ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានបង្ហាញរូបថត ដែលមិនធ្លាប់បានឃើញពីមុន តាមរយៈទំព័ហ្វេសប៊ុក នៅព្រឹកថ្ងៃទី២៦ ខែសីហា ឆ្នាំ២០២២។

សម្ដេចតេជោ បានសរសេរលើទំព័រហ្វេសប៊ុកដូច្នេះថា សូមអរគុណចំពោះបងប្អូនដែលបានផ្តល់រូបថតមកឱ្យខ្ញុំតាមរយៈ messenger Facebook ។ រូបថតដែលបញ្ជូនមកមានមួយចំនួនខ្ញុំមិនដែលបានឃើញ ពីមុនមិនដឹងថា ថតនៅពេលណា នៅទីណា និងអ្នកណាជាអ្នកថត?។

សម្ដេចបន្តថា លើកនេះ មានរូបថត៤សន្លឹកដែលខ្ញុំគិតថា ថតក្នុងពេលតែមួយដោយសំគាល់ទៅលើអាវ ក្រវ៉ាត់ក និងផ្លាកសញ្ញាសម្រាប់ចូលប្រជុំតែអ្វីដែលមិនច្បាស់គឺកន្លែង និងពេលវេលា។

សម្ដេចតេជោ ហ៊ុន សែន បានបន្ថែមថា ខ្ញុំសង្ស័យ៥កន្លែង ឬ៥ប្រទេសគឺ៖

១.ការប្រជុំក្រៅផ្លូវការហ្សាកាតា(JIM)
ទាំងពីរលើក១៩៨៨.១៩៨៩និងការប្រជុំ
រៀបចំសមាសភាពSNC1991នៅ
ឥណ្ឌូណេសុី។

២.សន្និសិទប៉ារីសចាប់ផ្តើមដំបូង១៩៨៩
នៅប្រទេសបារាំង។

៣.ការប្រជុំបង្កើតSNCនៅតូក្យូប្រទេសជប៉ុន១៩៩០។

៤.ការប្រជុំSNCនៅបាងកកឬប៉ាតាយ៉ា
ប្រទេសថៃ១៩៩១។

៥.ការប្រជុំSNCនៅប៉េកាំងប្រទេសចិន ១៩៩១។

ជាមួយគ្នានេះដែរ សម្ដេចតេជោ សូមអំពាវនាវបងប្អូនដែលបានដឹងប្រភពរូបថតនេះ ជួយប្រាប់ព្រោះរូបថតទាំងនេះ ទាក់ទងដល់ប្រវត្តិស្វែងរកសន្តិភាព សម្រាប់កម្ពុជា ៕ ដោយ វណ្ណលុក