បន្ទាប់ពីមនុស្សជិត២០នាក់បានស្លាប អ៊ូហ្គង់ដាប្រកាសបិទខ្ទប់តំបន់ផ្ទុះឆ្លងជំងឺអេបូឡា
អូហ្គង់ដា៖នៅប្រទេសអូហ្គង់ដា ជំងឺអេបូឡាបានសម្លាប់មនុស្សចំនួន ១៩នាក់ និងបានចម្លងបន្តទៅកាន់មនុស្ស ៥៨នាក់ផ្សេងទៀត ក្នុងរយៈពេលមិនដល់មួយខែ។ បើតាមអាជ្ញាធរសុខាភិបាល ជំងឺអេបូឡាបានរកឃើញនៅក្នុងប្រទេសអូហ្គង់ដា ជាលើកដំបូងកាលពីថ្ងៃទី២០ ខែកញ្ញាកន្លងទៅ។
ក្លឹបកម្សាន្តពេលរាត្រី កន្លែងទីសក្ការៈបូជា កម្លែងកម្សាន្តនិងកន្លែងប្រមូលផ្តុំមនុស្សច្រើន ក្នុងស្រុកចំនួនពីរនៃប្រទេសនេះគឺ ស្រុក Mubende និងស្រុកក្បែរខាង Kassanda នឹងត្រូវបិទចោលរយៈពេល២១ថ្ងៃ ដោយសារការផ្ទុះឆ្លងរាលដាលជំងឺអេបូឡា។នេះបើតាមការប្រកាសក្នុងសុន្ទរកថាបន្ទាន់មួយ នៅតាមទូរទស្សន៍របស់ប្រធានាធិបតីអ៊ូហ្គង់ដា លោក Yoweri Museveni កាលពីថ្ងៃទី១៥ ខែតុលា។
ចំណែកឯ ការធ្វើដំណើរចេញចូលស្រុកទាំងពីរខាងលើនេះ ក៏ត្រូវបានហាមឃាត់ លើកលែងតែឡានដឹកទំនិញតែប៉ុណ្ណោះ។ ប្រធានាធិបតីអ៊ូហ្គង់ដា លោក Yoweri Museveni បានបញ្ជាក់ឱ្យអាជ្ញាធរនិងប៉ូលិស ចាប់ខ្លួនបុគ្គលណា ដែលសង្ស័យនិងធ្លាប់មានទំនាក់ទំនងជាមួយអ្នកវិជ្ជមានជំងឺអេបូឡាហើយមិនព្រមដាក់ខ្លួនដាច់ដោយឡែក។
ក្រៅពីនេះ លោកប្រធានាធិបតីក៏បានប្រកាសហាមឃាត់ការប្រើប្រាស់ការរកវិធីបុរាណព្យាបាលជំងឺអេបូឡា ដោយសារការព្យាបាលបែបបុរាណត្រូវបានរកឃើញថា មានជាប់ទាក់ទងទៅនឹងការផ្ទុះឆ្លងជំងឺអេបូឡានេះ។
គិតមកដល់ពេលនេះ អូហ្គង់ដាមានអ្នកស្លាប់ដោយសារជំងឺអេបូឡាចំនួន ១៩នាក់ និង ៥៨នាក់កំពុងមានផ្ទុកជំងឺនេះ ខណៈមនុស្សជាច្រើនកំពុងស្ថិតនៅក្នុងការសង្ស័យ។ ទោះយ៉ាងណាក៏ដោយ តួលេខអ្នកស្លាប់និងអ្នកឆ្លង ត្រូវបានគេរំពឹងថា អាចនឹងមានខ្ពស់ជាងតួលេខដែលផ្តល់ដោយអាជ្ញាធរ។
