កណ្តាល ៖ មានករណីលិចទូកដមួយកន្លែងស្ថិតនៅចំណុច ទូកដទទឹង ក្នុងភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្តាល កាលពីព្រលប់ថ្ងៃទី១៣ ខែតុលា ឆ្នាំ២០២២នេះ ។ មន្ត្រីជំនាញបានឱ្យដឹងថា អ្នកជិះចំនួន ១៤នាក់ ។ខណ:នេះបាត់ខ្លួន ៨នាក់ ស្លាប់២ និសង្គ្រោះ ៤នាក់។

កម្លាំងអធិការដ្ឋាននគរបាលស្រុកលើដែក បានចុះសហការជាមួយ កម្លាំងប៉ុស្តិ៍រដ្ឋបាលកំពង់ភ្នំ ប្រជាការពារ និង ប្រជាពលរដ្ឋ ចុះស្វែងរក និង ជួយសង្គ្រោះ សិស្សសាលា បានចំនួន ៤នាក់( ស្រី១នាក់) ហើយបានបញ្ជូនទៅសង្គ្រោះតាមរថយន្តសង្រ្គោះ នៅមន្ទីរពេទ្យបង្អែកស្រុកលើកដែក ពេលទៅដល់មន្ទីរពេទ្យបានស្លាប់ចំនួន២នាក់ដោយមិនទាន់ស្គាល់អត្តសញ្ញាណពិតប្រាកដ ។

នៅយប់ថ្ងៃទី១៣ ខែតុលាលោកឧត្តមសេនីយ៍ទោ ឈឿន សុចិត្ត ស្នងការ នគរបាល ខេត្តកណ្ដាល បានដឹកនាំកម្លាំងចុះត្រួតពិនិត្យនិងជួយសង្គ្រោះករណីលិចទូកដទទឹង ដែលបានកើតហេតុកាលពីវេលាម៉ោង៧យប់ ស្ថិតនៅចំណុច ទូកដទទឹងស្ថិតនៅ ភូមិកោះចំរើន ឃុំកំពង់ភ្នំ ស្រុកលើកដែក។

លោកឧត្តមសេនីយ៍ទោ ឈឿន សុចិត្ត បានឱ្យដឹងថា ករណីលិចទូកដទទឹង នេះបាត់ខ្លួនសិស្សសាលា ប្រហែល ១៤ ទៅ ១៥ នាក់ ដែលមានទីលំនៅកន្លែង ភូមិ ឃុំកើតហេតុខាងលើ ។កម្លាំងអធិការដ្ឋាននគរបាលស្រុកលើដែកបានចុះសហការជាមួយ កម្លាំងប៉ុស្តិ៍រដ្ឋបាលកំពង់ភ្នំ ប្រជាការពារ និង ប្រជាពលរដ្ឋ ចុះស្វែងរក និង ជួយសង្គ្រោះ សិស្សសាលា បានចំនួន ៤នាក់ (ស្រី០១នាក់ )ហើយបានបញ្ជូនទៅសង្គ្រោះតាមរថយន្តសង្រ្គោះមន្ទីរពេទ្យបង្អែកស្រុកលើកដែកពេលទៅដល់មន្ទីរពេទ្យបានស្លាប់ចំនួន២នាក់ ដោយមិនទាន់ស្គាល់អត្តសញ្ញាណពិតប្រាកដ ។

ករណីនេះបណ្ដាលមកពី ម្ចាស់ទូកដាក់លើសចំណុះ ធ្វេសប្រហែស និងមិនប្រុងប្រយ័ត្ន ហើយគ្មានអាវពោង សម្រាប់ការពារ។ បច្ចុប្បន្ន កម្លាំងសមត្ថកិច្ច កំពុងតែបន្ត ស្វែងរក ដោយប្រើប្រាស់មធ្យោបាយទូកចំនួន ៥គ្រឿង៕ដោយ:ជឹម ភារ៉ា