សមាជិកអូតង់ប្រាំបួនប្រទេស ប្រកាសគាំទ្រសមាជិកភាពរបស់អ៊ុយក្រែន
អឺរ៉ុប៖សមាជិកអង្គការអូតង់ចំនួន ៩ប្រទេស បានចេញសេចក្តីថ្លែងការណ៍រួមមួយកាលពីថ្ងៃអាទិត្យ ទី២ តុលា ថ្កោលទោសការកាត់យកទឹកដីអ៊ុយក្រែនរបស់រុស្ស៊ី និងបានប្រកាសគាំទ្រសមាជិកភាពរបស់អ៊ុយក្រែននៅក្នុងអូតង់ទៀតផង។ ក្រៅពីនេះមេដឹកនាំនៃប្រទេសទាំង៩ ក៏បានអំពាវនាវដែរឱ្យសមាជិកទាំង ៣០របស់អូតង់ បង្កើនជំនួយយោធាដល់ទីក្រុងកៀវ។
មេដឹកនាំនៃប្រទេសឆែក អេស្តូនី ឡេតូនី លីទុយអានី ម៉ាសេដ្វានខាងជើង ម៉ុងតេណេហ្គ្រោ ប៉ូឡូញ រូម៉ានី និងស្លូវ៉ាគី បានចេញសេចក្តីថ្លែងការណ៍រួមដែលមានខ្លឹមសារថា៖ «យើង គាំទ្រអ៊ុយក្រែនក្នុងការការពារខ្លួន ប្រឆាំងទល់នឹងការឈ្លានពានរបស់រុស្ស៊ី និងទាមទារ(ឱ្យរុស្ស៊ី) ដកខ្លួនចេញជាបន្ទាន់ពីទឹកដីអ៊ុយក្រែន ហើយយើង លើកទឹកចិត្តសម្ព័ន្ធមិត្តទាំងអស់ ឱ្យបង្កើនជំនួយយោធាយ៉ាងច្រើនបន្ថែមទៀត សម្រាប់អ៊ុយក្រែន»។
សេចក្តីថ្លែងការណ៍ខាងលើ បានកត់សម្គាល់ដែរថា មេដឹកនាំនៃប្រទេសទាំងនេះ បានធ្វើទស្សនកិច្ចនៅទីក្រុងកៀវក្នុងអំឡុងសង្គ្រាម ហើយបានឃើញផ្ទាល់ភ្នែករបស់ពួកគេ ពីផលវិបាកកើតចេញពីទង្វើឈ្លានពានរបស់កងទ័ពរុស្ស៊ី។
ក្រោមហេតុផលនេះ មេដឹកនាំនៃសមាជិកអង្គការអូតង់ទាំង ៩ប្រទេស បានចេញមុខបញ្ជាក់ជាថ្មី នូវការគាំទ្ររបស់ពួកគេ ចំពោះអធិបតេយ្យភាព និងបូរណភាពទឹកដីរបស់អ៊ុយក្រែន និងប្រកាសមិនទទួលស្គាល់សោះឡើយ ចំពោះការប៉ុនប៉ងរបស់រុស្ស៊ី ក្នុងការបញ្ចូលទឹកដីអ៊ុយក្រែនណាមួយមកជាកម្មសិទ្ធិរបស់ខ្លួន។
គួររំឭកថា សេចក្តីប្រកាសគាំទ្រអ៊ុយក្រែនពីសំណាក់ប្រទេសសមាជិកអូតង់ទាំង៩ ធ្វើឡើងតែប៉ុន្មានថ្ងៃប៉ុណ្ណោះ ក្រោយការអំពាវនាវរបស់លោកប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី។ ដើម្បីជាការឆ្លើយតបទៅកាន់រស្ស៊ីដែលបានប្រកាសកាត់យកតំបន់ចំនួន ៤របស់អ៊ុយក្រែន លោក ហ្សេឡេនស្គី កាលពីថ្ងៃសុក្រ ទី៣០ កញ្ញា បាននិយាយថា អ៊ុយក្រែនដាក់ពាក្យសុំចូលជាសមាជិកអូតង់ និងស្នើសុំឲ្យអង្គការសន្ធិសញ្ញាអាត្លង់ទិកខាងជើងមួយនេះ ពន្លឿនដំណើរការចូលជាសមាជិករបស់អ៊ុយក្រែនផង។
គួរបញ្ជាក់ថា សមាជិកភាពក្នុងអង្គការអូតង់ ត្រូវការការយល់ព្រមពីសមាជិកទាំង ៣០ ប្រទេសរបស់អូតង់ ហើយត្រូវការពេលវេលាយូរ។ ដូច្នោះ ក្នុងកាលៈទេសសង្គ្រាម អ៊ុយក្រែនកាន់តែជួបភាពស្មុគស្មាញ ក្នុងដំណើរការសុំចូលជាចូលជាសមាជិកអូតង់ ដែលជាអង្គការដឹកមុខដោយអាមេរិកនេះ៕
ដោយ៖លី លីយ៉ា
ប្រភពព័ត៌មាន៖
- Presidents of 9 NATO countries support Ukraine’s membership and call for increased military assistance : edition.cnn.com
- 9 NATO members urge support for Ukraine after annexation: www.cnbc.com
