កិច្ចប្រជុំ G-20៖ មេដឹកនាំអ៊ុយក្រែន ហ្សេលេនស្គី អំពាវនាវឱ្យដាក់សម្ពាធលើរុស្ស៊ីដើម្បីសន្តិភាព
ឥណ្ឌូនេស៊ី៖ប្រធានាធិបតីអ៊ុយក្រែនលោក វ្ល៉ូឌីមៀរ ហ្សេលេនស្គី នៅថ្ងៃអង្គារទី ១៥ ខែវិច្ឆិកា បានជំរុញឱ្យមេដឹកនាំពិភពលោកគាំទ្រផែនការដើម្បីបញ្ចប់សង្គ្រាមនៅក្នុងប្រទេសរបស់លោកដោយនិយាយថា ឥឡូវនេះគឺជាពេលវេលាដើម្បីជំរុញឱ្យមានសន្តិភាព។
ការអំពាវនាវរបស់លោក ហ្សេលេនស្គី គឺជាការបញ្ជាក់ជំហរយ៉ាងមុតមាំរបស់អ៊ុយក្រែនជាថ្មី ដែលថា ប្រទេសលោកខ្លួនត្រៀមខ្លួនសម្រាប់សន្តិភាព ប៉ុន្តែនឹងមិនប្រគល់ទឹកដីឱ្យរដ្ឋកាន់កាប់នោះទេ។ លោកបន្ថែមថា អ៊ុយក្រែននឹងប្រយុទ្ធរហូតទាល់តែរុស្ស៊ីដកកងទ័ពឈ្លានពានទាំងអស់ចេញពីទឹកដីរបស់ខ្លួន។
លោក ហ្សេលេនស្គី បានលើកឡើងក្នុងសុន្ទរកថាទៅកាន់កិច្ចប្រជុំកំពូលនៃក្រុមប្រទេសលូតលាស់ទាំង២០ (G-20)នៅកោះប៉ាលីនៃប្រទេសឥណ្ឌូនេស៊ីថាការឈ្លានពានរបស់រុស្ស៊ីលើអ៊ុយក្រែនគឺជាការផ្តោតសំខាន់នៃការពិភាក្សាក្នុងចំណោមមេដឹកនាំនៃបណ្តាប្រទេសសេដ្ឋកិច្ចធំៗរបស់ពិភពលោក។
លោកថ្លែងតាមប្រព័ន្ធវិដេអូយ៉ាងដូច្នេះថា៖«ខ្ញុំជឿជាក់ថាឥឡូវនេះ គឺជាពេលវេលាដែលសង្រ្គាមបំផ្លិចបំផ្លាញរបស់រុស្ស៊ីត្រូវតែបញ្ឈប់»។
លើសពីនេះ លោកហ្សេលេនស្គី បានអំពាវនាវឱ្យរុស្ស៊ីដកកងកម្លាំងរបស់ខ្លួនទាំងអស់ចេញពីអ៊ុយក្រែន ហើយបញ្ជាក់ជាថ្មីអំពីបូរណភាពទឹកដីរបស់អ៊ុយក្រែន ហើយថាទីក្រុងកៀវនឹងមិនធ្វើឱ្យខូចអធិបតេយ្យភាព ទឹកដី ឬឯករាជ្យភាពរបស់ខ្លួនឡើយ។ លោកក៏បានអំពាវនាវផងដែរ ឱ្យមានការដោះលែងអ្នកទោសអ៊ុយក្រែនទាំងអស់មកវិញ។
មេដឹកនាំអ៊ុយក្រែនដដែលបានលើកឡើង ដោយសំដៅលើបណ្ដាមេដឹកនាំរបស់ប្រទេសដទៃថា៖ «សូមជ្រើសរើសផ្លូវរបស់អ្នក សម្រាប់ការដឹកនាំ ហើយយើងទាំងអស់គ្នានឹងអនុវត្តរូបមន្តសន្តិភាព»។
ទន្ទឹមជាមួយគ្នានោះលោក ហ្សេលេនស្គី ក៏បានស្វាគមន៍ផងដែរ ចំពោះជំហររបស់ចិនដែលជំទាស់នឹងការគំរាមកំហែងប្រើប្រាស់អាវុធនុយក្លេអ៊ែរ បន្ទាប់ពីប្រធានាធិបតីសហរដ្ឋអាមេរិក ចូ បៃដិន និងប្រធានាធិបតីចិន លោក ស៊ី ជិនពីង បានជួបប្រជុំគ្នាកាលពីថ្ងៃចន្ទ។
គួរបញ្ជាក់ថា ទន្ទឹមនឹងការអំពាវនាវរបស់លោក ហ្សេលេនស្គី ក្រុមប្រទេសលោកខាងលិច ដែលជាសមាជិករបស់ G-20 ដែលជាប្លុកធ្វើការរួមគ្នារកដំណោះស្រាយវិបត្តិសេដ្ឋកិច្ច បានទាមទារឱ្យមានការថ្កោលទោសរុស្ស៊ី។ ប៉ុន្តែកន្លងមក បញ្ហានេះតែងតែជាប់គាំង ព្រោះប្រទេសផ្សេងទៀតជំទាស់ រួមមានទាំងឥណ្ឌា ចិន ប្រេស៊ីល និងឥណ្ឌូណេស៊ីដែលជាម្ចាស់ផ្ទះនៃកិច្ចប្រជុំកំពូលឆ្នាំផ្ទាល់។ ហើយសម្រាប់កិច្ចប្រជុំថ្ងៃអង្គារពុធនេះ គេមិនរំពឹងថា នឹងមានការថ្កោលទោសរុស្ស៊ី ដែលជាប្រទេសសមាជិករបស់ G-20 ដ៏ធំមួយនោះទេ៕
ដោយ៖ហួន ឌីណា
