រុស្ស៊ីគំរាមវាយប្រហារផ្កាយរណបពាណិជ្ជកម្មបស្ចិមលោក ខណៈដែល លោក អេឡុន ម៉ាស់កំពុងជួយអ៊ុយក្រែនលើសេវាអ៊ីនធឺណិត
រុស្ស៊ី៖មន្ត្រីក្រសួងការបរទេសរុស្ស៊ីជាន់ខ្ពស់ម្នាក់គំរាមថា ផ្កាយរណបពាណិជ្ជកម្មរបស់សហរដ្ឋអាមេរិក និងសម្ព័ន្ធមិត្តអាចក្លាយជាគោលដៅវាយប្រហារដោយ «ស្របច្បាប់» សម្រាប់រុស្ស៊ី ប្រសិនបើប្រទេសទាំងនោះប្រើវាក្នុងសង្គ្រាមនៅអ៊ុយក្រែន។
អនុប្រធាននាយកដ្ឋានសម្រាប់ការមិនរីកសាយភាយ និងការគ្រប់គ្រងអាវុធនៃក្រសួងការបរទេសរុស្ស៊ីលោក កុនស្តាទីន វូរ៉ុនសូវ(Konstantin Vorontsov) បានប្រាប់អង្គការសហប្រជាជាតិ(អ.ស.ប)នៅថ្ងៃព្រហស្បតិ៍ ទី ២៧ ខែតុលានេះថា សហរដ្ឋអាមេរិក និងសម្ព័ន្ធមិត្ត កំពុងព្យាយាមប្រើប្រាស់ទីអវកាស ដើម្បីពង្រឹងការគ្រប់គ្រងរបស់លោកខាងលិច។
លោក វូរ៉ុនសូវ(Vorontsov) បានបន្តថា ការប្រើប្រាស់ផ្កាយរណបលោកខាងលិច ដើម្បីជួយដល់កិច្ចខិតខំប្រឹងប្រែងលើសមរភូមិសង្រ្គាមរបស់អ៊ុយក្រែន គឺជានិន្នាការដ៏គ្រោះថ្នាក់បំផុត។ លោកប្រាប់ទៅគណៈកម្មាធិការទី១នៃអ.ស.ប យ៉ាងដូច្នេះថា៖ «ហេដ្ឋារចនាសម្ព័ន្ធពាក់កណ្តាលស៊ីវិលនេះ អាចក្លាយជាគោលដៅសម្រាប់ការវាយប្រហារសងសឹកដោយស្របច្បាប់» របស់រុស្ស៊ី ហើយការប្រើប្រាស់ផ្កាយរណបបែបនេះដើម្បីគាំទ្រអ៊ុយក្រែនគឺជា «ការបង្កហេតុ»។
មន្ត្រីក្រសួងការបរទេសរុស្ស៊ីដដែលបានថ្លែងទៀតថា៖ «យើងកំពុងនិយាយអំពីការយកហេដ្ឋារចនាសម្ព័ន្ធអវកាសស៊ីវិល (ប្រព័ន្ធផ្កាយរណប) រួមទាំងផ្កាយរណបពាណិជ្ជកម្ម ប្រើប្រាស់ ដោយអាមេរិក និងសម្ព័ន្ធមិត្តរបស់ខ្លួនក្នុងជម្លោះប្រដាប់អាវុធ»។
ទោះបីជាយ៉ាងនេះក៏ដោយលោក Vorontsov មិនបានបង្ហាញផ្កាយរណបរបស់ប្រទេសណាមួយជាក់លាក់នោះទេ ទោះបីជាលោក អេឡុន ម៉ាស់(Elon Musk) ដែលជាមហាសេដ្ឋីអាមេរិក បានអះអាងកាលពីដើមខែតុលានេះថា ក្រុមហ៊ុនវិស្វកម្មយានអវកាស SpaceX របស់លោក នឹងបន្តផ្តល់មូលនិធិសេវាអ៊ីនធឺណិត Starlink ដល់អ៊ុយក្រែន។
គួរបញ្ជាក់ថា ការថ្លែងគំរាមរបស់លោក Vorontsov ធ្វើឡើងស្របពេលដែលមន្រ្តីរុស្ស៊ីបង្កើនវោហាសាស្រ្តដើម្បីភាពតានតឹងនៃសង្រ្គាមរបស់ខ្លួន បន្ទាប់គំរាមកំហែងប្រើអាវុធនុយក្លេអ៊ែរប្រឆាំងនឹងអ៊ុយក្រែនកាលពីប៉ុន្មានសប្ដាហ៍មុន ហើយប៉ុន្មានថ្ងៃចុងក្រោយ រុស្ស៊ីក៏បានបង្កើនការឃោសនារបស់ខ្លួន ដោយចោទអ៊ុយក្រែនទាំងគ្មានមូលដ្ឋានច្បាស់លាស់ថា កំពុងរៀបចំប្រើប្រាស់គ្រាប់បន្សាយសារធាតុវិទ្យុសកម្ម ប៉ុន្តែត្រូវបានលោកខាងលិច ក៏ដូចជាអ៊ុយក្រែនផ្ទាល់ច្រានចោល ហើយចោទរុស្ស៊ីវិញថា ជាអ្នករៀបចំផែនការនេះដោយខ្លួនឯង។
យ៉ាងណាមិញ គិតត្រឹមល្ងាចថ្ងៃព្រហស្បតិ៍នេះ មិនទាន់មានប្រតិកម្មយ៉ាងណានៅឡើយទេពីលោកខាងលិច។ ប៉ុន្តែអ្វីដែលសំខាន់នោះគឺថា រុស្ស៊ីគឺជាដៃគូប្រកួតប្រជែងដ៏ធំបំផុតមួយរបស់ពិភពលោក ហើយនៅក្នុងឆ្នាំ ២០២១ ប្រទេសនេះបានបាញ់បង្ហោះមីស៊ីលប្រឆាំងផ្កាយរណប ដើម្បីបំផ្លាញផ្កាយរណបមួយរបស់ខ្លួន ដែលជាការបង្ហាញមួយនៃភាពខ្លាំងអវកាសរបស់ក្រុងម៉ូស្គូ៕ ដោយ៖ ហួន ឌីណា