ការប្រកាសដាក់ចេញវិធានការបន្ទាន់របស់លោក Yoweri Museveni នេះ គឺជាការរឿងដ៏គួរឱ្យភ្ញាក់ផ្អើល ព្រោះថាលោកប្រធានាធិបតីរូបនេះ កន្លងមក ធ្លាប់បានអះអាងថា គ្មានភាពចាំបាច់អ្វីក្នុងការដាក់ចេញវិធានការទប់ស្កាត់ចាំបាច់ដូចជំងឺកូវីដ១៩ឡើយ។
គួរជ្រាបថា អូហ្គង់ដា ធ្លាប់អះអាងមិនអនុវត្តវិធានការទប់ស្កាត់ជំងឺអេបូឡា តាំងតែមានករណីសង្ស័យ ដោយលើកឡើងថា វាជាជំងឺឆ្លងដ៏កម្រមួយប្រភេទ ពោលមិនមែនជាជំងឺអេបូឡាឡើយ។
ការប្រកាសបញ្ជាក់ពីការផ្ទុះជំងឺអេបូឡាលើកទី១នោះ គឺបន្ទាប់ពីមានអ្នកជំងឺស្លាប់លើកទីមួយ ក្នុងស្រុក Mubende កាលពីថ្ងៃទី២០ ខែកញ្ញា ឆ្នាំ២០២២ និងក្រោយមក សមាជិកគ្រួសារចំនួន ៦នាក់របស់អ្នកជំងឺនោះ បានស្លាប់ជាបន្តបន្ទាប់។
តាមអាជ្ញាធរ ការផ្ទុះឡើងជំងឺអេបូឡាបានចាប់ផ្តើមនៅដើមខែកញ្ញា បច្ចុប្បន្ននៅតែជាចំណុចផ្ទុះឆ្លងខ្លាំង នៅស្រុក Mubende មានចម្ងាយប្រហែល ៨០ គីឡូម៉ែត្រ ពី Kampala ទីក្រុងនៃប្រទេសអូហ្គង់ដា ដែលមានប្រជាជនរស់នៅប្រមាណ ១.៥លាននាក់។ រាជធានី Kampala នៅពុំទាន់ត្រូវបិទខ្ទប់នៅឡើយទេ ទោះបីជាបានរកឃើញករណីវិជ្ជមានអេបូឡាលើប្តីប្រពន្ធមួយគូក៏ដោយ។
គួរជ្រាបថា មេរោគអេបូឡានេះ ធ្វើការចម្លងពីមនុស្សទៅមនុស្ស តាមរយៈការប៉ះពាល់ដោយផ្ទាល់ជាមួយនឹងសារធាតុរាវចេញពីខ្លួនរបស់មនុស្សដែលមានផ្ទុកមេរោគដូចជាញើស ទឹកមាត់ ទឹករងៃ ឈាម លាមក ឬកំអួតជាដើម។
អ្នកឆ្លងអេបូឡា ជាមធ្យមក្នុងរវាង៥ថ្ងៃ អាចមានអការៈក្តៅខ្លួនខ្លាំង ហើយបាក់ស្រុតកម្លាំងមួយរំពេច អមជាមួយនឹងការឈឺចុកសាច់ដុំ ឈឺសន្លាក់ឆ្អឹង ឈឺក្បាលខ្លាំងនិងឈឺបំពង់ក។ ក្នុងករណីខ្លះ អ្នកផ្ទុកអាចនឹងដាច់សរសៃឈាមផង។ ហើយបើទោះសង្រ្គោះបានផុតពីស្លាប់ អ្នកផ្ទុកវា អាចមានបញ្ហាភ្នែក ឬត្រចៀក។ តាមអង្គការសុខភាពពិភពលោក (WHO) អត្រាមរណភាពនៃអ្នកកើតអេបូឡានោះមានចន្លោះពី ៤១ភាគរយ ទៅ ១០០ភាគរយ ខណៈថ្នាំវ៉ាក់សាំង កំពុងស្ថិតក្នុងដំណាក់កាលសាកល្បងនៅឡើយ៕ ដោយ៖បណ្តូល ពេជ្រ / CPA
