តូក្យូ៖ រដ្ឋមន្ត្រីកិច្ចការផ្ទៃក្នុងរបស់ប្រទេសជប៉ុន បានលាលែងពីតំណែង កាលពីថ្ងៃអាទិត្យ ពាក់ព័ន្ធនឹងរឿងអាស្រូវថវិកា ដែលបានក្លាយជាសមាជិកគណៈរដ្ឋមន្ត្រីទីបី ដែលត្រូវចាកចេញក្នុងរយៈពេលតិចជាងមួយខែ ជាវាយប្រហារយ៉ាងធ្ងន់ធ្ងរដល់ការគាំទ្រដ៏រង្គោះរង្គើ របស់នាយករដ្ឋមន្ត្រី Fumio Kishida ។

រដ្ឋមន្ត្រីកិច្ចការផ្ទៃក្នុងលោក Minoru Terada បានស្នើសុំការលាលែងពីតំណែងនេះ ទៅលោក Kishida បន្ទាប់ពីប្រព័ន្ធផ្សព្វផ្សាយរាយការណ៍ថា នាយករដ្ឋមន្ត្រីកំពុងរៀបចំបណ្តេញលោកចេញ។ ការិយាល័យរបស់ Kishida មិនអាចទាក់ទងសុំការអត្ថាធិប្បាយលើរបាយការណ៍ទាំងនោះបានទេ។

លោក Kishida បាននិយាយថា លោកបានទទួលយកការលាលែងពីតំណែងរបស់ លោក Terada ដើម្បីផ្តល់អាទិភាពដល់ការពិភាក្សារបស់សភា រួមទាំងការពិភាក្សាលើថវិកាបន្ថែមទីពីរសម្រាប់ឆ្នាំសារពើពន្ធដែលបញ្ចប់ក្នុងខែមីនា។នៅពេលសួរអំពីការពិតដែលថា រដ្ឋមន្ត្រីបីនាក់បានលាលែងពីតំណែងចាប់តាំងពីថ្ងៃទី ២៤ ខែតុលាមកនោះ លោក Kishida បាននិយាយថា លោកចង់សុំទោស។

រដ្ឋមន្ត្រីពីររូបមុន ដែលទើបលាឈប់ពីតំណែងដែរនោះគឺ រដ្ឋមន្ត្រីស្តារសេដ្ឋកិច្ច Daishiro Yamagiwa និងរដ្ឋមន្ត្រីយុត្តិធម៌ Yasuhiro Hanashi ៕ ប្រភពពី CNA, ដោយ៖ សារ៉ាត