សង្គមស៊ីវិលជំរុញឱ្យអាជ្ញាធរចាត់វិធានការចំពោះអាជីវកម្មលក់បារីអេឡិចត្រូនិកតាមអនឡាញ
ភ្នំពេញ៖ក្រុមអង្គការសង្គមស៊ីវិលដែលធ្វើការងារលើកកម្ពស់សុខមាលភាពកុមារនិងយុវជនទទួចឱ្យអាជ្ញាធរចាត់វិធានការបន្ថែមទៀតប្រឆាំងនឹងជំនួញបារីអេឡិចត្រូនិកតាមអនឡាញ។ស្ថាប័នចំនួនពីររួមមានអង្គការចលនាដើម្បីសុខភាពកម្ពុជានិងសម្ព័ន្ធកម្ពុជាដើម្បីប្រយុទ្ធនឹងជំងឺឆ្លងកាលពីថ្ងៃទី២៧ខែកញ្ញាបានចេញសេចក្ដីប្រកាសព័ត៌មានរួមមួយ ព្រមានពីករណីឈ្មួញជ្រើសយកផលិតផលដែលយុវជននិងកុមារស្គាល់ស្រាប់ដាក់លើសំបកបារីបារីអេឡិចត្រូនិកហើយលក់តាមអនឡាញដោយផ្ដោតសំខាន់លើទីផ្សារនៅកម្ពុជា។
សេចក្ដីប្រកាសព័ត៌មានលើកឡើងថា អ្នកផលិតបារីអេឡិចត្រូនិក បានផលិតទឹកសូលុយស្យុងរសជាតិកូកាកូឡា(Cocacola) ប៉ិបស៊ី(Pepsi) ហ្វាន់តា(Fanta) គោជល់(Red Bull) ស្ករកៅស៊ូឌុបបលមីន(Duoblemint) និងស្ករផ្លេ(Play) ដើម្បីដាក់លក់តាមបណ្ដាញសង្គមនិងស្វែងរកអតិថិជនថ្មី គឺសំដៅទៅលើយុវជន និងកុមារ។
សេចក្ដីប្រកាសព័ត៌មានបញ្ជាក់ថា៖«បារីអេឡិចត្រូនិកនេះ គឺមានផ្ទុកសារធាតុនីកូទីន បើសិនជាយុវជន និងកុមារបានប្រើប្រាស់បារីនេះ វាបង្កគ្រោះថ្នាក់យ៉ាងធ្ងន់ធ្ងរ ដល់សួត បេះដូង និងជាពិសេសខូតខាតដល់ប្រព័ន្ធខួរក្បាល។ប៉ុន្តែវាត្រូវបានផ្សព្វផ្សាយបំភ័ន្តដោយដោយអ្នកចែកចាយនិងអ្នកផលិតថាជាមធ្យោបាយផ្ដាច់បារី »។ធ្វើឲ្យយុវជនប្រើប្រាស់បារីធឲសោះ
នាយកប្រតិបត្តិការអង្គការចលនាដើម្បីសុខភាពកម្ពុជាលោក វេជ្ជបណ្ឌិត មុំ គង់ បានប្រាប់ថា បារីអេឡិចត្រូនិក និងបារីធម្មតា គឺវាជាផលិតផលថ្នាំជក់ និងមានគ្រោះថ្នាក់ដល់សុខភាពដូចគ្នា។ចំណែកភាពខុសគ្នារវាងបារីអេឡិចត្រូនិក គឺអ្នកប្រើប្រាស់ ជក់បារីនេះ មិនមានផ្សែងទេ ហើយបារីនេះ គឺផលិតឡើងសម្រាប់យុវជន និងកុមារ។
លោកវេជ្ជបណ្ឌិត មុំ គង់ មានប្រសាសន៍៖ «ចំពោះយុវជន និងកុមារដែលប្រើប្រាស់បារីអេឡិចត្រូនិក គឺវាមានសារធាតុនីកូទីន ហើយសារធាតុនេះញៀនខ្លាំងណាស់ ដែលធ្វើអោយខួរក្បាលកុមារ និងយុវជនត្រូវបានប៉ះពាល់ ពីព្រោះថាខួរក្បាលរបស់ពួកគាត់កំពុងលូតលាស់ ប៉ុន្តែបើជក់អាណឹងហើយ គឺខួរក្បាលរបស់ពួកគាត់មិនអាចលូតលាស់ឡើយ»។
