រុស្ស៊ីត្រួសត្រាយផ្លូវកាត់ទឹកដីអ៊ុយក្រែន១៥ ភាគរយ ដោយប្រកាសពីជម្នះលើការធ្វើប្រជាមតិ
រុស្ស៊ី៖ រុស្ស៊ីត្រួសត្រាយផ្លូវដើម្បីកាត់ទឹកដីអ៊ុយក្រែន១៥ភាគរយថា ជារបស់ខ្លួនដោយប្រកាសពីជ័យជម្នះលើការធ្វើប្រជាមតិក្នុងតំបន់ចំនួនបួនរបស់អ៊ុយក្រែន ហើយថាប្រជាជនភាគច្រើនលើសលប់ ចង់ចូលរួមជាមួយរុស្ស៊ី ទោះបីជាមានការថ្កោលទោសថារំលោភច្បាប់អន្តរជាតិក្ដី។
យោងតាមក្រុមមន្រ្តីដែលរុស្ស៊ីលើកបន្តុប សំឡេងឆ្នោត ៩៣ ភាគរយនៅតំបន់ហ្សាប៉ូរីចា ៨៧ ភាគរយនៅតំបន់ខឺសុន ៩៨ ភាគរយនៅតំបន់លូហានស្ក៍ និង ៩៩ ភាគរយនៅតំបន់ដុនណិតស្ក៍ បានគាំទ្រលើការចូលរួមជាមួយរុស្ស៊ី។
អ្នកនាំពាក្យវិមានក្រឹមឡាំង លោក Dmitry Peskov បានអះអាងថា សន្លឹកឆ្នោតនឹងផ្លាស់ប្តូរយ៉ាងខ្លាំងពីទស្សនៈផ្លូវច្បាប់អន្តរជាតិ ដោយវាភ្ជាប់ជាមួយនឹងផលវិបាក ដើម្បីការការពារ ក៏ដូចជាការធានាសន្តិសុខតំបន់ទាំងនោះ។
តាមរយៈលទ្ធផលប្រជាមតិនេះរុស្ស៊ីត្រូវបានគេរំពឹងថានឹងកាត់យកទឹកដីអ៊ុយក្រែនប៉ុន្មានថ្ងៃខាងមុន នៅពេលលោកប្រធានាធិបតី វ៉្លាឌីមៀរ ពូទីន ធ្វើការប្រកាសនៅក្នុងសភារុស្ស៊ីនៅថ្ងៃទី ៣០ ខែកញ្ញា។ ហើយសកម្មភាពដែលរំលោភលើរដ្ឋធម្មនុញ្ញអង្គការសហប្រជាជាតិនេះ នឹងធ្វើឱ្យសង្រ្គាមកាន់តែមានភាពតានតឹង ដោយរុស្ស៊ីនឹងអាចយកលេសការពារទឹកដីរបស់ខ្លួន ដើម្បីបង្កើនរាល់ចលានាយោធា រួមទាំងប្រើអាវុធនុយក្លេអ៊ែរតាមការគំរាម ក្នុងប្រតិបត្តិការឈ្លានពានរបស់ខ្លួន។
សូមបញ្ជាក់ថា លោកខាងលិចបានហៅការធ្វើប្រជាមតិដែលរៀបចំឡើងទាំងប្រញាប់ប្រញាល់នេះ ជាការធ្វើប្រជាមតិក្លែងក្លាយ ឥតប្រយោជន៍ពេញដោយការបង្ខិតបង្ខំ និងរំលោភលើច្បាប់អធិបតេយ្យ និងបូរណភាពទឹកដីអន្តរជាតិ ក្នុងរូបភាពដូចគ្នានឹងការធ្វើប្រជាមតិនៅតំបន់គ្រីមៀឆ្នាំ២០១៤។ បន្ថែមពីនេះ ការធ្វើប្រជាមតិនេះ មិនត្រូវបានចូលរួមដោយប្រជាជនដែលរស់នៅក្នុងតំបន់ទាំងមូលនោះទេ ដោយសារតែប្រជាជនជាច្រើនបានធ្វើការភៀសខ្លួនដើម្បីសុវត្ថិភាពនៅពេលសង្រ្គាមផ្ទុះឡើង និងម្យ៉ាងទៀត កងទ័ពរុស្ស៊ីក៏មិនបានគ្រប់គ្រងតំបន់ទាំង៤ទាំងមូលនោះដែរ។
ឆ្លើយតបនឹងបញ្ហានេះ អ៊ុយក្រែនបានជំរុញឱ្យសហភាពអឺរ៉ុបដាក់ទណ្ឌកម្មថ្មីបន្ថែមទៀត ហើយទីប្រឹក្សាប្រធានាធិបតីអ៊ុយក្រែន លោក Mykhailo Podolyak បានថ្លែងថា ប្រជាជនអ៊ុយក្រែន ដែលជួយរុស្ស៊ី រៀបចំការធ្វើប្រជាមតិ នឹងត្រូវប្រឈមមុខនឹងការចោទប្រកាន់ពីបទក្បត់ជាតិ និងជាប់ពន្ធនាគារយ៉ាងតិច៥ឆ្នាំ៕
ដោយ៖ហួន ឌីណា ប្រភព៖ Kremlin claims victory in controversial Ukraine referendums set to pave way for annexation
