ភ្នំពេញ ៖ គ្រោះអគ្គីភ័យមួយឆាបឆេះឃ្លាំង ទិញ លក់ រថយន្តអស់ចំនួន ១០គ្រឿងទាំងស្រុង ដោយបង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះមកអន្តរាគមន៍បាញ់ទឹកពន្លត់ កាលពីវេលាម៉ោង១ និង៥០នាទីរំលងអាធ្រាត្រ ឈានចូលថ្ងៃទី២៧ ខែសីហា ឆ្នាំ២០២២ នៅតាមបណ្ដោយផ្លូវទំនប់៧០ ក្នុងសង្កាត់បឹងកក់១ ខណ្ឌទួលគោក រាជធានីភ្នំពេញ ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុនោះគេឃើញមានផ្សែងហុយចេញពីរថយន្តនៅក្នុងឃ្លាំងដែលម្ចាស់បានចាក់សោររបងត្រឹមត្រូវដូចរាល់ថ្ងៃ ។បន្ទាប់មកក៏មានអណ្ដាតភ្លើងឆេះឡើងយ៉ាងសន្ធោសន្ធៅ និងរាលដាលពីរថយន្តមួយទៅរថយន្ត ព្រមទាំងឆ្លងទៅឃ្លាំងមួយទៀតដែលនៅជាប់គ្នា បណ្ដាលឲ្យខូចខាតរថយន្តទាំងស្រុងសរុប ១០គ្រឿង ។

តាមការសន្និដ្ឋានរបស់សមត្ថកិច្ចជំហានតំបូងគឺ បណ្ដាលមកពីឆ្លងប្រព័ន្ធភ្លើងពីអាគុយក្នុងរថយន្ត ទើបមានការឆាបឆេះបែបនេះ ។ ហើយក្នុងហេតុការណ៍នេះមិនបណ្ដាលឲ្យមនុស្សណាម្នាក់រងរបួស ឬគ្រោះថ្នាក់អ្វីឡើយ ដោយប្រើពេលជាង ១ម៉ោងក៏ពន្លត់ភ្លើងឲ្យរលត់ទៅវិញជាស្ថាពរ ៕ ដោយ ៖ ជីម ភារ៉ា