ប្រមុខដឹកនាំអាមេរិក គ្រោងជួបជជែកជាមួយសមភាគីជប៉ុននិងកូរ៉េខាងត្បូង អំពីការគំរាមកំហែងនុយក្លេអ៊ែររបស់កូរ៉េខាងជើង
អាមេរិក៖ប្រធានាធិបតីអាមេរិក លោក ចូ បៃដិន នឹងជួបជាមួយនាយករដ្ឋមន្ដ្រីជប៉ុន ព្រមទាំងប្រធានាធិបតីកូរ៉េខាងត្បូង ដើម្បីពិភាក្សាអំពីវិធីទប់ស្កាត់កម្មវិធីនុយក្លែអ៊ែររបស់កូរ៉េខាងជើង។ ជំនួបរវាងមេដឹកនាំប្រទេសសម្ព័ន្ធមិត្តទាំង៣នេះ នឹងត្រូវរៀបចំធ្វើឡើងក្នុងអំឡុងពេលដែលលោក ចូ បៃដិន ធ្វើដំណើរមកកាន់តំបន់អាស៊ី ដើម្បីចូលរួមកិច្ចប្រជុំសំខាន់ៗមួយចំនួន ដូចជា កិច្ចប្រជុំកំពូលអាស៊ាននៅកម្ពុជា និងកិច្ចប្រជុំកំពូល G20 នៅកោះបាលី ប្រទេសឥណ្ឌូនេស៊ី។ នេះបើតាមសេចក្ដីប្រកាសព័ត៌មានរបស់សេតវិមានអាមេរិក នាថ្ងៃពុធ ទី០៩ ខែវិច្ឆិកា ឆ្នាំ២០២២។
បើតាមការឱ្យដឹងពីប្រភពសេតវិមានដដែល មេដឹកនាំអាមេរិក ជប៉ុន និងកូរ៉េខាងត្បូង នឹងជួបគ្នានៅថ្ងៃអាទិត្យ ទី១៣ ខែវិច្ឆិកា។ ចំណែកកិច្ចពិភាក្សានឹងផ្ដោតសំខាន់ទៅលើការបន្តពង្រឹងកិច្ចសហប្រតិបត្តិការត្រីភាគី នៅតំបន់ឥណ្ឌូប៉ាស៊ីហ្វិក ជាពិសេសគឺកិច្ចខិតខំប្រឹងប្រែងរួមគ្នា ប្រឈមទៅនឹងការគំរាមកំហែងអាវុធនុយក្លេអ៊ែរ និងការបាញ់សាកល្បងមីស៊ីលជាប់ឥតដាច់ ពីសំណាក់ប្រទេសកូរ៉េខាងជើង។
គួររំឭកថា កាលពីខែតុលា ប្រទេសកូរ៉េខាងជើងបានបាញ់សាកល្បងមីស៊ីលរយៈចម្ងាយឆ្ងាយជាងពេលមុន ជាមីស៊ីលដែលមានសមត្ថភាពហោះរយៈចម្ងាយឆ្ងាយរំលងប្រទេសជប៉ុនជាលើកដំបូងក្នុងរយៈពេល៥ឆ្នាំ។ ការបាញ់មីស៊ីលរំលងប្រទេសជប៉ុននាពេលនោះ បានជំរុញឱ្យជប៉ុនចេញបញ្ជាឱ្យប្រជាជនរបស់ខ្លួនបង្កើនការប្រុងប្រយ័ត្ន និងប្រញាប់នាំគ្នាចូលលេណដ្ឋានដើម្បីការពារខ្លួនពីគ្រោះថ្នាក់ជាយថាហេតុថែមទៀត។
