ទូតឥណ្ឌាប្រចាំ UN ប្រកាសជំនួយដល់អ៊ុយក្រែន និងអំពាវនាវឱ្យភាគីជម្លោះចរចាគ្នា
ប្រទេសឥណ្ឌាដែលជាមហាយក្សនៅអាស៊ីខាងត្បូង និងមិនបានអនុវត្តទណ្ឌកម្មប្រឆាំងប្រទេសរុស្ស៊ីតាមការរៀបចំឡើងរបស់ប្រទេសលោកខាងលិច បានបន្តដឹកជំនួយថ្នាំពេទ្យទៅជួយប្រទេសអ៊ុយក្រែន ចំថ្ងៃដែលប្រទេសអ៊ុយក្រែនប្រារព្វទិវាឯករាជ្យជាតិខួបលើកទី៣១ឆ្នាំ។
ថ្លែងទៅកាន់កិច្ចប្រជុំស្តីពីស្ថានការណ៍នៅអ៊ុយក្រែនដែលរៀបចំឡើងកាលពីថ្ងៃពុធ ចំពេលដែលប្រទេសអ៊ុយក្រែងប្រារព្វខួបទិវាឯករាជ្យលើកទី៣១ឆ្នាំ និងចំថ្ងៃដែលរុស្ស៊ីលើកទ័ពចូលប្រទេសអ៊ុយរយៈពេល៦ខែគត់ តំណាងអចិន្ត្រៃយ៍ឥណ្ឌាប្រចាំនៅអង្គការសហប្រជាជាតិ លោកស្រី Ruchira Kamboj បាននិយាយ ប្រទេសឥណ្ឌាបានត្រៀមខ្លួនរួចរាល់ហើយក្នុងការបញ្ជូនជំនួយមនុស្សធម៌លើកទី១២តាមការស្នើសុំរបស់អ៊ុយក្រែន។
យោងតាមអ្នកការទូតឥណ្ឌា ទំនិញទាំងនោះរួមមានថ្នាំ២៦ប្រភេទ និងសម្ភារៈពេទ្យ។
លោកស្រីបានសង្កត់ធ្ងន់ថា គោលជំហររបស់ឥណ្ឌា គឺជំរុញកិច្ចសន្ទនា និងការទូត ដើម្បីបញ្ចប់ជម្លោះ និងបន្ធូរបន្ថយបញ្ហាសេដ្ឋកិច្ច ដែលកើតចេញពីស្ថានភាពនៅអ៊ុយក្រែន។
លោកស្រី Ruchira Kamboj បាននិយាយកាលពីថ្ងៃពុធថា ឥណ្ឌាលើកទឹកចិត្តឱ្យមានកិច្ចចរចារវាងអ៊ុយក្រែន និងរុស្ស៊ី។ នៅក្នុងសុន្ទរកថាទៅកាន់ក្រុមប្រឹក្សាសន្តិសុខអង្គការសហប្រជាជាតិ លោក Kamboj បាននិយាយថា «ឥណ្ឌាលើកទឹកចិត្តឱ្យមានកិច្ចចរចារវាងអ៊ុយក្រែន និងរុស្ស៊ី ហើយនាយករដ្ឋមន្រ្តីឥណ្ឌា Narendra Modi ដោយផ្ទាល់ បាននិយាយរឿងនេះទៅកាន់ពួកគេ»។
ប្រធានាធិបតីរុស្ស៊ី លោក វ្ល៉ាឌីមៀ ពូទីន បានហៅការលុកលុយអ៊ុយក្រែនដោយកម្លាំងយោធា ត្រឹមតែជា«ប្រតិបត្តិការយោធាពិសេស»មួយទៅកាន់ប្រទេសអ៊ុយក្រែន ដើម្បីឆ្លើយតបនឹងសំណើសុំជំនួយពីប្រមុខនៃសាធារណរដ្ឋ Donbass កាលថ្ងៃទី២៤ខែកុម្ភៈ ប៉ុន្តែសម្រាប់ប្រទេសអ៊ុយក្រែននិងប្រទេសសេរីនៅបច្ចឹមប្រទេសបានអះអាងថា «នោះជាការបង្កសង្គ្រាមពេញទំហឹង»។
ពួកបច្ចឹមប្រទេសបានប្រកាសដាក់ទណ្ឌកម្មលើសេដ្ឋកិច្ចរុស្ស៊ី ថ្នាក់ដឹកនាំរុស្ស៊ី និងធ្វើសកម្មភាពការទូតដើម្បីឱ្យរុស្ស៊ីស្ថិតនៅឯកោ ប៉ុន្តែប្រទេសចិនបានឈរនៅកៀកស្មានឹងប្រទេសរុស្ស៊ីចំពោះទណ្ឌកម្មនេះ។ ក្រៅពីនោះ ប្រទេសជាច្រើនទៀតនៅមជ្ឈឹមបូព៌ា អាហ្រ្វិក និងតំបន់អាស៊ី ក៏មិនអនុវត្តទណ្ឌកម្មនោះដែរ៕ ប្រភព៖ ABP Live