រដ្ឋមន្ដ្រីក្រសួងកសិកម្មថ្មី បង្ហាញពីការបេ្តជ្ញាចិត្ត នៅមុនពិធីប្រកាសចូលកាន់តំណែងជាផ្លូវការនៅរសៀលថ្ងៃចន្ទទី១៧ ខែតុលា
ភ្នំពេញ៖ តាមកម្មវិធីដែលបានគ្រោងទុកជាផ្លូវ ក្រសួងកសិកម្ម រុក្ខាប្រមាញ់ និងនេសាទ នៅរសៀលថ្ងៃចន្ទ ទី១៧ ខែតុលានេះ នឹងរៀបចំពិធីផ្ទេរតំណែងរដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទនៅទីស្ដីការក្រសួង ក្រោមអធិបតីភាពឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ដ្រី រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ ដែលជាតំណាងប្រមុខរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ដ្រីកម្ពុជា។
ពិធីផ្ទេរតំណែងនេះ ធ្វើឡើងតែបីថ្ងៃប៉ុណ្ណោះបន្ទាប់ពីឯកឧត្តមត្រូវបានរដ្ឋសភាកម្ពុជា បោះឆ្នោតផ្តល់សេចក្តីទុកចិត្ត លើការបំពេញបន្ថែមសមាសភាពសមាជិកនៃរាជរដ្ឋាភិបាលដល់ឯកឧត្តម ឌិត ទីណា ជារដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទថ្មី ក្នុងសម័យប្រជុំរដ្ឋសភា លើកទី៨ នីតិកាលទី៦។ នៅរសៀលថ្ងៃដដែលនោះ ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រឹត្យតែងតាំងជារដ្ឋមន្ដ្រីថ្មីនៃក្រសួងកសិកម្ម ខណៈឯកឧត្តម វេង សាខុន អតីតរដ្ឋមន្ដ្រី ត្រូវបានព្រះមហាក្សត្រចេញព្រះរាជក្រឹត្យតែងតាំងជារដ្ឋមន្រ្តីប្រតិភូអមនាយករដ្ឋមន្រ្តី។
ទន្ទឹមនឹងព្រឹត្តិការណ៍នេះនារសៀលថ្ងៃទី១៤ ខែតុលា តាមរយៈបណ្ដាញសង្គមហ្វេសប៊ុកផ្លូវការរបស់ខ្លួនឯកឧត្តម ឌិត ទីណា បានសរសេរសារថ្លែងអំណរគុណដល់សម្តេចតេជោ ហ៊ុន សែន នាយករដ្ឋមន្ដ្រីកម្ពុជាដែលបានផ្តល់សេចក្តីទុកចិត្ត និងឱកាសឱ្យលោកបានបម្រើជាតិ និងមាតុភូមិ នៅក្នុងនាមជារដ្ឋមន្ដ្រីក្រសួងកសិកម្មរុក្ខាប្រមាញ់ និងនេសាទ។
លោកក៏បានថ្លែងអំណរគុណដល់សម្តេចចក្រីប្រធានរដ្ឋសភា អនុប្រធានរដ្ឋសភា និងគណៈកម្មាធិការអចិន្ត្រៃយ៍រដ្ឋសភា ដែលបានដាក់បញ្ចូលការបោះឆ្នោតផ្ដល់សេចក្ដីទុកចិត្តលើការបំពេញបន្ថែមសមាសភាពនៃរាជរដ្ឋាភិបាលដល់រូបលោកទៅក្នុងរបៀបវារៈនៃសម័យប្រជុំរដ្ឋសភា លើកទី៨ នីតិកាលទី៦។
រដ្ឋមន្ដ្រីថ្មីនៃក្រសួងកសិកម្ម ក៏បានថ្លែងអំណរគុណដល់សមាជិក សមាជិកា នៃរដ្ឋសភា ដែលផ្ដល់កិត្តិយសចូលរួមក្នុងការបោះឆ្នោតផ្ដល់សេចក្ដីទុកចិត្តដល់លោក ចូលជាសមាជិករាជរដ្ឋាភិបាលក្នុងនាមជារដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ ដោយសំឡេង ព្រម ចំនួន ១១១/១១១។ សម្រាប់ឯកឧត្តម ឌិត ទីណា ការបោះឆ្នោតយល់ព្រមពីសំណាក់អង្គសភាដ៏ឧត្តុង្គឧត្តម គាំទ្រដល់រូបលោក គឺជាការផ្ដល់កិត្តិយស និងការទទួលខុសត្រូវ ក៏ដូចជាកម្លាំងចិត្តយ៉ាងធំធេងដល់រូបខ្ញុំបាទ ដើម្បីបំពេញបេសកកម្មបម្រើប្រជាជន និងប្រជាជាតិ ក្នុងវិស័យកសិកម្ម រុក្ខាប្រមាញ់ និងនេសាទ។
នៅក្នុងសំណេរដាច់ដោយឡែកមួយទៀត ឯកឧត្តម ឌិត ទីណា ដែលមុនទទួលតំណែងជារដ្ឋមន្រ្តីក្រសួងកសិកម្ម រុក្ខាប្រមាញ់និងនេសាទ លោកជារដ្ឋលេខាធិការក្រសួងរ៉ែនិងថាមពលនោះ បានសរសេរសារថ្វាយនូវអំណរព្រះរាជគុណយ៉ាងជ្រាលជ្រៅ ចំពោះព្រះមហាក្សត្រកម្ពុជា ដែលទ្រង់ស្ដេចសព្វព្រះរាជហឫទ័យ ឡាយព្រះហត្ថលេខាលើព្រះរាជក្រឹត្យតែងតាំងរូបលោកជារដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ តាមសេចក្ដីក្រាបបង្គំទូលថ្វាយរបស់ប្រមុខរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ដ្រី។
ឯកឧត្តម ឌិត ទីណា បានបង្ហាញពីការប្ដេជ្ញាចិត្តដូច្នេះថា៖ «តបចំពោះព្រះរាជគុណូបការៈ និងព្រះព្រហ្មវិហារធម៌ ដ៏ខ្ពង់ខ្ពស់បំផុតរបស់ព្រះករុណាជាអម្ចាស់ជីវិត ទូលព្រះបង្គំសូមទូលថ្វាយនូវសេចក្ដីប្ដេជ្ញាចិត្តដ៏មោះមុត ក្នុងការការពារព្រះរាជបល្ល័ង្គនិងរបបរាជានិយមអាស្រ័យដោយរដ្ឋធម្មនុញ្ញ ក៏ដូចជាបំពេញភារកិច្ចរបស់ទូលព្រះបង្គំប្រកបដោយការទទួលខុសត្រូវខ្ពស់ ស្របទៅតាមពាក្យសច្ចាប្រណិធានជាធរមាន គឺគោរពរដ្ឋធម្មនុញ្ញ បម្រើជានិច្ច ទាំងក្នុងបច្ចុប្បន្ន ទាំងក្នុងអនាគត នូវផលប្រយោជន៍របស់ប្រជារាស្ត្រ ប្រជាជាតិ ដើម្បីឯកភាពជាតិ ដើម្បីសន្តិភាពសង្គមនិងសន្តិភាពជាតិ ដើម្បីភាពសម្បូរសប្បាយនៃប្រជារាស្ត្រកម្ពុជា និងដើម្បីភាពរុងរឿងថ្កើងថ្កាន នៃមាតុភូមិកម្ពុជាជាទីគោរពសក្ការៈ និងជាទីស្នេហា»៕ ដោយ៖ កែវ កិរិយា