ភ្លាមៗបន្ទាប់ពីការបាញ់មីស៊ីលរំលងប្រទេសជប៉ុនពីសំណាក់កូរ៉េខាងជើង សហរដ្ឋអាមេរិក បានបង្ហាញការប្ដេជ្ញាចិត្តយ៉ាងមុតមាំរបស់ខ្លួន ក្នុងការការពារប្រទេសជប៉ុន។ ទន្ទឹមគ្នានោះ សហរដ្ឋអាមេរិករួមជាមួយសម្ព័ន្ធមិត្តជប៉ុន បានធ្វើសមយុទ្ធយោធារួមគ្នានៅលើដែនសមុទ្រជប៉ុន។ ចំណែកជាមួយកូរ៉េខាងត្បូង សហរដ្ឋអាមេរិកបានធ្វើសមយុទ្ធយោធា ដោយមានទាំងការបើកយន្តហោះចម្បាំងទម្លាក់គ្រាប់បែកនៅសមុទ្រលឿង ដើម្បីជាការឆ្លើយតប និងបង្ហាញសាច់ដុំដល់កូរ៉េខាងជើងផង។
កាលពីសប្តាហ៍មុន មន្ត្រីអាមេរិកម្នាក់បានប្រាប់ទីភ្នាក់ងារសារព័ត៌មាន Reutters ថា នៅក្នុងបញ្ហាតានតឹងនៅតំបន់ឧបទ្វីបកូរ៉េនេះ គឺមានតែចិននិងរុស្ស៊ីប៉ុណ្ណោះ ដែលមានអានុភាពអាចបញ្ចុះបញ្ចូលកូរ៉េខាងជើងកុំឱ្យបន្តការសាកល្បងគ្រាប់បែកនុយក្លេអ៊ែរឡើងវិញ។ កាលពីខែឧសភា សហរដ្ឋអាមេរិកបានបង្ហើបថា កូរ៉េខាងជើងកំពុងរៀបចំបន្តការសាកល្បងនុយក្លេអ៊ែរជាលើកទីមួយ ចាប់តាំងពីឆ្នាំ២០១៧ ប៉ុន្តែគេមិនទាន់មានព័ត៌មានច្បាស់ការណ៍ថា កូរ៉េខាងជើងនឹងសាកល្បងអាវុធនុយក្លេអ៊ែររបស់ខ្លួន នៅពេលណានៅឡើយទេ។ សហរដ្ឋអាមេរិកបានបញ្ជាក់ថា ខ្លួនកំពុងតែស្ថិតក្នុងដំណាក់កាលចុងក្រោយនៃការពិនិត្យឡើងវិញនូវគោលនយោបាយរបស់ខ្លួនចំពោះកូរ៉េខាងជើង និងចង់បង្កើនកិច្ចសហប្រតិបត្តិការត្រីភាគីជាមួយកូរ៉េខាងត្បូងនិងជប៉ុនបន្ថែមទៀត ដើម្បីទប់ទល់នឹងការគំរាមកំហែងរបស់កូរ៉េខាងជើង។
គួរបញ្ជាក់ថា កូរ៉េខាងជើងត្រូវក្រុមប្រឹក្សាសន្តិសុខអង្គការសហប្រជាជាតិ ហាមឃាត់មិនឱ្យធ្វើតេស្តសាកល្បងអាវុធនុយក្លេអ៊ែរ និងបាញ់មីស៊ីលណាមួយឡើយ។ ការបាញ់មីស៊ីលរបស់កូរ៉េខាងជើងនាពេលថ្មីៗនេះ បានជំរុញឱ្យមានការដាក់ទណ្ឌកម្មបន្ថែមទៀតទៅលើកូរ៉េខាងជើង ដើម្បីធ្វើយ៉ាងណាកុំឱ្យកូរ៉េខាងជើងមានចំណូលឬមូលនិធិណាមួយសម្រាប់ផ្គត់ផ្គង់ការអភិវឌ្ឍកម្មវិធីនុយក្លេអ៊ែររបស់ខ្លួនតទៅទៀត៕
ដោយ៖កែវ កិរិយា