បាងកក៖ តំបន់ជាច្រើននៅភូកេត បានរងការខូចខាតយ៉ាងធ្ងន់ធ្ងរពីទឹកជំនន់ បន្ទាប់ពីមានភ្លៀងធ្លាក់ខ្លាំងកាលពីថ្ងៃអង្គារទី១៥ ខែវិច្ឆិកា ឆ្នាំ២០២២។
ភ្លៀងធ្លាក់ជាច្រើនម៉ោងជាប់ៗគ្នារហូតដល់ពាក់កណ្តាលអធ្រាត្រ កាលពីថ្ងៃទី១៥ ខែវិច្ឆិកា បានបង្កឱ្យជន់លិចនៅតំបន់ជាច្រើន រួមទាំងស្រុក Muang Phuket និងស្រុក Kath ។

ផ្លូវជាច្រើនក្នុងក្រុង Patong ក្នុងស្រុក Kathu ត្រូវបានជន់លិច ខណៈដែលរថយន្តតូចៗនៅក្នុងសង្កាត់ Chalong និង Wichit ក្នុងស្រុក Muang Phuket មិនអាចប្រើប្រាស់បាន។ ក្នុងសង្កាត់ពាណិជ្ជកម្មរបស់ភូកេត កម្រិតទឹកមិនខ្ពស់ទេ ប៉ុន្តែមន្ត្រីត្រូវបិទផ្លូវជាបណ្តោះអាសន្នដើម្បីការពារកុំឱ្យទឹកហូរចូលផ្ទះក្បែរនោះ។
សាលាក្រុងភូកេត បានតាមដានស្ថានការណ៍យ៉ាងដិតដល់ ហើយមន្ត្រីត្រូវបានបញ្ជូនទៅអន្តរាគមន៍ ដើម្បីបង្ហូរទឹកចូលទៅក្នុងសមុទ្រ។

នៅព្រឹកថ្ងៃពុធនេះ ក្រុមមន្ត្រីបានរកឃើញស្នាមប្រេះបន្ថែមទៀតនៅលើផ្លូវ Kathu – Patong រួមទាំងការស្ទះដែលបណ្តាលមកពីការបាក់ដី។ យ៉ាងណាមិញ ការងារជួសជុលត្រូវបានពន្យារពេលដោយសារភ្លៀងធ្លាក់។ យានជំនិះទាំងអស់អាចផ្លាស់ទីចុះពី Patong ទៅ Kathu ប៉ុន្តែមានតែម៉ូតូប៉ុណ្ណោះដែលត្រូវបានអនុញ្ញាតឱ្យធ្វើដំណើរ៕ ប្រភពពី The Nation, ដោយ៖ សារ៉ាត