផលគាត់ ជាពិសេសចុះជួយប្រជាពលរដ្ឋគ្រប់កាលៈទេសៈ មិនខ្លាចនឿយហត់ មិនថាទីណាកន្លែងណា។

ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានសម្តែងការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់មេបញ្ជាការគ្រប់កងឯកភាព ស្នងការនគរបាលខេត្ត អធិការ និងកងកម្លាំងទាំងអស់ ក្នុងខេត្ត ដែលជានិច្ចកាលមានស្មារតីចូលរួមជួយដោះស្រាយទុក្ខលំបាករបស់ប្រជាពលរដ្ឋនៅមូលដ្ឋាន គ្រប់ពេលវេលា ក្រៅពីកិច្ចស្នូលអង្គភាពរបស់ខ្លួន ។

ក្នុងនាមគណៈបញ្ជាការឯកភាព បានត្រៀម រៀបចំកងកម្លាំង សម្ភារៈ និងមធ្យោបាយ ដើម្បីជួយសង្គ្រោះដល់ប្រជាពលរដ្ឋដែលរងគ្រោះ ដោយសារគ្រោះមហន្តរាយផ្សេងៗ នៅតាមបណ្ដាក្រុង-ស្រុក ទូទាំង ខេត្ត ទាំងមូល ៕ ដោយ៖ឃិន គន្ធា