សហភាពអឺរ៉ុប គ្រោងបង្កើតតុលាការជំនាញដើម្បីស៊ើបអង្កេតឧក្រិដ្ឋកម្មសង្គ្រាមរបស់រុស្ស៊ីនៅអ៊ុយក្រែន
អ៊ីយូ៖ សហភាពអឺរ៉ុប (EU) បានស្នើកាលពីថ្ងៃពុធទី ៣០ ខែវិច្ឆិកា ឱ្យបង្កើតតុលាការដែលគាំទ្រដោយអង្គការសហប្រជាជាតិដើម្បីស៊ើបអង្កេតឧក្រិដ្ឋកម្មសង្គ្រាមរបស់កងទ័ពរុស្ស៊ីដែលអាចកើតមាននៅអ៊ុយក្រែន និងប្រើប្រាស់ទ្រព្យសម្បត្តិរបស់រុស្ស៊ីដែលបានបង្កក ដើម្បីស្ដារអ៊ុយក្រែនឡើងវិញ។
ប្រធានគណៈកម្មការអឺរ៉ុបលោកស្រី អួរស៊ូឡា វ៉ុនឌែរ ឡេយែន បានថ្លែងនៅក្នុងសារជាវីដេអូថា EU នឹងធ្វើការជាមួយដៃគូអន្តរជាតិដើម្បីទទួលបានការគាំទ្រអន្តរជាតិដ៏ទូលំទូលាយបំផុតតាមតែអាចធ្វើទៅបានសម្រាប់ការបង្កើតតុលាការនេះ ខណៈពេលដែលខ្លួននៅតែបន្តគាំទ្រដល់តុលាការឧក្រិដ្ឋកម្មអន្តរជាតិ (ICC)។
សកម្មភាពបែបនេះរបស់សហភាពអឺរ៉ុប ធ្វើឡើងក្រោយពេលដែលមានការចោទប្រកាន់ជាច្រើនពីបទឧក្រិដ្ឋកម្មសង្រ្គាម ចំពោះកងទ័ពរុស្ស៊ីដែលចាប់ផ្ដើមការឈ្លានពានអ៊ុយក្រែនទូទាំងប្រទេសនៅចុងខែកុម្ភៈ។ ឧក្រិដ្ឋកម្មទាំងនោះ រួមមានទាំងការសម្លាប់ និងការវាយប្រហារលើគោលដៅជនស៊ីវិល។
អ្វីដែលគួរឱ្យកត់សម្គាល់នោះគឺថា ការស៊ើបអង្កេតលើឧក្រិដ្ឋកម្មយោធាដែលបានប្រព្រឹត្តកំឡុងសង្គ្រាមនៅអ៊ុយក្រែន កំពុងដំណើរការនៅជុំវិញអឺរ៉ុប ហើយតុលាការឧក្រិដ្ឋកម្មអន្តរជាតិដែលមានមូលដ្ឋាននៅទីក្រុងឡាអេ បានបើកការស៊ើបអង្កេតរួចហើយ។ ប៉ុន្តែដោយសារតែរុស្ស៊ីមិនទទួលយកយុត្តាធិការរបស់តុលាការឧក្រិដ្ឋកម្មអន្តរជាតិ គណៈកម្មការអឺរ៉ុបបានលើកឡើងថា ខ្លួនបានបង្ហាញជម្រើស២ដល់ប្រទេសសហភាពអឺរ៉ុប ទាំង ២៧ ដើម្បីឱ្យវិមានក្រឹមឡាំងទទួលខុសត្រូវ។ ជម្រើសទាំងនោះរួមមាន បង្កើតឱ្យមានតុលាការអន្តរជាតិឯករាជ្យពិសេសមួយដែលផ្អែកលើសន្ធិសញ្ញាពហុភាគី និងតុលាការឯកទេសមួយដែលរួមបញ្ចូលនៅក្នុងប្រព័ន្ធយុត្តិធម៌ជាតិជាមួយចៅក្រមអន្តរជាតិ ពោលគឺតុលាការកូនកាត់។
គួរគូសបញ្ជាក់ថា ការស្វែងរកបង្កើតតុលារនេះ ធ្វើឡើងទន្ទឹមនឹងការទាមទាររកយុត្តិធម៌ពីអ៊ុយក្រែន។ ស្ត្រីទី១អ៊ុយក្រែន លោកស្រី អូឡេណា ហ្សេលេនស្គី (Olena Zelenska) កាលពីថ្ងៃអង្គារ បានជំរុញឱ្យមានការដាក់សម្ពាធលើរុស្ស៊ីឱ្យទទួលខុសត្រូវ។
