លោក ចូ បៃដិន៖ រុស្ស៊ីនឹងប្រព្រឹត្តកំហុសដ៏ធ្ងន់ប្រសិនបើប្រើនុយក្លេអ៊ែរតាកតិកនៅអ៊ុយក្រែន
អាមេរិក៖ប្រធានាធិបតីសហរដ្ឋអាមេរិក លោក ចូ បៃដិន បានថ្លែងព្រមានកាលពីថ្ងៃអង្គារទី២៥ ខែតុលា ថា រុស្ស៊ីនឹងប្រព្រឹត្តកំហុសដ៏ធ្ងន់ធ្ងរ ប្រសិនបើប្រទេសនេះប្រើអាវុធនុយក្លេអ៊ែរតាកតិកនៅអ៊ុយក្រែន ដើម្បីយកឈ្នះសង្រ្គាមឈ្លានពាន ដែលអូសបន្លាយតាំងពីខែចុងកុម្ភៈ។
ការព្រមានជាថ្មីនេះធ្វើឡើងបន្ទាប់ពីរុស្ស៊ីអះអាងថា អ៊ុយក្រែនកំពុងរៀបចំប្រើគ្រាប់បែកស្មោកគ្រោក ក្នុងការចោទប្រកាន់ដែលលោកខាងលិច ក៏ដូចជារដ្ឋាភិបាលក្រុងកៀវផ្ទាល់ បានច្រានចោលយ៉ាងដាច់អហង្ការហើយវាយបកទៅរុស្ស៊ីវិញថាប្រើវិធីសាស្រ្តបំភាន់ដើម្បីយកលេសបង្កើនភាពតានតឹងនៃសង្រ្គាម និងបន្ថែមប្រតិបត្តិការវាយប្រហារអ៊ុយក្រែន (ឬគេហៅថា ប្រតិបត្តិការទង់ក្លែងក្លាយ)។ នាពេលនេះ រដ្ឋបាលលោកបៃដិន កំពុងតែធ្វើការលើរឿងនេះ ដើម្បីដាក់សម្ពាធលើក្រុងម៉ូស្គូ។
លោក បៃដិន បានថ្លែងយ៉ាងដូច្នេះនៅសេតវិមានថា៖ «ខ្ញុំគ្រាន់តែនិយាយថា រុស្ស៊ីនឹងប្រព្រឹត្តកំហុសដ៏សែនធ្ងន់ធ្ងរ ប្រសិនបើប្រើអាវុធនុយក្លេអ៊ែរតាកតិក។ ខ្ញុំមិនអាចទាន់ធានាថាវាជាប្រតិបត្តិការទង់ក្លែងក្លាយនៅឡើយទេ។ យើងមិនដឹង។ វានឹងជាកំហុសដ៏សែនធ្ងន់ធ្ងរ[របស់រុស្ស៊ី]»។
សូមបញ្ជាក់ថា រុស្ស៊ីបានអះអាងដោយមិនផ្ដល់ភស្តុតាងឱ្យប្រាកដជាក់លាក់ នៅសប្ដាហ៍នេះថា មានស្ថាប័នវិទ្យាសាស្ត្រក្នុងប្រទេសអ៊ុយក្រែន បំពាក់បច្ចេកវិទ្យាដែលត្រូវការដើម្បីបង្កើតគ្រាប់បែកស្មោកគ្រោក ដើម្បីយកវាប្រើប្រាស់ ដោយបន្សាយកាកសំណល់វិទ្យុសកម្ម ជីវសាស្រ្ត ឬគីមី លើតំបន់ណាមួយនៃសមរភូមិ។
ខណៈមានការច្រានចោលយ៉ាងដាច់អហង្ការពីអ៊ុយក្រែន និងសម្ព័ន្ធមិត្ត មន្ត្រីអាមេរិកបានអះអាងថា ខ្លួនមិនឃើញមានភ័ស្តុតាងដែលបង្ហាញថា បច្ចុប្បន្ននេះ រុស្ស៊ីកំពុងរៀបចំ ឬសម្រេចចិត្តប្រើប្រាស់អាវុធមិនធម្មតា ដូចជាគ្រាប់បែកស្មោកគ្រោក នៅលើសមរភូមិក្នុងប្រទេសអ៊ុយក្រែននោះទេ។
ប៉ុន្តែវោហាសាស្ត្ររបស់រុស្ស៊ី ដែលរងការចោទប្រកាន់ថាជាលេសបង្កើនភាពតានតឹងនៃសង្រ្គាមនៅអ៊ុយក្រែន បានបង្កឱ្យមានការព្រួយបារម្ភយ៉ាងខ្លាំងថា រុស្ស៊ីអាចនឹងធ្វើអ្វីដែលខ្លួនឯងចោទអ៊ុយក្រែន រួមទាំងការប្រើប្រាស់អាវុធនុយក្លេអ៊ែរតាកតិក។ ប៉ុន្មានម៉ោងមុនការថ្លែងព្រមានចុងក្រោយរបស់លោក បៃដិន អ៊ុយក្រែនបានចោទប្រកាន់រុស្ស៊ីពីបទបង្កើតគ្រាប់បែកស្មោកគ្រោកដោយសម្ងាត់ខ្លួនឯង ក្នុងរោងចក្រថាមពលនុយក្លេអ៊ែរអ៊ុយក្រែនហ្សាប៉ូរីចា ដែលកងទ័ពឈ្លានពានរុស្ស៊ីកំពុងកាន់កាប់។
បន្ថែមពីនេះ ដើម្បីបង្ហាញពីភាពស្អាតស្អំ និងតម្លាភាពរបស់ខ្លួន អ៊ុយក្រែនបានស្នើឱ្យទីភ្នាក់ងារថាមពលបរមាណូអន្តរជាតិ (IAEA) របស់អង្គការសហប្រជាជាតិ ទៅមើលកន្លែងដែលរុស្ស៊ីអះអាងថាអ៊ុយក្រែនរៀបចំគ្រាប់បែកស្មោកគ្រោក។ ពេលនេះ IAEA កំពុងរៀបចំចុះទៅមើលដល់កន្លែង ប៉ុន្តែបានអះអាងនៅថ្ងៃអង្គារថា ការចុះត្រួតពិនិត្យរបស់ខ្លួនជាប្រចាំនាពេលកន្លងមក មិនមានឃើញដូចអ្វីដែលរុស្ស៊ីចោទប្រកាន់អ៊ុយក្រែននោះទេ៕
ដោយ៖ហួន ឌីណា ប្រភព៖ Biden warns Russia not to use a tactical nuclear weapon
