ប្រធានាធិបតីតួកគី៖ ទាំងរុស្ស៊ី និងសហរដ្ឋអាមេរិក មិនងាកទៅរកការប្រើប្រាស់អាវុធនុយក្លេអ៊ែរវិញនោះទេ
អង់ការ៉ា៖ ប្រធានាធិបតីតួកគី លោក តាយយីប អឺដូហ្គាន់ ក្នុងថ្ងៃព្រហស្បតិ៍ទី១៧ ខែវិច្ឆិកា បានថ្លែងថា កិច្ចប្រជុំរវាងសហរដ្ឋអាមេរិក និងរុស្ស៊ី ក្នុងប្រទេសតួកគី បានបង្ហាញថា ភាគីទាំងពីរនឹងមិនប៉ុនប៉ងប្រើប្រាស់អាវុធនុយក្លេអ៊ែរនោះទេ។ នេះបើតាមទីភ្នាក់ងារព័ត៌មានពាក់កណ្តាលផ្លូវការរបស់តួកគី Anadolu។
លោក អឺដូហ្គាន់ បានប្រាប់ក្រុមអ្នកយកព័ត៌មាននៅលើជើងហោះហើរពីប្រទេសឥណ្ឌូនេស៊ី ត្រឡប់ទៅកាន់ប្រទេសតួកគីថា ព័ត៌មានដែលខ្ញុំទទួលបានពីនាយកចារកម្មរបស់ខ្ញុំ ថាតើរុស្ស៊ី-អាមេរិកនឹងងាកទៅរកការប្រើប្រាស់អាវុធនុយក្លេអែរវិញឬអត់ គឺថា រហូតមកទល់ពេលនេះ ភាគីទាំងពីរនឹងមិនមានការប៉ុនប៉ងណាមួយលើការប្រើប្រាស់អាវុធនុយក្លេអ៊ែរនោះទេ។
លោក អឺដូហ្គាន់ បានសំដៅលើកិច្ចប្រជុំមួយរវាងប្រមុខទីភ្នាក់ងារស៊ើបការណ៍សម្ងាត់កណ្តាលរបស់សហរដ្ឋអាមេរិក (CIA) និងសេវាស៊ើបការណ៍សម្ងាត់បរទេសរបស់រុស្ស៊ី ដែលរៀបចំដោយអង្គការស៊ើបការណ៍ជាតិរបស់ប្រទេសតួកគី ក្នុងរដ្ឋធានីអង់ការ៉ា កាលពីថ្ងៃចន្ទសប្តាហ៍នេះ។
ប្រធានាធិបតីតួកគីរូបនេះបាននិយាយយ៉ាងដូច្នេះថា បម្រាមរបស់ព្រះជាម្ចាស់ នោះគឺអាវុធនុយក្លេអ៊ែរអាចនឹងនាំឱ្យមានសង្រ្គាមពិភពលោកថ្មីមួយ ដូច្នេះមិនគួរអនុញ្ញាតឱ្យវាកើតឡើងទេ។
ចំណែកអ្នកនាំពាក្យវិមានក្រឹមឡាំង លោក ឌីមីទ្រី ប៉េសស្កូវ បាននិយាយកាលពីថ្ងៃចន្ទសប្តាហ៍នេះថា ជំនួបរវាងនាយក CIA លោក Bill Burns និងសមភាគីចារកម្មរុស្ស៊ី លោក Sergey Naryshkin នៅទីក្រុងអង់ការ៉ា ត្រូវបានធ្វើឡើងតបតាមសំណើរបស់សហរដ្ឋអាមេរិក៕ ប្រភព៖ ស៊ីនហួរ ដោយ៖ ទីណា និងបុត្រា