សភាបារាំងអនុម័តច្បាប់ស្ដីពីសិទ្ធិរំលូតកូនទៅក្នុងរដ្ឋធម្មនុញ្ញ
បារាំង៖សមាជិកសភានៅសភាជាន់ទាបបារាំងកាលពីថ្ងៃព្រហស្បតិ៍ទី ២៤ ខែវិច្ឆិកា បានបោះឆ្នោតដាក់បន្ថែមសិទ្ធិរំលូតកូនទៅក្នុងច្បាប់រដ្ឋធម្មនុញ្ញរបស់ប្រទេស ដោយមានសមាជិកសភា ៣៣៧ រូប គាំទ្រ ៣២ រូបប្រឆាំង និង១៨ ទៀតអនុបវាទ។
ក្រោមសំឡេងគាំទ្រដ៏ច្រើនលើសលុបបែបនេះ ច្បាប់ស្ដីពីសិទ្ធិរំលូតកូន ត្រូវការអនុម័តម្ដងទៀតពីព្រឹទ្ធសភា ដែលមានសមាជិកភាគច្រើនជាពួកអភិរក្សនិយម។
ក្រោមជំហានដែលអាចឱ្យបារាំងក្លាយជាប្រទេសដំបូងគេលើពិភពលោក ដែលកំណត់ការរំលូតកូនជាសិទ្ធិស្របតាមច្បាប់រដ្ឋធម្មនុញ្ញនេះ សមាជិកសភាមកពីគណបក្សឆ្វេងនិយម La France Insoumise (LFI) និងក្រុមចម្រុះពាក់កណ្តាលនិយមដែលកំពុងកាន់អំណាចបច្ចុប្បន្ន បានចុះកិច្ចព្រមព្រៀងលើពាក្យពេចន៍នៃច្បាប់ថ្មី។
សេចក្តីព្រាងរដ្ឋធម្មនុញ្ញ មាត្រា ៦៦ ដែលត្រូវបន្ថែមសិទ្ធិរំលូតកូន បានចែងយ៉ាងដូច្នេះថា៖ «ច្បាប់ធានានូវប្រសិទ្ធភាព និងការទទួលបានសិទ្ធិស្មើគ្នា ក្នុងការបញ្ចប់ការមានផ្ទៃពោះដោយស្ម័គ្រចិត្ត»។
មេដឹកនាំសភានៃគណបក្ស LFI លោកស្រី Mathilde Panot ដែលបានស្នើលើសេចក្ដីសម្រេចចិត្តនេះ បានលើកឡើងថា វាគឺជាការការពារការរំលូតកូនដោយស្របច្បាប់ប្រឆាំងនឹងគំនិតចាស់គំរិលណាមួយ។ លោកស្រីបានបន្ថែមថា កុំយកវិបត្តិនយោបាយ សេដ្ឋកិច្ច ឬសាសនា ទៅរឹតត្បឹតសិទ្ធិស្រ្តី។
ការអនុម័តរបស់សភាបារាំងកាលពីថ្ងៃព្រហស្បតិ៍ ធ្វើឡើងបន្ទាប់ពីគណបក្សជាច្រើននៅក្នុងប្រទេសបារាំង ទាំងឆ្វេង និងកណ្ដាលនិយម បានចាប់ផ្តើមជំរុញឱ្យមានសិទ្ធិរំលូតកូន ដែលមានចែងក្នុងរដ្ឋធម្មនុញ្ញ។ ការជំរុញខ្លាំងក្លាបែបនេះ កើតមានឡើងបន្ទាប់ពីតុលាការកំពូលរបស់អាមេរិកកាលពីខែមិថុនាបានសម្រេចចិត្តលុបចោលច្បាប់ស្ដីពីសិទ្ធិរំលូតកូនដោយស្របច្បាប់ ខណៈដែលរដ្ឋាភិបាលអភិរក្សនិយមរបស់ប៉ូឡូញរឹតត្បឹតស្រ្តីជុំវិញរំលូតកូនដូចគ្នា។
ប្រតិកម្មទៅនឹងការអនុម័តនេះ មេដឹកនាំក្រុមស្តាំនិយម លោកស្រី ម៉ារីន ឡឺប៉ែន បានហៅជំហាននេះថា «ខុសទាំងស្រុង» ដោយលើកហេតុផលថា សិទ្ធិរំលូតកូនមិនស្ថិតនៅក្រោមការគំរាមកំហែងនៅបារាំងនោះទេ។
ការរំលូតកូន ត្រូវបានដាក់ឱ្យស្របច្បាប់នៅប្រទេសបារាំងក្នុងឆ្នាំ ១៩៧៤ ក្នុងច្បាប់មួយដែលគ្រប់គ្រងដោយអតីតរដ្ឋមន្ត្រីក្រសួងសុខាភិបាលលោកស្រី Simone Veil ។ ការប៉ុនប៉ងពីមុន ដើម្បីដាក់សិទ្ធិរំលូតកូនទៅក្នុងរដ្ឋធម្មនុញ្ញបារាំង ត្រូវបានព្រឹទ្ធសភាច្រានចោលរួចម្ដងហើយ កាលពីខែតុលា។
ជំហានលើកទី២ នេះក៏នឹងត្រូវការការយល់ព្រមពីសភាជាន់ខ្ពស់ផងដែរ ហើយក្រោយមក វាក៏ត្រូវឆ្លងកាត់ការបោះឆ្នោតប្រជាមតិជាតិ។
គួរកត់សម្គាល់ថា លទ្ធផលនៃការស្ទង់មតិពីក្រុមហ៊ុនស្រាវជ្រាវ Ifop ដែលធ្វើឡើងកាលពីប៉ុន្មានខែមុន បានបង្ហាញថា ៨១ ភាគរយនៃប្រជាជនបារាំងមកពីគ្រប់មជ្ឈដ្ឋាននយោបាយ ចង់ឱ្យសិទ្ធិរំលូតកូនទទួលការការពារក្រោមច្បាប់រដ្ឋធម្មនុញ្ញ៕
ដោយ៖ ហួន ឌីណា