លោកស្រីបានប្រាប់សមាជិកសភាក្នុងទីក្រុងឡុងដ៍ថា ៖ «ជ័យជម្នះមិនមែនជារឿងតែមួយគត់ដែលយើងត្រូវការនោះទេ» និងបានប្រៀបធៀបឧក្រិដ្ឋកម្មសង្រ្គាមរបស់រុស្ស៊ីទៅនឹងអំពើឃោរឃៅដែលណាស៊ីអាល្លឺម៉ង់បានប្រព្រឹត្តក្នុងសង្រ្គាមលោកលើកទី២
មិនត្រឹមតែប៉ុណ្ណេះ លោកស្រី ហ្សេលេនស្គី ថែមទាំងបានអំពាវនាវឱ្យចក្រភពអង់គ្លេសដឹកនាំកិច្ចខិតខំប្រឹងប្រែងដើម្បីបង្កើតតុលាការព្រហ្មទណ្ឌកាត់ទោសមន្រ្តីរុស្ស៊ីជាន់ខ្ពស់ ដែលស្រដៀងនឹងការកាត់ទោសនៅក្រុង Nuremberg នៅប្រទេសអាល្លឺម៉ង់ចំពោះក្រុមមេដឹកនាំណាស៊ី ដែរ។
ងាកទៅមើលផែនការរបស់អឺរ៉ុបវិញ លោកស្រី វ៉ុនឌែរ ឡេយែន បានបន្ថែមថា សហភាពអឺរ៉ុបចង់ធ្វើឱ្យរុស្ស៊ីចំណាយសម្រាប់ការបំផ្លិចបំផ្លាញដែលប្រទេសនេះបង្កឡើងនៅអ៊ុយក្រែន ដោយប្រើទ្រព្យសម្បត្តិរបស់រុស្ស៊ី ដែលប្លុកអឺរ៉ុបបង្កកក្រោមទណ្ឌកម្ម។ លោកស្រីបានប៉ាន់ប្រមាណថា រហូតមកទល់ពេលនេះ អ៊ុយក្រែនមានការខូតខាតរហូតដល់ ៦១៧ ប៊ីលានដុល្លារ។
ប្រធានគណៈកម្មការអឺរ៉ុបដដែល និយាយយ៉ាងដូច្នេះថា ៖ «រុស្ស៊ី និងមន្ត្រីរាជការរបស់ខ្លួនត្រូវផ្តល់សំណងដល់អ៊ុយក្រែនសម្រាប់ការខូចខាត និងត្រូវចំណាយសម្រាប់ការកសាងប្រទេសនេះឡើងវិញ។ យើងមានមធ្យោបាយធ្វើឱ្យរុស្ស៊ីបង់ប្រាក់»។ ជុំវិញបញ្ហានេះ លោកស្រីបញ្ជាក់ថា ប្រាក់ ៣០៨ ប៊ីលានដុល្លារនៃទុនបម្រុងរបស់ធនាគារកណ្តាលរុស្ស៊ីត្រូវបានបង្កក ជាមួយនឹងប្រាក់របស់មហាសេដ្ឋីរុស្ស៊ីចំនួន ២០ ប៊ីលានផ្សេងទៀត។
លោកស្រី វ៉ុនឌែរ ឡេយែន បានអះអាងថា អឺរ៉ុបនឹងបង្កើតរចនាសម្ព័ន្ធមួយដើម្បីគ្រប់គ្រងមូលនិធិទាំងនេះ ហើយនៅពេលដែលទណ្ឌកម្មដកចេញ មូលនិធិទាំងនេះនឹងអាចត្រូវប្រើប្រាស់ដើម្បីឱ្យរុស្ស៊ីផ្តល់សំណងពេញលេញសម្រាប់ការខូចខាតនៅអ៊ុយក្រែន។
សូមរំឭកថា កន្លងមករុស្ស៊ីតែងព្រមានមិនឱ្យលោកខាងលិចយកទ្រព្យសម្បត្តិរបស់ខ្លួនទៅប៉ះប៉ូវអ៊ុយក្រែន ដោយនិយាយថា ការបង្កកទុកបម្រុងនៅបរទេសរបស់ធនាគារកណ្ដាលរុស្ស៊ី និងទ្រព្យសម្បត្តិនៃពលរដ្ឋរបស់ខ្លួនគឺជាទង្វើខុសច្បាស់។ជាមួយគ្នានេះ អ្នកជំនាញផ្នែកច្បាប់ក៏ព្រមានផងដែរថា តាមទស្សនៈច្បាប់អន្តរជាតិ ការប្រើប្រាស់ទ្រព្យសកម្មរបស់ធនាគារកណ្តាលរុស្ស៊ី នឹងមានការលំបាកផ្នែកច្បាប់បើគ្មានការយល់ព្រមពីរុស្ស៊ី៕
ដោយ៖ហួន ឌីណា ប្រភព៖ EU seeks specialized court to investigate Russia war crimes
