ពួក ហេកគ័រលួចចូលប្រើទិន្នន័យរបស់បណ្តាញទីភ្នាក់ងារថាមពលអាតូមិករបស់អ៊ីរ៉ង់
អឺរ៉ង់៖អង្គការថាមពលអាតូមិកអ៊ីរ៉ង់ (AEOI) បានអះអាងកាលពីថ្ងៃអាទិត្យទី២៣ ខែតុលានេះថា ពួកហេកគ័រ(Hacker)បានលួចចូលប្រើទិន្នន័យរបស់បណ្ដាញបុត្រសម្ព័ន្ធរបស់ខ្លួន ដោយធ្វើការប្រើប្រាស់ប្រព័ន្ធអ៊ីមែលដោយសេរី។
ការអះអាងនេះ ធ្វើឡើងបន្ទាប់ពីក្រុមហេកគ័រអនាមិកដែលឱ្យឈ្មោះខ្លួនឯងថា Black Reward បាននិយាយទទួលខុសត្រូវលើការលួចចូលប្រើទិន្នន័យនេះ ហើយអះអាងថា ខ្លួនបានបញ្ចេញរូបភាពនៃទីតាំងនុយក្លេអ៊ែររបស់អ៊ីរ៉ង់ និងព័ត៌មានអំពីអង្គការថាមពលបរមាណូរបស់អ៊ីរ៉ង់ យ៉ាងហោចណាស់ ៥០ ជីហ្គាបៃ។
ទោះបីជាយ៉ាងនេះក៏ដោយ AEOI មិនបានបង្ហាញពីការព្រួយបារម្ភថាទិន្នន័យដែលក្រុមហែកឃឺរចូលមើលសំខាន់ខ្លាំងប៉ុណ្ណានោះទេ។ ទីភ្នាក់ងារនុយក្លេអ៊ែរអ៊ីរ៉ង់នេះ និយាយក្នុងសេចក្ដីថ្លែងការណ៍យ៉ាងដូច្នេះថា៖ «ការចូលប្រើទិន្នន័យដោយគ្មានការអនុញ្ញាតពីប្រភពបរទេសជាក់លាក់មួយ ចំពោះប្រព័ន្ធអ៊ីមែលរបស់ក្រុមហ៊ុននេះ (ក្រុមហ៊ុនផលិត និងអភិវឌ្ឍន៍ថាមពលអាតូមិក) នាំឱ្យមានការចេញផ្សាយខ្លឹមសារនៃអ៊ីមែលមួយចំនួននៅលើប្រព័ន្ធផ្សព្វផ្សាយសង្គម»។ AEOI បន្ថែមថា អ៊ីមែលទាំងនោះមានសារបច្ចេកទេស ដែលប្រើក្នុងការទាក់ទងគ្នាប្រចាំថ្ងៃ។
AEOI បានលើកឡើងទៀតថា៖ «គោលបំណងនៃកិច្ចខិតខំប្រឹងប្រែងខុសច្បាប់បែបនេះ ធ្វើឡើងដើម្បីទាក់ទាញការចាប់អារម្មណ៍ពីសាធារណជន ដោយការបង្កើតឱ្យមានការផ្អើលគ្នាលើប្រព័ន្ធផ្សព្វផ្សាយ និងប្រតិបត្តិការផ្លូវចិត្ត»។
សូមបញ្ជាក់ថា ក្រុមហែកគ័រ Black Reward ក៏បានចេញផ្សាយផងដែរនូវអ្វីដែលខ្លួនហៅថា ជាព័ត៌មានលម្អិតអំពីអត្តសញ្ញាណនិងប្រាក់បៀវត្សរ៍របស់វិស្វករនិងនិយោជិតនៃក្រុមហ៊ុនផលិតនិងអភិវឌ្ឍន៍ថាមពលអាតូមិកអ៊ីរ៉ង់។ ក្រុមហេកគ័រដដែល ថែមទាំងបានទម្លាយព័ត៌មានលិខិតឆ្លងដែន និងទិដ្ឋាការរបស់អ្នកឯកទេសអ៊ីរ៉ង់ និងរុស្ស៊ី ដែលធ្វើការនៅក្នុងរោងចក្រថាមពលនុយក្លេអ៊ែរ Bushehr ទៀតផង។
ជុំវិញការលួចចូលប្រើទិន្នន័យនេះ ក្រុម Black Reward បានទាមទារឱ្យរដ្ឋាភិបាលទីក្រុងតេអេរ៉ង់ ដោះលែងអ្នកទោសនយោបាយ ដែលត្រូវបានចាប់ខ្លួនក្នុងការតវ៉ាទូទាំងប្រទេស ដែលផ្ទុះឡើងដោយសារការស្លាប់របស់នារីជនជាតិកួដវ័យ ២២ ក្រោមថ្វីដៃរបស់ប៉ូលីសសីលធម៌អ៊ីរ៉ង់ កាលពីពាក់កណ្ដាលខែកញ្ញា។ មកទល់ពេលនេះ បាតុកម្មតវ៉ាហាក់មិនស្រាកស្រាន្ត ខណៈរដ្ឋាភិបាលអ៊ីរ៉ង់ បានបើកការបង្រ្កាបផ្សេងៗទៅលើក្រុមបាតុករ រួមទាំងការចាប់ឃុំខ្លួនក្រុមបាតុករជាង ១២ ៥០០ នាក់ គិតត្រឹមសប្ដាហ៍មុន៕
ដោយ៖ហួន ឌីណា ប្រភព៖ Hackers Breach Iran’s Atomic Energy Subsidiary Network