ដុងណៃ៖ ប្រធានរដ្ឋសភាវៀតណាមបានបញ្ជាឱ្យអ្នកវិនិយោគសាងសង់ផ្លូវល្បឿនលឿន ឈ្មោះថា « Ben Luc – Long Thanh Expressway» បញ្ចប់គម្រោងនេះ នៅឆ្នាំ២០២៤ ជំនួសឱ្យឆ្នាំ២០២៥ ដែលបានគ្រោងទុកនោះ។

ប្រធានរដ្ឋសភា លោក Vuong Dinh Hue ក្នុងពេលដឹកនាំគណៈប្រតិភូទៅពិនិត្យគម្រោងផ្លូវល្បឿនលឿន នៅខេត្តដុងណៃ (Dong Nai) ដែលមានព្រំប្រទល់ជាប់ទីក្រុងហូជីមិញ កាលពីពេលថ្មីៗនេះ បានមានប្រសាសន៍ថា “អង្គភាពពាក់ព័ន្ធគួរតែជំរុញវឌ្ឍនភាព ដើម្បីកាត់បន្ថយរយៈពេលសាងសង់មួយឆ្នាំ”។

កាលពីខែមិថុនា សាជីវកម្មផ្លូវល្បឿនលឿនវៀតណាម (VEC) ដែលជាអ្នកវិនិយោគគម្រោងបានស្នើសុំការអនុញ្ញាតពីរដ្ឋាភិបាលក្នុងការពន្យារពេលការបញ្ចប់គម្រោងពីឆ្នាំ ២០២៣ ដល់ត្រីមាសទីបីនៃឆ្នាំ ២០២៥ ។

ផ្លូវល្បឿនលឿននេះមានចម្ងាយ ៥៧.៧ គីឡូម៉ែត្ររវាងខេត្ត Long An ក្នុងតំបន់ដីសណ្តទន្លេមេគង្គ និង Dong Nai ហើយឆ្លងកាត់ទីក្រុងហូជីមិញ។ ពេលរួចរាល់ វានឹងវែងជាងគេនៅភាគខាងត្បូងវៀតណាម។

ការងារបានចាប់ផ្តើម លើគម្រោងក្នុងទំហំទឹកប្រាក់៣១ ពាន់ពាន់លានដុង (១.៣៤ ពាន់លានដុល្លារ) កាលពីឆ្នាំ ២០១៤ ហើយដំបូងឡើយ វាត្រូវបានកំណត់ថា នឹងបញ្ចប់ក្នុងរយៈពេល៥ ឆ្នាំ ប៉ុន្តែ បញ្ហាថវិកាបានពន្យារពេលវាច្រើនដង។

នៅក្នុងកិច្ចប្រជុំជាមួយប្រធានរដ្ឋសភា លោក Pham Hong Quang អគ្គនាយក VEC បាននិយាយថា កញ្ចប់សំណង់ជាច្រើនត្រូវបានជាប់គាំង ដោយសារអ្នកម៉ៅការបានបដិសេធមិនបន្តធ្វើការលើពួកគេ ដោយសារបញ្ហាមូលនិធិវិនិយោគ ទោះបីជាដំណើរការបោសសម្អាតទីតាំងត្រូវបានបញ្ចប់ ជាមូលដ្ឋានក៏ដោយ។

ទោះជាយ៉ាងណាក៏ដោយ ថ្មីៗនេះ គណៈកម្មការគ្រប់គ្រងដើមទុនរដ្ឋនៅសហគ្រាស (CMSC) បានយល់ព្រមឱ្យ VEC ប្រើប្រាស់ថ្លៃសេវាដែលខ្លួនបានប្រមូលជាបណ្ដោះអាសន្ន និងទុនបំរុងមួយចំនួនផ្សេងទៀត ដើម្បីសងបំណុលដែលខ្លួនជំពាក់អ្នកម៉ៅការ។
ដូច្នេះហើយ លោកប្រធានសភា Hue បាននិយាយថា បញ្ហាផ្តល់មូលនិធិ ដែលជាបញ្ហាប្រឈមដ៏ធំបំផុត ដូចដែលបានលើកឡើងដោយអ្នកវិនិយោគ ត្រូវបានដោះស្រាយដោយទុកចោល ដោយគ្មានហេតុផលសម្រាប់គម្រោងត្រូវពន្យារពេលបន្ថែមទៀត៕ ប្រភពពី VNexpress , ដោយ៖ សារ៉ាត