មន្រ្តី គ.ជ.ប បញ្ជាក់ថា នឹងមិនមានការពន្យារពេល ឬបន្ថែមថ្ងៃសម្រាប់អ្នកដែលមិនបានចុះឈ្មោះបោះឆ្នោតទាន់ពេលកំណត់នោះឡើយ
ភ្នំពេញ៖មន្រ្តីជាន់ខ្ពស់នៃគណៈកម្មាធិការជាតិរៀបចំការបោះឆ្នោត (គ.ជ.ប) បានប្រាប់ឱ្យដឹងថា គ.ជ.បនឹងមិនមានការពន្យារពេលឬបន្ថែមថ្ងៃសម្រាប់ការចុះឈ្មោះនិងពិនិត្យបញ្ជីឈ្មោះបោះឆ្នោត ឆ្នាំ២០២២ ឡើយ ប្រសិនបើមានប្រជាពលរដ្ឋណាដែលខកខាន ឬយឺតយ៉ាវក្នុងការមកចុះឈ្មោះបោះឆ្នោតតាមកាលកំណត់របស់គ.ជ.ប)។
ឯកឧត្តម សោម សូរីដា អគ្គលេខាធិការរង និងជាអ្នកនាំពាក្យគ.ជ.បបានប្រាប់ឱ្យដឹងថា ការចុះឈ្មោះនិងពិនិត្យឈ្មោះបោះឆ្នោតបាននិងកំពុងប្រព្រឹត្តិទៅជាធម្មតា ហើយប្រជាពលរដ្ឋដែលបានទៅចុះឈ្មោះនេះមានចំនួនច្រើនហួសពីការរំពឹងទុកផងដែរ។
បើតាមការលើកឡើងរបស់អ្នកនាំពាក្យរូបនេះបានបញ្ជាក់ថា ចំនួនអ្នកដែលគ.ជ.ប រំពឹងថានឹងអាចមកចុះឈ្មោះបោះឆ្នោតថ្មីនេះ មាន ៤០៩ ០៥៦ នាក់ប៉ុណ្ណោះ ប៉ុន្តែក្នុងរយៈពេល៣៤ ថ្ងៃមកនេះ ប្រជាពលរដ្ឋមកចុះឈ្មោះមានរហូតដល់៤៥៣ ៩៥០ នាក់។ ដូចនេះចំនួនពលរដ្ឋដែលមកចុះឈ្មោះមកដល់ពេលនេះគឺលើសផែនការដែលបានកំណត់ ជិតប្រាំម៉ឺននាក់ហើយ។
លោកមានប្រសាសន៍ថា ៖ «ប្រសិនបើដល់ថ្ងៃនៃការបិទបញ្ចប់ការចុះឈ្មោះនិងពិនិត្យឈ្មោះបោះឆ្នោតត្រូវនឹងថ្ងៃទី៨ ខែធ្នូខាងមុខនេះ ហើយប្រជាពលរដ្ឋដែលមិនបានមកចុះឈ្មោះទេនោះ គឺពួកគាត់នឹងខកខានក្នុងចុះឈ្មោះបោះឆ្នោតនេះហើយ ដោយសារគ.ជ.បនឹងមិនមានការពន្យារពេលឬបន្ថែមថ្ងៃសម្រាប់ចុះឈ្មោះនេះទៀតឡើយ»។
ឯកឧត្តម សោម សូរីដា បានបន្ថែមទៀតថា គ.ជ.ប មានពេលវេលា កំណត់សម្រាប់ការពិនិត្យនិងចុះឈ្មោះបោះឆ្នោត ដោយសារគណៈកម្មាធិការនេះត្រូវរៀបចំបញ្ជីបោះឆ្នោតដំបូងដើម្បីបិទផ្សាយជូនប្រជាពលរដ្ឋក្នុងករណីមានការប្តឹងជំទាស់ណាមួយ។
