ប្រធានទីភ្នាក់ងារថាមពលសកលជំរុញឱ្យអាស៊ីអាគ្នេយ៍រៀនពីកំហុសរបស់អឺរ៉ុបនៅក្នុងវិបត្តិថាមពល
អឺរ៉ុប៖ប្រធានទីភ្នាក់ងារថាមពលអន្តរជាតិ (IEA) លោក Fatih Birol បានព្រមានថា អាស៊ីអាគ្នេយ៍ងាយរងគ្រោះដោយវិបត្តិថាមពលដោយសារតែកំណើនយ៉ាងឆាប់រហ័សនៃតម្រូវការក្នុងតំបន់ហើយគួរតែធ្វើពិពិធកម្មប្រភពថាមពល ដែលមានន័យថាត្រូវពឹងផ្អែកលើប្រភពថាមពលផ្សេងៗគ្នា។
លោក Birol បានថ្លែងប្រាប់សារព័ត៌មានសិង្ហបុរី CNA កាលពីថ្ងៃអង្គារទី ២៥ ខែតុលាថា អាស៊ីអាគ្នេយ៍គួររៀនពីវិបត្តិដែលកំពុងកើតឡើងនៅអឺរ៉ុប ដោយសារតែការពឹងផ្អែកខ្លាំងលើថាមពលរបស់រុស្ស៊ី ដែលធ្វើឱ្យខ្លួនប្រឈមមុខនឹងការចំណាយខ្ពស់ និងបញ្ហាផ្គត់ផ្គង់លើថាមពល។
លោកថ្លែងយ៉ាងដូច្នេះថា៖ «អឺរ៉ុបបានធ្វើកំហុសមួយ ទោះបីជា IEA បានគូសបញ្ជាក់ និងព្រមានជាច្រើនឆ្នាំមកហើយថា មិនគួរពឹងផ្អែកលើប្រភពផ្គត់ផ្គង់ដ៏សំខាន់តែមួយសម្រាប់អ្វីក៏ដោយ។ ហ្គាស និងប្រេងភាគច្រើន [ដែលអឺរ៉ុបនាំចូល] មានប្រភពសំខាន់តែមួយគត់ គឺរុស្ស៊ី»។
គួរបញ្ជាក់ថា សហភាពអឺរ៉ុបកំពុងតែជួបនឹងវិបត្តិថាមពលធ្ងន់ធ្ងរ ដោយសារតែការផ្គត់ផ្គង់របស់រុស្ស៊ីធ្លាក់ចុះ។ វិបត្តិនេះ ផ្ដើមចេញពីទណ្ឌកម្មបិទការនាំចូលប្រេងរបស់ប្លុកប្រឆាំងរុស្ស៊ីចំពោះការឈ្លានពានអ៊ុយក្រែន និងការផ្អាកការផ្គត់ផ្គង់ហ្គាសរបស់ក្រុងម៉ូស្គូ ដែលអឺរ៉ុបចោទថាជាការយកថាមពលធ្វើជាអាវុធគំហែងកំហែងប្លុករបស់ខ្លួន។ បច្ចុប្បន្ននេះ អឺរ៉ុបកំពុងតែប្រវេប្រវា ស្វែងរកប្រភពថាមពលជំនួសរុស្ស៊ី។
អ្វីដែលសំខាន់ជាងនេះទៀតនោះ លោក Birol បានបន្ថែមថា អាស៊ីអាគ្នេយ៍គួរតែវិនិយោគបន្ថែមទៀតលើថាមពលស្អាត ដើម្បីកាត់បន្ថយការពឹងផ្អែករយៈពេលវែងរបស់ខ្លួនលើឥន្ធនៈហ្វូស៊ីល ដែលងាយនឹងបង្កើតបញ្ហាប្រឈម ដោយសារតែការប្រែប្រួលនៃតម្លៃ និងឥទ្ធិពលអាក្រក់លើសេដ្ឋកិច្ច។
លោក Birol បានគូសបញ្ជាក់ថា៖ «វា (ឥន្ធនៈហ្វូស៊ីល) គ្រប់គ្រងដោយក្រុមហ៊ុននាំចេញថាមពលធំៗមួយចំនួន ហើយដោយសារតែហេតុផលនយោបាយ ឬហេតុផលផ្សេងទៀត ក្រុមហ៊ុនទាំងនោះអាចនឹងផ្លាស់ប្តូរចិត្តរបស់ពួកគេ ដោយបង្កើនតម្លៃ។ ហើយសេដ្ឋកិច្ចរបស់អ្នក នឹងងាយរងគ្រោះទាំងស្រុងចំពោះតម្លៃខ្ពស់»។
ប្រធាន IEA ដែល បានបន្តថា ដំណោះស្រាយដ៏ល្អបំផុតក្នុងកាលៈទេសៈបែបនេះ គឺការងាកទៅរកជម្រើសថាមពលស្អាត ដូចជាថាមពលពន្លឺព្រះអាទិត្យ ថាមពលវារីអគ្គិសនី និងជីវថាមពល និងការប្រើប្រាស់យានយន្តដូចជារថយន្តអគ្គិសនីជាដើម។
លោកបន្ថែមថា ការប្រើប្រាស់ថាមពលស្អាត មិនត្រឺមតែជួយលើការផ្គត់ផ្គត់ប្រភពថាមពលប៉ុណ្ណោះទេ ប៉ុន្តែវាក៏ជួយដល់ការប្តេជ្ញាចិត្តប្រយុទ្ធប្រឆាំងនឹងការប្រែប្រួលអាកាសធាតុ និងជំរុញដំណោះស្រាយថាមពលស្អាតសម្រាប់ហេតុផលគោលនយោបាយឧស្សាហកម្មផងដែរ៕
ដោយ៖ហួន ឌីណា ប្រភព៖ Southeast Asia should diversify energy sources, learn from Europe’s Russian ‘mistake’: Global agency chief
