ព្យុះត្រូពិកវាយប្រហារប្រទេសហ្វីលីពីន សម្លាប់មនុស្សអស់យ៉ាងហោចណាស់៧២នាក់
ហ្វីលីពីន៖នៅប្រទេសហ្វីលីពីនខ្យល់ព្យុះត្រូពិកដ៏ខ្លាំងក្លាមួយ ឈ្មោះ Nalgae បានបោកបក់ទៅលើប្រទេសនេះនៅថ្ងៃសៅរ៍ ទី២៨ ខែតុលានេះ និងបាននាំទៅជាមួយនូវទឹកជំនន់យ៉ាងគំហុកបង្កឱ្យមានការរអិលបាក់ដី ដែលបានឆក់យកជីវិតមនុស្សអស់ចំនួន៧២នាក់។ នេះបើតាមរបាយការណ៍បឋមពីអាជ្ញាធរហ្វីលីពីន។
Nalgae បានចាប់ផ្ដើមបោកបក់ទៅលើកោះ Luzon ដែលជាកោះដ៏សំខាន់មួយរបស់ហ្វីលីពីន ដោយមានកម្លាំងខ្យល់បក់អតិបរមា ៩៥គីឡូម៉ែត្រ នៅក្នុងមួយម៉ោង។ មុននឹងព្យុះនេះធ្វើដំណើរមកដល់នៅថ្ងៃសៅរ៍ វាបានជះចំហាយឥទ្ធិពលមកមុនជាបន្តបន្ទាប់ ដូចជាបង្កឱ្យមានភ្លៀងធ្លាក់ខ្លាំងតាំងពីថ្ងៃព្រហស្បតិ៍ ទី២៧ ខែតុលា នៅភាគខាងត្បូងប្រទេសហ្វីលីពីន និងបានបង្កជាការជន់លិចតំបន់ជនបទភាគច្រើននៅលើកោះមីនដាណាវ។
ក្រៅពីការជន់លិច ក៏មានផងដែរ ការបាក់ដីដែលបង្កផលប៉ះពាល់នៅក្នុងតំបន់ជាច្រើន និងបានបំផ្លាញផ្ទះសម្បែងប្រជាពលរដ្ឋជិត៥០០ខ្នង។
នាយកដ្ឋានការពារជនស៊ីវិលរបស់ហ្វីលីពីន លោក Rafaelito Alejandro បានឱ្យដឹងថា គិតត្រឹមថ្ងៃសៅរ៍ ទី២៩ ខែតុលានេះ ចំនួនអ្នកស្លាប់ដោយសារតែខ្យល់ព្យុះត្រូពិក Nalgae បានកើនឡើងដល់ចំនួន៧២នាក់ហើយ ខណៈមនុស្ស១៤នាក់ទៀតកំពុងបាត់ខ្លួន ចំណែកចំនួនអ្នករងរបួសមាន៣៣នាក់។ បើតាមប្រភពអាជ្ញាធរដដែល ក្រុមអ្នកជួយសង្គ្រោះកំពុងដាក់អាទិភាពការងាររបស់ខ្លួននៅឯភូមិ Kuusiong ជាកន្លែងដែលគេរកឃើញសាកសពរាប់សិបនាក់ដែលស្លាប់ដោយសារគ្រោះទឹកជំនន់ នៅថ្ងៃសុក្រ។
ទីភ្នាក់ងារព្យាករណ៍អាកាសធាតុរបស់ហ្វីលីពីន បានទាញសញ្ញាអាសន្នថា ខ្យល់ព្យុះត្រូពិក នឹងអាចវាយប្រហាររដ្ឋធានីម៉ានីល ដែលជាទីប្រជុំជនដ៏ធំមួយ មានប្រជាជនរស់នៅជាង១៣លាននាក់។ ដើម្បីឆ្លើយតបទៅនឹងការព្យាករណ៍នេះ អាជ្ញាធរបានត្រៀមកម្លាំងសង្គ្រោះបន្ទាន់ចំនួន ៥ពាន់នាក់ ដើម្បីជួយសង្គ្រោះប្រជាជនទៅតាមការចាំបាច់។ លោក Rafaelito Alejandro បានទទូចស្នើសុំឱ្យប្រជាជនដែលរស់នៅក្នុងតាមបណ្ដោយឆ្នេរនៅតំបន់សមុទ្រចិនខាងត្បូង ត្រូវសម្ងំនៅក្នុងផ្ទះ ពេលព្យុះនេះធ្វើដំណើរទៅដល់នៅព្រឹកថ្ងៃអាទិត្យ ដើម្បីបង្ការគ្រោះថ្នាក់ផ្សេងៗជាយថាហេតុ។
បន្ថែមពីលើផលប៉ះពាល់ដល់ប្រជាជន ការបោកបក់របស់ខ្យល់ព្យុះត្រូពិក Nalgae បានបង្ខំឱ្យឆ្មាំសមុទ្រហ្វីលីពីន ផ្អាកសេវាកម្មសាឡាងឆ្លងកាត់ប្រជុំកោះជាច្រើន ដែលជាលទ្ធផល វាបានធ្វើឱ្យអ្នកដំណើររាប់ពាន់នាក់ត្រូវជាប់គាំងនៅកំពង់ផែ។ ចំណែកជើងហោះហើរជាង១០០ត្រូវផ្អាកជាបណ្ដោះអាសន្ន។
សូមជម្រាបថា ប្រទេសហ្វីលីពីនរងការវាយប្រហារដោយព្យុះធំៗយ៉ាងហោចណាស់ ២០ជារៀងរាល់ឆ្នាំ ដែលសម្លាប់មនុស្សអស់រាប់រយនាក់ ភាគច្រើននៅតំបន់ប្រជុំជនក្រីក្រ។ អ្នកវិទ្យាសាស្ត្របានព្រមានថា ខ្យល់ព្យុះដែលមានកម្លាំងខ្លាំង អាចសម្លាប់សត្វពាហនៈ និងបំផ្លាញហេដ្ឋារចនាសម្ព័ន្ធសំខាន់ៗផងនោះ នឹងកាន់តែមានឥទ្ធិពលខ្លាំងឡើង នៅពេលដែលពិភពលោកកាន់តែឡើងកម្ដៅ ដោយសារតែការប្រែប្រួលអាកាសធាតុ៕ ដោយ៖កែវ កិរិយា