គោលបំណងធំនោះគឺ ការប្តឹងតវ៉ាចំពោះការមិនមានឈ្មោះនៅក្នុងបញ្ជីឈ្មោះបោះឆ្នោត ឬករណីឈ្មោះរបស់ពួកគាត់ កត់ត្រាមិនបានត្រឹមត្រូវតាមអត្តសញ្ញាណបត្រសញ្ជាតិខ្មែរដែលពួកគាត់ប្រើសម្រាប់បោះឆ្នោត ដែលករណីនេះពួកគាត់មានសិទ្ធិក្នុងការប្តឹងតវ៉ា ដើម្បីកែសម្រួលឈ្មោះ។ នេះបើតាមការលើកឡើងពីលោក សោម សូរីដា។
លោកបានបន្តថា ៖ «ក្នុងដំណាក់កាលនោះ គ.ជ.ប ត្រូវការពេលវេលាដើម្បីដោះស្រាយបណ្តឹង ដែលបណ្តឹងនេះគឺដោះស្រាយចប់នៅក្រុមប្រឹក្សាធម្មនុញ្ញ ហើយបញ្ជីបោះឆ្នោតផ្លូវការនឹងត្រូវផ្តល់សុពលភាពនៅថ្ងៃទី២១ ខែកុម្ភៈ ឆ្នាំ២០២៣ខាងមុខនេះ។ ដូចនេះ គ.ជ.ប មិនមានពេលវេលាបន្ថែមសម្រាប់ប្រជាពលរដ្ឋដែលខកខានមិនបានមកចុះឈ្មោះបោះឆ្នោត ដែលនឹងត្រូវផុតកំណត់ត្រឹមថ្ងៃទី៨ ខែធ្នូខាងមុខនេះ»។
របាយការណ៍របស់គ.ជ.ប នៅថ្ងៃទី២៣ ខែវិច្ឆិកា ឆ្នាំ២០២២ បានឱ្យដឹងថា ចាប់ពីថ្ងៃទី២០ ខែតុលា ដល់ថ្ងៃទី២២ ខែវិច្ឆិកា គ.ជ.ប បានចុះឈ្មោះប្រជាពលរដ្ឋ បានចំនួន៤៥៣ ៩៥០ នាក់, អ្នកដែលនឹងត្រូវលុបឈ្មោះចេញពីបញ្ជីបោះឆ្នោត មានចំនួន ១៩៦ ៦២៧នាក់, អ្នកដែលបានកែតម្រូវទិន្នន័យ មានចំនួន ៤៤ ៥៨២នាក់ និងអ្នកដែលបានផ្ទេរទីលំនៅចូលក្នុងឃុំ សង្កាត់ថ្មី មានចំនួន ១២៧ ២១៨នាក់។
ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២២ ប្រព្រឹត្តទៅចាប់ពីថ្ងៃទី២០ ខែតុលា ដល់ថ្ងៃទី៨ ខែធ្នូ ឆ្នាំ២០២២ គិតទាំងថ្ងៃសៅរ៍ និងថ្ងៃអាទិត្យ។
ប្រជាពលរដ្ឋដែលទើបគ្រប់អាយុ ១៨ឆ្នាំ គិតដល់ថ្ងៃបោះឆ្នោតជ្រើសតាំងតំណាងរាស្ត្រ ថ្ងៃទី២៣ ខែកក្កដា ឆ្នាំ២០២៣ គឺអ្នកដែលកើតមុន ឬត្រឹមថ្ងៃទី២៤ ខែកក្កដា ឆ្នាំ២០០៥ ប្រជាពលរដ្ឋដែលមិនធ្លាប់ចុះឈ្មោះបោះឆ្នោតពីមុនមក និងប្រជាពលរដ្ឋដែលបានផ្លាស់លំនៅឋាន ឬទីសំណាក់ចូលក្នុងឃុំ សង្កាត់ថ្មី អញ្ជើញទៅចុះឈ្មោះបោះឆ្នោតឱ្យបានគ្រប់ៗគ្នា៕
ដោយ៖នាង សុគន្ធា