លោក ស៊ី អំពាវនាវឱ្យពន្លឿនវិស័យយោធា ក្នុងពិធីបើកសមាជបក្សកុម្មុនីស្តចិន
ចិន៖ប្រធានាធិបតីចិន លោក ស៊ី ជិនពីង បានអំពាវនាវកាលពីថ្ងៃអាទិត្យទី ១៦ ខែតុលា សុំឱ្យពន្លឿនការអភិវឌ្ឍវិស័យយោធាហើយប្រកាសមិនផ្លាស់ប្តូរគោលនយោបាយដែលបានធ្វើឱ្យទំនាក់ទំនងជាមួយទីក្រុងវ៉ាស៊ីនតោនកាន់តែតានតឹង និងរឹតបន្តឹងការគ្រប់គ្រងរបស់បក្សកុម្មុយនិស្តរបស់ខ្លួន។
លោក ស៊ី ប្រកាសបែបនេះ ក្នុងពិធីបើកសមាជបក្សកុម្មុនីស្តចិន ដែលប្រារព្ធឡើងដើម្បីរៀបចំរចនាសម្ព័ន្ធថ្នាក់ដឹកនាំរបស់ចិន និងត្រូវបានឃ្លាំមើលយ៉ាងដិតដល់ទាំងក្នុងស្រុក និងក្រៅស្រុក។
ប៉ុន្តែអ្វីដែលគួរឱ្យកត់សម្គាល់នោះគឺថា ការសុំឱ្យមានការពន្លឿនវិស័យយោធា ធ្វើឡើងបន្ទាប់ពីចិន ដែលជាប្រទេសមានសេដ្ឋកិច្ចធំជាងគេទី២នៅលើពិភពលោក ប្រឈមនឹងការធ្លាក់ចុះនៃកំណើនសេដ្ឋកិច្ច និងភាពតានតឹងជាមួយសហរដ្ឋអាមេរិក បណ្ដាប្រទេសជិតខាង និងកោះតៃវ៉ាន់ ជុំវិញបញ្ហាពាណិជ្ជកម្ម បច្ចេកវិទ្យា និងសន្តិសុខ។
លោក ស៊ី ដែលគេរំពឹងថានឹងបន្ដអាណត្តិទី៣របស់ខ្លួន ថ្លែងយ៉ាងដូច្នេះថា៖ «យើងនឹងធ្វើការឱ្យលឿនជាងមុន ដើម្បីធ្វើទំនើបកម្មទ្រឹស្តីយោធា បុគ្គលិកយោធា និងសព្វាវុធ។ យើងនឹងពង្រឹងសមត្ថភាពយុទ្ធសាស្ត្ររបស់យោធា»។
គួរគូសបញ្ជាក់ថា កន្លងមកនេះ ចិន ដែលចំណាយលើវិស័យយោធាធំជាងគេទី២លើពិភពលោកបន្ទាប់ពីសហរដ្ឋអាមេរិក កំពុងព្យាយាមពង្រីកលទ្ធភាពរបស់ខ្លួន ដោយការអភិវឌ្ឍមីស៊ីលផ្លោង នាវាផ្ទុកយន្តហោះ និងមូលដ្ឋានយោធានៅក្រៅប្រទេស។
ទន្ទឹមនឹងនេះ គណបក្សកុម្មុនីស្តចិនរបស់លោក ស៊ី បានបង្កើនការត្រួតត្រានៃឧស្សាហកម្មគ្រប់គ្រងដោយរដ្ឋ និងចំណាយថវិកាយ៉ាងច្រើនសន្ធឹកសន្ធាប់ ទៅក្នុងគំនិតផ្តួចផ្តើមជាយុទ្ធសាស្រ្ត ក្នុងគោលបំណងទំនុកបម្រុងអ្នកបង្កើតចិនលើវិស័យផ្សេងៗ ដូចជាថាមពលកកើតឡើងវិញ រថយន្តអគ្គិសនី បន្ទះឈីបកុំព្យូទ័រ លំហអាកាស និងបច្ចេកវិទ្យាផ្សេងទៀត។
ប៉ុន្តែយុទ្ធសាស្ត្ររបស់បក្សកុម្មុយនីស្តចិនបានជំរុញឱ្យមានការត្អូញត្អែរដែលថា ទីក្រុងប៉េកាំងការពារ និងផ្ដល់ឧបត្ថម្ភធនដល់អ្នកបង្កើតចិនតាមបែបមិនត្រឹមត្រូវ ដែលធ្វើឱ្យអតីតប្រធានាធិបតីអាមេរិក លោក ដូណាល់ ត្រាំ ដំឡើងពន្ធលើការនាំចូលពីចិនក្នុងឆ្នាំ ២០១៩ ។ លោក ចូ បៃដិន ដែលកាន់តំណែងបន្ទាប់ពីលោក ត្រាំ បានរក្សាការរឹតបន្តឹងទាំងនោះ ហើយចាប់ផ្ដើមបង្កើនការរឹតបន្តឹងលើការបិទចិន ពីការប្រើប្រាស់បច្ចេកវិទ្យាបន្ទះឈីបរបស់ខ្លួននៅក្នុងខែនេះ។
ទោះបីជាយ៉ាងនេះក៏ដោយ ផែនការរបស់បក្សកុម្មុនីស្តចិន បានអំពាវនាវឱ្យបង្កើតសង្គមរីកចម្រើនមួយនៅពាក់កណ្តាលសតវត្សនេះ និងស្ដារប្រទេសចិនឡើងវិញនូវតួនាទីជាប្រវត្តិសាស្ត្រជាប្រទេសដឹកនាំនយោបាយ សេដ្ឋកិច្ច និងវប្បធម៌។ សព្វថ្ងៃនេះ ក្រុងប៉េកាំងបានពង្រីកវត្តមានរបស់ខ្លួននៅក្រៅប្រទេស រួមទាំងគំនិតផ្តួចផ្តើមខ្សែក្រវាត់ និងផ្លូវ ដែលមានតម្លៃរាប់ពាន់លានដុល្លារ ដើម្បីសាងសង់កំពង់ផែ និងហេដ្ឋារចនាសម្ព័ន្ធផ្សេងទៀតនៅទូទាំងអាស៊ី និងអាហ្រ្វិក ប៉ុន្តែអ្នកសេដ្ឋកិច្ចព្រមានថា ការកែទម្រង់ទីផ្សារបញ្ច្រាសនេះ អាចរារាំងកំណើនរបស់ចិន៕
ដោយ៖ហួន ឌីណា ប្រភព៖ China’s Xi calls for military growth as party congress opens