លោកវេជ្ជបណ្ឌិតបន្តថា៖«ដូច្នេះអាជ្ញាធរមានសមត្ថកិច្ចគ្រប់ជាន់ថ្នាក់ ត្រូវចាត់វិធានការតាមផ្លូវច្បាប់ ចំពោះអ្នកដែលបានផ្សព្វផ្សាយ និងលក់ផលិតផលបារីអេឡិចត្រូនិក ក៏ដូចជាផលិតផលអេចឈ៍ ធី ភី ឲ្យបានតឹងរឹងបំផុត ដើម្បីការពារសតិប្រាជ្ញាកុមារនិងយុវជនកុំឲ្យធ្លាក់ទៅក្នុងការញៀនបារីអេឡិចត្រូនិកនេះ»។
លោកបន្ថែមថា កន្លងមករាជរដ្ឋាភិបាលបានហាមឃាត់ ការនាំចូលនិងទប់ស្កាត់ការប្រើប្រាស់បារីអេឡិចត្រូនិកនេះតាំងពីឆ្នាំ២០០៤មកដល់ឆ្នាំ២០២១នេះរាជរដ្ឋាភិបាលបានហាមឃាត់ផលិតផលប្រហាក់ប្រហែលនឹងបារីអេឡិចត្រូនិកដែរ ប៉ុន្តែនៅតែមាករណីលក់តាមអនឡាញទៀត។
មន្ត្រីគម្រោងរបស់អង្គការសម្ព័ន្ធកម្ពុជាដើម្បីប្រយុទ្ធនឹងជំងឺឆ្លងដែលសុំមិនបញ្ចេញអត្តសញ្ញាណព្រោះបារម្ភពីសុវត្ថិភាពបាននិយាយថាលោកសង្កេតឃើញឈ្មួញនៅតែលក់បារីអេឡិចត្រូនិកតាមអនឡាញបើទោះបីជាអាជ្ញាធរហាមឃាត់ការចរាចរណ៍បារីទាំងនោះក៏ដោយ។
អង្គការសម្ព័ន្ធកម្ពុជាដើម្បីប្រយុទ្ធនឹងជំងឺឆ្លង៖«យើងដឹងថាមានការធ្វើចរាចរណ៍(បារីអេឡិចត្រូនិច)លើទីផ្សារអនឡាញ ប៉ុន្តែយើងមិនទាន់ឃើញមានចំណាត់ការណាមួយទេ»។
តាមយោងតាមការសិក្សាប្រមូលទិន្នន័យដោយ CDC នៃសហរដ្ឋអាមេរិក ចាប់ពីខែសីហា ឆ្នាំ២០១៩ ដល់ខែកុម្ភៈ ឆ្នាំ២០២០ បានបង្ហាញថាមានប្រជាជនអាមេរិកចំនួន ២៨០៧នាក់ បានឈឺ និង៦៨នាក់ បានបាត់បង់ជីវិត ដោយសារតែជំងឺសួត ដែលបណ្ដាលមកពីការប្រើប្រាស់បារីអេឡិចត្រូនិក៕
អគ្គស្នងការនគរបាលជាតិ កាលពីខែមិថុនានេះ បានដាក់បទបញ្ជាឱ្យនគរបាលសហការជាមួយអាជ្ញាធរទាំងអស់បន្តបង្ក្រាបការប្រើប្រាស់ផលិតផលស៊ីហ្សា និងបារីអេឡិចត្រូនិក ដែលកម្រើកឡើងវិញនៅក្នុងសង្គមកម្ពុជា។ បន្ទាប់ពីបទបញ្ជារបស់អគ្គស្នងការនគរបាលជាតិ អាជ្ញាធរបានបង្ក្រាបទីតាំងលក់បារីអេឡិចត្រូនិករាប់សិបកន្លែងនៅទួទាំងប្រទេសនិងរឹតអូសបានទំនិញរាប់ពាន់ដើម។ទោះជាយ៉ាងណាសង្គមស៊ីវិលនៅសង្កេតឃើញថា ឈ្មួញបានប្រើមធ្យោបាយដើម្បីលក់បារីអេឡិចត្រូនិកតាមអនឡាញវិញម្ដង៕ ដោយ៖ជាសុខនី
