នៅហ្វីលីពីន៖ ចំនួនអ្នកស្លាប់ដោយសារខ្យល់ព្យុះ Nalgae កើនឡើងដល់ចំនួន៩៨នាក់
ហ្វីលីពីន៖ទីភ្នាក់ងារគ្រប់គ្រងគ្រោះមហន្តរាយហ្វីលីពីន បានរាយការណ៍ឱ្យដឹងថា ចំនួនអ្នកស្លាប់ដោយសារតែខ្យល់ព្យុះ Nalgae បានកើនឡើងដល់ចំនួន៩៨នាក់ហើយ។ បើតាមទីភ្នាក់ងារដដែលនៅថ្ងៃចន្ទ ទី៣១ខែតុលានេះ លោកប្រធានាធិបតីហ្វីលីពីន Ferdinand Marcos Jr. បានធ្វើដំណើរទៅកាន់តំបន់ដែលរងការវាយប្រហារដោយខ្យល់ព្យុះនេះ ដើម្បីពិនិត្យមើលការខូចខាតនានា តាមរយៈការជិះពិនិត្យមើលពីលើអាកាសដោយឧទ្ធម្ភាគចក្រ ខណៈតំបន់រងគ្រោះដោយខ្យល់ព្យុះ Nalgae ទាំងអស់កំពុងតែជន់លិចដោយជំនន់ទឹកភ្លៀង។ បើតាមសេចក្ដីរាយការណ៍ដដែល ក្រៅតែពីចំនួនអ្នកស្លាប់ ក៏មានផងដែរអ្នករងរបួសចំនួន ៦៩នាក់ និង ៦៣នាក់ទៀតកំពុងបាត់ខ្លួន។
ខ្យល់ព្យុះត្រូពិក Nalgae មិនត្រឹមតែបង្កគ្រោះថ្នាក់ដល់អាយុជីវិតមនុស្សប៉ុណ្ណោះទេ ប៉ុន្តែវាក៏បានបោកបក់ធ្វើឱ្យខូចខាតហេដ្ឋារចនាសម្ព័ន្ធជាច្រើន ដែលមានតម្លៃរហូតដល់ទៅជាង ៧៥៨លានប៉េសូ ឬស្មើនឹងប្រមាណ ១៣លានដុល្លារអាមេរិក ខណៈការខាតបង់នៅក្នុងវិស័យកសិកម្ម ត្រូវគេប៉ាន់ស្មានថាមានតម្លៃជាង ៤៣៥លានប៉េសូ។
នៅពេលធ្វើដំណើរតាមឧទ្ធម្ភាគចក្រដើម្បីត្រួតពិនិត្យការខូចខាតដោយសារខ្យល់ព្យុះត្រូពិក Nalgae លោកប្រធានាធិបតី Ferdinand Marcos Jr. បានសម្ដែងការតក់ស្លុតយ៉ាងខ្លាំងចំពោះចំនួនអ្នកស្លាប់ដ៏ច្រើន ជាពិសេសនៅក្នុងខេត្ត Maguindanao ក្នុងទីក្រុង Bangsamoro។
សូមជម្រាបថា ខ្យល់ព្យុះ Nalgae បានចាប់ផ្ដើមវាយប្រហារលើប្រទេសហ្វីលីពីនតាំងពីថ្ងៃព្រហស្បតិ៍សប្ដាហ៍មុន ដោយបាននាំទៅជាមួយនូវខ្យល់បោកបក់ខ្លាំង ភ្លៀងធ្លាក់យ៉ាងគំហុក និងការរអិលបាក់ដី។ គិតត្រឹមថ្ងៃចន្ទ ទី៣១ ខែតុលានេះ ខ្យល់ព្យុះ Nalgae បានថយកម្លាំងត្រៀមចាកចេញពីប្រទេសហ្វីលីពីន ដើម្បីបន្តដំណើរបន្តទៅកាន់ភាគខាងត្បូងប្រទេសចិន។
ប្រទេសហ្វីលីពីន រងគ្រោះដោយខ្យល់ព្យុះជាមធ្យមចំនួន ២០នៅក្នុងមួយឆ្នាំ ដោយមានការបាក់ដីនិងទឹកជំនន់ជាញឹកញាប់ ដែលជារឿយៗបានបង្កផលប៉ះពាល់ដល់ជីវិតមនុស្សជាច្រើន៕ ដោយ៖កែវ កិរិយា