កាណាដាស៊ើបអង្កេតបន្ទាប់ពីរបាយការណ៍មួយផ្សាយថាមានប៉ុស្តិ៍ប៉ូលីសចិននៅក្នុងទឹកដីរបស់ខ្លួន
កាណាដា៖ប៉ូលីសកាណាដា (RCMP) បាននិយាយកាលពីថ្ងៃអង្គារទី ២២ ខែវិច្ឆិកាថា ខ្លួននឹងស៊ើបអង្កេតរបាយការណ៍ជុំវិញករណីនៃការបើកស្ថានីយ៍ប៉ុស្ដិ៍ប៉ូលីសរបស់ចិន នៅតំបន់ Greater Toronto ដែលនឹងពិនិត្យមើលលើលទ្ធភាពនៃការជ្រៀតជ្រែកចូលផលប្រយោជន៍ផ្ទៃក្នុង និងគំរាមកំហែងដល់សន្តិសុខជាតិកាណាដា។
ចំណាត់ការរបស់កាណាដានាពេលនេះ ធ្វើឡើងដូចគ្នានឹងប្រទេសផ្សេងទៀតរួមមានសហរដ្ឋអាមេរិក និងហូឡង់ជាដើម បន្ទាប់ពីអង្គការសិទ្ធិមនុស្សមានមូលដ្ឋាននៅអឺរ៉ុប Safeguard Defenders បានចេញរបាយការណ៍មួយកាលពីខែកញ្ញា ដោយអះអាងថា ចិនបានដាក់ប៉ុស្តិ៍ប៉ូលីសរបស់ខ្លួននៅរាប់សិបកន្លែងនៅទីក្រុងធំៗជុំវិញពិភពលោក។
របាយការណ៍នោះលើកឡើងថា វត្តមាននៃប៉ុស្តិ៍ប៉ូលីសចិនទាំងនោះ ស្ថិតនៅក្រោមកិច្ចខិតខំប្រឹងប្រែងរបស់ទីក្រុងប៉េកាំង ក្នុងការគ្រប់គ្រងសំឡេងប្រឆាំងក្រៅប្រទេស ដោយបញ្ចុះបញ្ជូលពួកគេឱ្យត្រឡប់ទៅចិនវិញ ហើយធ្វើការចោទប្រកាន់ពួកគេពីបទឧក្រិដ្ឋផ្សេងៗ។ វាក៏មានជាប់ទាក់ទងផងដែរទៅនឹងសកម្មភាពរបស់នាយកដ្ឋានរណសិរ្សរួបរួមចិន ដែលជាស្ថាប័នបក្សកុម្មុយនីស្ត ដែលរងការចោទប្រកាន់ពីបទផ្សព្វផ្សាយឥទ្ធិពល និងការឃោសនាបម្រើផលប្រយោជន៍ឱ្យរដ្ឋាភិបាលចិននៅក្រៅប្រទេស។
ចំពោះការស៊ើបអង្កេតលើករណីនេះ ប៉ូលីសកាណាដា RCMP បានលើកឡើងយ៉ាងដូច្នេះនៅក្នុងសេចក្តីថ្លែងការណ៍កាលពីថ្ងៃអង្គារថា៖ «គោលបំណងរបស់យើង គឺដើម្បីការពារការបំភិតបំភ័យ ការគំរាមកំហែង និងការយាយី ដែលផ្តួចផ្តើមឡើងក្នុងនាមអង្គភាពបរទេស និងត្រូវបានអនុវត្តក្នុងសហគមន៍ណាមួយនៅក្នុងប្រទេសកាណាដា»។
បើតាមរបាយការណ៍ Safeguard Defenders មានប៉ុស្តិ៍ប៉ូលីសចិនចំនួនបីនៅតំបន់ Greater Toronto ដែលរួមបញ្ជូលទាំងក្រុងតូរ៉ុនតូ ដែលជារាជធានីហិរញ្ញវត្ថុ និងមានប្រជាជនរស់នៅច្រើនជាងគេបំផុតរបស់កាណាដា។
ឆ្លើយតបនឹងនឹងចំណាត់ការរបស់ប៉ូលីសកាណាដា ភាគីចិនមិនបានធ្វើប្រតិកម្មយ៉ាងណានោះទេ ប៉ុន្តែកន្លងមក ចិនបានច្រានចោលរបាយការណ៍របស់ Safeguard Defenders ហើយគូសបញ្ជាក់ថា ខ្លួនគោរពច្បាប់អន្តរជាតិ និងអធិបតេយ្យភាពនៃប្រព័ន្ធយុត្តិធម៌របស់ប្រទេសនីមួយ។
គួរកត់សម្គាល់ផងដែរថា ចំណាត់ការរបស់កាណាដានាពេលនេះ ធ្វើឡើងខណៈដែលភាពតានតឹងរវាងចិន និងកាណាដា បានបន្តកើនឡើងកាន់តែខ្លាំងក្នុងរយៈពេលប៉ុន្មានឆ្នាំនេះ។ ភាពតានតឹងផ្នែកការទូត បានកើតឡើងក្រោមប្រធានបទក្ដៅថ្មីៗនេះ នៅពេលប្រធានាធិបតីចិន ស៊ី ជិនពីង បាននិយាយទល់មុខលោកនាយករដ្ឋមន្រ្តីកាណាដា ចាស្ទីន ទ្រូដូ ជុំវិញការបែកធ្លាយលើកិច្ចសន្ទនារវាងមេដឹកនាំទាំង២ នៅខាងក្រៅកិច្ចប្រជុំកំពូលG-20 កាលពីសប្ដាហ៍មុន៕
ដោយ៖ហួន ឌីណា ប្រភព៖ Canada probes reports of Chinese ‘police service stations’ in Toronto as national security threats