កាណាដា និងសហរដ្ឋអាមេរិក នឹងបញ្ជូនសម្ភារសន្តិសុខទៅឱ្យប្រទេសហៃទីដែលកំពុងញាំញីដោយវិបត្តិ
កាណាដា៖ប្រទេសកាណាដានិងសហរដ្ឋអាមេរិក បានបញ្ជូនសម្ភារសន្តិសុខទៅឱ្យប្រទេសហៃទី ដើម្បីជួយប្រទេសនេះដោះស្រាយវិបត្តិនយោបាយ សេដ្ឋកិច្ច និងជាពិសេសគឺវិបត្តិសន្តិសុខនៅក្នុងប្រទេស។ នេះបើតាមសេចក្ដីថ្លែងការណ៍រួមរបស់រដ្ឋាភិបាលកាណាដានិងអាមេរិក ចេញផ្សាយនៅថ្ងៃសៅរ៍ ទី១៥ ខែតុលា ឆ្នាំ២០២២។ សម្ភារគ្រឿងបរិក្ខាសន្តិសុខ ដែលរួមមាន ទាំងរថពាសដែកផងនោះ នឹងជួយដល់នគរបាលជាតិហៃទី ក្នុងការប្រយុទ្ធប្រឆាំងនឹងក្រុមឧក្រិដ្ឋជន ដែលបានបង្កអំពើហិង្សា និងចលាចលនៅក្នុងប្រទេស ក៏ដូចជាដើម្បីបញ្ឈប់ការរីករាលដាលនៃជំងឺអាសន្នរោគ ដែលបានអូសបន្លាយអស់រយៈពេលជាងមួយខែកន្លងមកហើយ។ នេះបើតាមសេចក្ដីថ្លែងការណ៍ដដែល។
អង្គការសុខភាព Pan American បានថ្លែងឱ្យដឹងកាលពីសប្តាហ៍មុនថា ជំងឺអាសន្នរោគកំពុងកើតឡើងវិញនៅក្នុងប្រទេសហៃទី ទាំងករណីដែលត្រូវបានបញ្ជាក់ថាវិជ្ជមាននិងសង្ស័យ។ ជិតមួយភាគបួនក្នុងចំណោមករណីឆ្លងជំងឺអាសន្នរោគនៅប្រទេសហៃទីនាពេលនេះ គឺកើតឡើងលើកុមារតូចៗ។ អង្គការដដែលបានលើកឡើងពីការលំបាករបស់អ្នកជំនាញ ក្នុងការចូលទៅផ្ដល់សេវាព្យាបាលសុខភាពដល់អ្នកជំងឺ ដោយសារតែអំពើហឹង្សាដែលកំពុងកើនឡើងពីមួយថ្ងៃទៅមួយថ្ងៃ។
បើតាមសេចក្ដីរាយការណ៍ គិតត្រឹមពេលនេះ មានអ្នកជំងឺសង្ស័យឆ្លងអាសន្នរោគជាង ៥៦០ករណី ក្នុងនោះមានអ្នកស្លាប់យ៉ាងហោចណាស់៣៥នាក់ និងអ្នកដែលកំពុងសម្រាកព្យាបាលនៅមន្ទីរពេទ្យមានប្រហែល ៣០០នាក់។ អ្នកជំនាញបានព្រមានថា ចំនួនករណីឆ្លងជំងឺអាសន្នរោគពិតប្រាកដ ទំនងជាខ្ពស់ជាងអ្វីរបាយការណ៍លើក្រដាសឆ្ងាយណាស់។
ជាការកត់សម្គាល់ ជំនួយគ្រឿងបរិក្ខាសន្តិសុខរបស់អាមេរិកនិងកាណាដា ដែលផ្តល់ដល់ប្រទេសនេះចំពេលដែលប្រទេសហៃទី ដែលជាប្រទេសក្រីក្របំផុតនៅទ្វីបអាមេរិក កំពុងប្រឈមមុខនឹងភាពចលាចលផ្នែកនយោបាយ និងក្រុមចម្រុះដែលរារាំងការចែកចាយប្រេងម៉ាស៊ូត និងប្រេងឥន្ធនៈ។ ការដឹកជញ្ជូនភាគច្រើនមិនអាចធ្វើទៅបានដោយការលួចប្លន់ និងការបាញ់ប្រហាររបស់ក្រុមក្មេងទំនើងមួយ ដឹកនាំដោយយុវជនម្នាក់ឈ្មោះ Jimmy Cherizier។
កាលពីសប្តាហ៍មុន ក្នុងបំណងបំបាត់អំពើហិង្សាបង្កឡើងដោយក្រុមទំនើង លោកនាយករដ្ឋមន្ដ្រីហៃទី Ariel Henry បានស្នើឱ្យសហគមន៍អន្តរជាតិបញ្ជូនជំនួយយោធាមកឱ្យហៃទី។ ប៉ុន្តែការអំពាវនាវរបស់លោកដូច្នេះបានបញ្ឆេះកំហឹងរបស់ពលរដ្ឋហៃទីបន្ថែមទៀត។ ពួកគេរាប់ពាន់នាក់បានចុះផ្លូវធ្វើបាតុកម្មប្រឆាំងនឹងលោកនាយករដ្ឋមន្ដ្រី Henry ដោយចាត់ទុកជំនួយយោធាពីបរទេសដល់ហៃទី ថាជាបើកដៃឱ្យបរទេសជ្រែតជ្រែកកិច្ចការផ្ទៃក្នុងរបស់ហៃទី។
នៅពាក់កណ្តាលខែកញ្ញា Jimmy Cherizier បានដឹកនាំក្រុមក្មេងទំនើងទៅឡោមព័ទ្ធស្ថានីយប្រេងឥន្ធនៈដ៏សំខាន់មួយរបស់ហៃទី ដើម្បីទាមទារឱ្យលោកនាយករដ្ឋមន្ត្រី Ariel Henry លាលែងពីតំណែង និងដើម្បីតវ៉ាចំពោះការកើនឡើងនៃតម្លៃប្រេងឥន្ធនៈ បន្ទាប់ពីរដ្ឋាភិបាលរបស់លោក Henry បានប្រកាសថា ខ្លួនមិនមានលទ្ធភាពផ្គត់ផ្គង់ប្រេងឥន្ធនៈបានទៀតទេ។
សារព័ត៌មានជាច្រើនបានរាយការណ៍ថា ក្រុមប្រឹក្សាសន្តិសុខអង្គការសហប្រជាជាតិកំពុងពិចារណាដាក់ទណ្ឌកម្មប្រឆាំងនឹង Cherizier និងអ្នកផ្សេងទៀត ដែលគំរាមកំហែងដល់សន្តិភាព សន្តិសុខ ឬស្ថិរភាពរបស់ប្រទេសហៃទី៕ ដោយ៖ កែវ កិរិយា
