UN អំពាវនាវឱ្យមានបទឈប់បាញ់ ស្របពេលមានការប្រយុទ្ធគ្នាជាថ្មីនៅអេត្យូពីភាគខាងជើង
លោកអគ្គលេខាធិការអង្គការសហប្រជាជាតិ អង់តូនីញ៉ូហ្គុយតឺរេស បាននិយាយថា លោកមានការរន្ធត់ចិត្តយ៉ាងខ្លាំងដោយសារមានការប្រយុទ្ធគ្នាជាថ្មីនៅជុំវិញតំបន់ទីហ្គ្រេយ៍ភាគខាងជើងនៃប្រទេសអេត្យូពីនិងបានអំពាវនាវឱ្យមានបទឈប់បាញ់មួយជាបន្ទាន់។
ការប្រយុទ្ធគ្នា បានកើតឡើងកាលពីថ្ងៃពុធនៅជុំវិញចុងខាងត្បូងនៃតំបន់ទីហ្គ្រេយ៍ដោយរដ្ឋាភិបាលនិងក្រុមឧទ្ទាមរណសិរ្សរំដោះប្រជាជនទីហ្គ្រេយ៍(TPLF) ចោទគ្នាទៅវិញទៅមកថាបានបន្តភាពអារិភាព និងបានបំផ្លាញបទឈប់បាញ់មួយមានអាយុកាល៥ខែហើយនេះ។
របាយការណ៍អំពីការវាយប្រហារថ្មីៗនេះ បានកើតឡើងបន្ទាប់ពីកងទ័ពអាកាសអេត្យូពី បានប្រកាសថាខ្លួនបានបាញ់ទម្លាក់យន្តហោះ១គ្រឿងដែលដឹកអាវុធទៅឱ្យ TPLF។
រដ្ឋាភិបាលរបស់លោកនាយករដ្ឋមន្ត្រី Abiy Ahmed និងក្រុមឧទ្ទាមបានចោទគ្នាទៅវិញទៅមកជុំវិញការបំផ្លាញកិច្ចខិតខំប្រឹងប្រែងដើម្បីដោះស្រាយសង្គ្រាមព្រៃផ្សៃរយៈពេល២១ខែនៅក្នុងប្រទេសមានប្រជាជនច្រើនបំផុតទី២នៅអាហ្រិ្វក និងស្តីបន្ទោសគ្នាទៅវិញទៅមកជុំវិញអ្នកដែលទទួលខុសត្រូវចំពោះការបន្តប្រយុទ្ធគ្នានេះ។
លោកហ្គុយតឺរេស បានថ្លែងថា លោកភ័យតក់ស្លុតយ៉ាងខ្លាំងដោយសារការប្រយុទ្ធគ្នាជាថ្មីនោះនិងអំពាវនាវឱ្យបញ្ឈប់ភាពអារិភាពជាបន្ទាន់និងឱ្យបន្តការចរចាសន្តិភាព មធ្យោបាយមនុស្សធម៌ពេញលេញនិងបង្កើតសេវាសាធារណៈនៅតំបន់ទីហ្គ្រេយ៍ឡើងវិញ។
ប្រធានគណៈកម្មការសហភាពអាហ្វ្រិក (AU) លោក Moussa Faki Mahamat បានអំពាវនាវសុំឱ្យបន្ធូរបន្ថយភាពតានតឹង និងបន្តការចរចា ដើម្បីស្វែងរកដំណោះស្រាយដោយសន្តិវិធី។
ប្រេសិតពិសេសអាហ្រ្វិកប្រចាំនៅ AU លោក Olusegun Obasanjo កំពុងដឹកនាំការជំរុញជាអន្តរជាតិដើម្បីបញ្ចប់ជម្លោះរយៈពេល២១ខែនៅអេត្យូពីខាងជើងរវាងក្រុមឧទ្ទាមទីហ្រ្គេយ៍និងកម្លាំងរដ្ឋាភិបាល។
នៅក្នុងសេចក្តីថ្លែងការណ៍មួយ AU បានឱ្យដឹងថា លោក Faki បានបញ្ជាក់អះអាងពីការបន្តប្តេជ្ញារបស់សហភាពអាហ្វ្រិកដើម្បីធ្វើការជាមួយភាគីទាំងអស់ក្នុងការគាំទ្រដល់ដំណើរការនយោបាយដែលមានការឯកភាពគ្នាដើម្បីប្រយោជន៍ប្រទេសដោយបានអំពាវនាវឱ្យភាគីទាំង២ សហការជាមួយលោក Obasanjo។ ក្រសួងការបរទេសអាមេរិកបានអំពាវនាវដល់រដ្ឋាភិបាលអេត្បូពីនិងTPLF បង្កើនកិច្ចខិតខំប្រឹងប្រែងដើម្បីឈានដល់ការចរចាសម្រាប់បទឈប់បាញ់រយៈពេលយូរ៕ ប្រភព៖ Aljazeera