បារាំង៖ មនុស្សរាប់ពាន់នាក់ចុះផ្លូវធ្វើបាតុកម្មនៅទីក្រុងបារីសដើម្បីតវ៉ាចំពោះការឡើងថ្លៃទំនិញ
បារាំង៖ប្រជាពលរដ្ឋបារាំងរាប់ពាន់នាក់បានចុះផ្លូវធ្វើបាតុកម្មនៅក្នុងទីក្រុងប៉ារីស នាថ្ងៃអាទិត្យ ទី១៦ ខែតុលា ឆ្នាំ២០២២ ដើម្បីធ្វើបាតុកម្មតវ៉ាប្រឆាំងនឹងការឡើងថ្លៃទំនិញ ទន្ទឹមនឹងការធ្វើកូដកម្មជាច្រើនសប្ដាហ៍ដើម្បីដំឡើងប្រាក់ឈ្នួលនៅរោងចក្រចម្រាញ់ប្រេង បានជំរុញឱ្យមានការទាមទារឱ្យមានកូដកម្មជាទូទៅ។
មេដឹកនាំគណបក្សឆ្វេងនិយម La France Insoumise (France Unbowed) លោក Jean-Luc Melenchon បានចុះផ្លូវធ្វើបាតុកម្មដោយមានវត្តមានម្ចាស់ពានរង្វាន់ណូបែលផ្នែកអក្សរសិល្ប៍ឆ្នាំ២០២២ គឺលោកស្រី Annie Ernaux ចូលរួមផង។ លោក Jean-Luc Malenchon បានអំពាវនាវឱ្យមានការធ្វើកូដកម្មទូទៅនៅថ្ងៃអង្គារសប្ដាហ៍នេះ។
ការអំពាវនាវរបស់លោក Malenchon ដូច្នេះ ធ្វើឡើងដោយដើរតាមគន្លងការតវ៉ារបស់សហជីពបួនផ្សេងទៀត ដែលធ្វើឡើងក្នុងរបៀបវារៈការពារសិទ្ធិធ្វើបាតុកម្ម បន្ទាប់ពីរដ្ឋាភិបាលបារាំងបានបញ្ជាឱ្យកម្មកររោងចក្រចម្រាញ់ប្រេងមួយចំនួន ស្នើសុំការអនុញ្ញាតជាមុនសិនមុននឹងធ្វើការប្រមូលផ្ដុំតវ៉ាណាមួយ។ បញ្ជារបស់រដ្ឋាភិបាលយ៉ាងដូច្នេះ គឺជាទង្វើដែលសហជីពចាត់ទុកថា ជាការរំលោភសិទ្ធិរដ្ឋធម្មនុញ្ញរបស់ពួកគេ។
ដោយឡែក អ្នកនាំពាក្យរដ្ឋាភិបាលបារាំង លោក Gabriel Attal បានលើកឡើងថា ក្រុមចម្រុះឆ្វេងនិយមកំពុងព្យាយាមកេងចំណេញពីស្ថានភាពបច្ចុប្បន្ន។ ស្ថានភាពនេះ លោកសំដៅដល់ការធ្វើបាតុកម្មនៅឯរោងចក្រនុយក្លេអ៊ែរ និងរោងចក្រចម្រាញ់ប្រេងរបស់បារាំង។ លោកបានថ្លែងតាមស្ថានីយវិទ្យុបារាំងអឺរ៉ុប១ថា៖ «ការចុះផ្លូវធ្វើបាតុកម្មថ្ងៃនេះ បង្ហាញពីជំហរតវ៉ារបស់អ្នកគាំទ្រ ដែលចង់បង្អាក់ដំណើរការទៅមុខរបស់ប្រទេសបារាំង»៕ ដោយ៖កែវ កិរិយា
