អាមេរិក ព្រមានពីការជ្រៀតជ្រែករបស់ចិន និងរុស្ស៊ី ក្នុងការបោះឆ្នោតពាក់កណ្ដាលអាណត្តិ
អាមេរិក៖ខណៈការបោះឆ្នោតពាក់កណ្តាលអាណត្តិនឹងប្រព្រឹត្តទៅនៅថ្ងៃអង្គារទី៨ ខែវិច្ឆិកានេះ រដ្ឋាភិបាលសហរដ្ឋអាមេរិកក្រោមការដឹកនាំរបស់រដ្ឋបាលបៃដិន បានព្រមានអំពីលទ្ធភាពនៃការប៉ុនប៉ងរបស់រុស្ស៊ី និងចិន ដើម្បីធ្វើឱ្យខូចទំនុកចិត្តដល់អ្នកបោះឆ្នោត និងបង្កឱ្យមានការបែកបាក់កាន់តែខ្លាំងសង្គមអាមេរិក។
នាយកទីភ្នាក់ងារសន្តិសុខអ៊ីនធឺណិត និងហេដ្ឋារចនាសម្ព័ន្ធ លោក Jen Easterly បានអះអាងកាលពីចុងខែតុលាថា ពេលឃើញព័ត៌មានមិនពិតតាមអ៊ីនធឺណិត សូមកុំចែករំលែងព័ត៌មាននោះឱ្យកាន់តែទូលំទូលាយ និងផ្តល់ឱកាសជាមូលដ្ឋានឱ្យសត្រូវបរទេសបន្សាយឥទ្ធិពលជនជាតិអាមេរិក។
ការព្រមានបែបនេះ ត្រូវបានបន្ទរដោយមន្រ្តី និងអ្នកស្រាវជ្រាវ យ៉ាងណាមិញ រដ្ឋាភិបាលទីក្រុងម៉ូស្គូ និងទីក្រុងប៉េកាំង តែងបដិសេធការចោទប្រកាន់ ប៉ុន្តែរដ្ឋបាលរបស់លោកប្រធានាធិបតី ចូ បៃដិន បានកំណត់ការចោទប្រកាន់នេះ ជាអាទិភាពដើម្បីការពារការជ្រៀតជ្រែកលើការបោះឆ្នោតពីបរទេស។
ការចោទប្រកាន់ដ៏ពេញនិយមនោះ គឺថា រុស្ស៊ីប្រើយុទ្ធនាការផ្សព្វផ្សាយព័ត៌មានមិនពិត ដែលមានបំណងបំភ្លៃលទ្ធផលនៃការបោះឆ្នោតប្រធានាធិបតីអាមេរិកឆ្នាំ ២០១៦។ តែបន្ថែមពីនោះ ក្រុមហ៊ុនសន្តិសុខតាមអ៊ីនធឺណិត និងបច្ចេកវិទ្យាផ្សេងគ្នា បានអះអាងថា ការសង្ស័យពីការប៉ុនប៉ងរបស់រដ្ឋាភិបាលបរទេសជាច្រើន ដើម្បីសាបព្រួសការមិនទុកចិត្តក្នុងចំណោមអ្នកបោះឆ្នោត បានលេចចេញជារូបរាងរួចហើយ។
ក្រុមហ៊ុនសន្តិសុខតាមអ៊ីនធឺណិតអាមេរិក Mandiant កាលពីខែតុលា បានព្រមានអំពីយុទ្ធនាការបន្សាយឥទ្ធិពល ដើម្បីគាំទ្រផលប្រយោជន៍នយោបាយរដ្ឋាភិបាលចិន។ ក្រុមហ៊ុនអះអាងថា Mandiant យុទ្ធនាការដែលមានឈ្មោះថា Dragonbridge បង្កើតឡើងដើម្បីបង្ខូចកេរ្តិ៍ឈ្មោះដំណើរការប្រជាធិបតេយ្យរបស់សហរដ្ឋអាមេរិក រួមទាំងការប៉ុនប៉ងដើម្បីបំបាក់ទឹកចិត្តប្រជាជនអាមេរិកមិនឱ្យបោះឆ្នោតនៅក្នុងការបោះឆ្នោតពាក់កណ្តាលអាណត្តិនៅថ្ងៃអង្គារនេះ។
