អាមេរិកការពារការលក់សព្វាវុធឱ្យប៉ាគីស្ថានតម្លៃ៤៥០លានដុល្លារនៅចំពោះមុខរដ្ឋមន្ត្រីការបរទេសឥណ្ឌាដែលជាសត្រូវយូរឆ្នាំរបស់ប៉ាគីស្ថាន
អាមេរិក ៖ រដ្ឋមន្ត្រីការបរទេសអាមេរិក លោក អ៊ែនថូនី ប្ល៊ីងខិន (Antony Blinken) បាននិយាយការពារការលក់សព្វាវុធទៅឱ្យប៉ាគីស្ថាន។ក្រុងវ៉ាស៊ីនតោននិងអ៊ីស្លាម៉ាបាដ សម្រេចកិច្ចព្រមព្រៀងទិញយន្តហោះចម្បាំង F-16 តម្លៃ ៤៥០ លានដុល្លារ។ ប្រទេសឥណ្ឌាយល់ថាប៉ាគីស្ថានអាចនឹងប្រើអាវុធដែលទិញអាមេរិកនេះដើម្បីប្រឆាំងខ្លួន។
ក្នុងអំឡុងសន្និសីទសារព័ត៌មាននៅរដ្ឋធានីវ៉ាស៊ីនតោនកាលពីថ្ងៃអង្គារ លោក ប្ល៊ីងខិន បានអះអាងថា កញ្ចប់ផ្នែកយោធាដែលអនុម័តកាលពីដើមខែនេះ រៀបចំឡើងសម្រាប់ការជួសជុលថែទាំកងនាវាប៉ាគីស្ថានដែលមានស្រាប់ ហើយវាមិនមានយន្តហោះចម្បាំង ប្រព័ន្ធការពារ ឬអាវុធថ្មីនោះទេ។ លោកគូសបញ្ជាក់ទៀតថា៖ «ប៉ាគីស្ថាន ពង្រឹងសមត្ថភាពយោធារបស់ខ្លួនក្នុងការដោះស្រាយការគំរាមកំហែងភេរវកម្មដែលចេញមកពីប៉ាគីស្ថាន ឬក្នុងតំបន់។ វាមិនមែនប្រយោជន៍របស់នរណាមួយទេ ប្រសិនបើការគំរាមកំហែងទាំងនោះនៅតែបន្តកើតមាន ដោយគ្មានការដាក់ទោស»។
លោក ប្ល៊ីងខិន អះអាងយ៉ាងដូច្នេះ ក្នុងអំឡុងពេលឈរទន្ទឹមនឹងលោករដ្ឋមន្ត្រីការបរទេសឥណ្ឌា Subrahmanyam Jaishankar ដើម្បីធ្វើសន្និសីតសារព័ត៌មានក្រោយជំនួបរវាងរដ្ឋមន្រ្តីទាំង២ ដែលធ្វើឡើងមួយថ្ងៃបន្ទាប់ពីលោក ប្ល៊ីងខិន ជួបជាមួយសមភាគីប៉ាគីស្ថាន។ ការអះអាងនេះ ក៏ធ្វើឡើងផងដែរ បន្ទាប់ពីរដ្ឋមន្ត្រីការបរទេសឥណ្ឌា លោក Jaishankar បាននិយាយកាលពីថ្ងៃអាទិត្យ ថា ជំហររបស់អាមេរិក មិនអាចបន្លំនរណាបានទេ ហើយឥណ្ឌាដឹងថាយន្តហោះចម្បាំង F-16 របស់អាមេរិក នឹងត្រូវយកទៅដាក់ពង្រាយ ដើម្បីប្រឆាំងនឹងប្រទេសឥណ្ឌា។ លោកបន្ថែមថា៖ «និយាយដោយត្រង់ចុះ វាជាទំនាក់ទំនងដែលនឹងបញ្ចប់ទៅ ទាំងមិនបម្រើផលប្រយោជន៍ប៉ាគីស្ថាន ឬក៏អាមេរិកឱ្យបានល្អទេ»។
គួររំឭកថា សហរដ្ឋអាមេរិក បានរក្សាទំនាក់ទំនងដ៏រឹងមាំជាមួយឥណ្ឌា និងប៉ាគីស្ថានអស់រយៈពេលជាច្រើនទសវត្សរ៍មកហើយ បើទោះជាមានបញ្ហាផ្សេងៗរវាងប្រទេសជិតខាងទាំង២ក្ដី។ អ្នកនាំពាក្យក្រសួងការបរទេសសហរដ្ឋអាមេរិក លោក Ned Price ថ្លែងកាលពីដើមសប្តាហ៍នេះថា ទំនាក់ទំនងអាមេរិក-ឥណ្ឌា និងអាមេរិក-ប៉ាគីស្ថាន ស្ថិតនៅលើផ្នែករៀងៗខ្លួន។
វិស័យយោធារបស់ប៉ាគីស្ថាន ពឹងផ្អែកខ្លាំងលើការផ្គត់ផ្គង់ពីអាមេរិក ប៉ុន្តែទំនាក់ទំនងរវាងប្រទេសទាំង២ បានធ្លាក់ចូលទៅក្នុងភាពតានតឹងប៉ុន្មានឆ្នាំថ្មីៗនេះ ជាពិសេសក្នុងអំឡុងសង្គ្រាមនៅអាហ្វហ្គានីស្ថាន។ ចំណែកឯឥណ្ឌាវិញ មានភាពល្អកកកជាមួយអាមេរិកទាំងបញ្ហាសិទ្ធិមនុស្ស និងការទិញប្រភេទអាវុធរុស្ស៊ី ដែលរំលោភលើច្បាប់ឆ្នាំ ២០១៧ របស់អាមេរិក។ ទោះបីជាយ៉ាងនេះក៏ដោយ ក្នុងរយៈពេល ៣០ ឆ្នាំចុងក្រោយនេះ សហរដ្ឋអាមេរិកបានផ្ដល់អទិភាពខ្ពស់ លើការពង្រឹងទំនាក់ទំនងរបស់ខ្លួនជាមួយឥណ្ឌា ដើម្បីជួយទប់ទល់នឹងការកើនឡើងនៃឥទ្ធិពលរបស់ចិនក្នុងតំបន់៕
ដោយ៖ហួន ឌីណា
ប្រភព៖ US defends arms sales to Pakistan following criticism from India