កាលពីចុងខែកញ្ញា ក្រុមហ៊ុន Meta ដែលជាក្រុមហ៊ុនមេរបស់ហ្វេសប៊ុក បានអះអាងថា ខ្លួនបិទបណ្តាញគណនីក្លែងក្លាយ ដែលចេញមកពីចិន ដែលបង្ហោះមាតិកាលើបញ្ហាដែលបង្ហាញពីការបាក់បែកគ្នាក្នុងសង្គមអាមេរិកដូចជា ការគ្រប់គ្រងកាំភ្លើង និងសិទ្ធិរំលូតកូនជាដើម។ ក្រុមហ៊ុន Meta ថា វាជារឿងខុសប្រក្រតី ដែលប្រតិបត្តិការបែបនេះ ផ្តោតលើនយោបាយក្នុងស្រុករបស់សហរដ្ឋអាមេរិក ជាជាងការរិះគន់សហរដ្ឋអាមេរិកពីអ្នកប្រើប្រាស់បណ្ដាញសង្គមបរទេស។
បន្ថែមពីលើនេះ ក្រុមហ៊ុន Meta ក៏បានអះអាងផងដែរថា ខ្លួនបានបិទយុទ្ធនាការរុស្ស៊ីដ៏ធំមួយ ដែលបង្កើតឡើង ដើម្បីផ្សព្វផ្សាយព័ត៌មានដែលគាំទ្រវិមានក្រឹមឡាំង ដែលគេក្លែងថាជាព័ត៌មាន។
ជាមួយគ្នានេះផងដែរ សារព័ត៌មានផ្សេងៗរបស់អាមេរិកបានចុះផ្សាយ ដោយស្រង់សម្ដីមន្ត្រីជាន់ខ្ពស់មួយរូបនៃទីភ្នាក់ងារស៊ើបអង្កេតសហព័ន្ធ (FBI) ថា ប្រទេសចិនកំពុងប្រើយុទ្ធសាស្ត្ររបស់រុស្ស៊ី ដើម្បីបំបែកសង្គមអាមេរិក។
អ្នកសិក្សាពីសង្គមយោធានៅក្រុមហ៊ុន RAND Corp. លោក Marek Posard បានព្រមានថា សហរដ្ឋអាមេរិកកាន់តែងាយរងគ្រោះចំពោះយុទ្ធនាការបន្សាយឥទ្ធិពលបរទេស បន្ទាប់ពីអ្នកគាំទ្រអតីតប្រធានាធិបតី លោក ដូណាល់ ត្រាំ បានវាយលុកចូលវិមានកាពីតូល នៅថ្ងៃទី០៦ ខែមករា ឆ្នាំ ២០២១។ លោក ត្រាំ ដែលបដិសេធការចាញ់ឆ្នោតលោក បៃដិន បានរងការចោទប្រកាន់ពីបទញុះញង់ក្រុមកូដករទាំងនោះ។
លោក Posard បានគូសបញ្ជាក់យ៉ាងដូច្នេះថា៖ «នៅពេលសុន្ទរកថាឈានដល់ចំណុចមួយ ដែលមិនផ្អែកលើការពិត និងភស្តុតាង ប៉ុន្តែបែរជាផ្អែកលើមតិ និងការប៉ាន់ស្មានដែលគ្មានមូលដ្ឋាននៅក្នុងការពិត នោះវានឹងបង្កើតឱកាសសម្រាប់សត្រូវក្នុងការកេងប្រវ័ញ្ច»។
គួររំឭកថា លោក ត្រាំ មិនបានផ្តល់ភស្តុតាងគាំទ្រការអះអាងរបស់លោក អំពីការក្លែងបន្លំនៅក្នុងការបោះឆ្នោតខែវិច្ឆិកា ឆ្នាំ២០២០ នោះទេ ហើយបន្តប្រាប់ទៅអ្នកគាំទ្ររបស់លោកថា ការបោះឆ្នោតត្រូវបានគេលួចពីលោក ហើយបដិសេធលទ្ធផលឆ្នោត៕
ដោយ៖ហួន ឌីណា ប្រភព៖ U.S. warns of election interference by Russia, China in midterms
