ភ្នំពេញ៖ប្រមុខរាជរដ្ឋាភិបាល​កម្ពុជា បាន​ប្រកាស​ឱ្យដឹងថា ព្រឹត្តិការណ៍អង្គរសង្រ្កាន នឹងរៀបចំជាថ្មីឡើងវិញ នាឱកាសបុណ្យចូលឆ្នាំប្រពៃណីជាតិខ្មែរ នាខែមេសាឆ្នាំ​២០២៣ ខាងមុខនេះ បន្ទាប់ពីអាក់ខានអស់រយៈពេល២ឆ្នាំ ដោយសារការរាតត្បាតនៃ​មេរោគកូវីដ១៩។ការប្រកាសបែបនេះធ្វើឡើងក្នុងពិធីបិទព្រឹត្តិការណ៍កីឡាជាតិលើកទី៣ និងកីឡាជនពិការជាតិលើកទី១ ឆ្នាំ២០២២ នៅពហុកីឡាដ្ឋានមរតកតេជោ កាលពីយប់​ថ្ងៃទី៣០ ខែវិច្ឆិកា ឆ្នាំ២០២២។

​សម្ដេចតេជោ ហ៊ុន សែន មានប្រសាសន៍ថា ៖​ «ខ្ញុំក៏សូមបញ្ជាក់ជូនចំពោះបងប្អូនជនរួមជាតិ នៅទូទាំងប្រទេសឲ្យបានជ្រាបថា នៅចូលឆ្នាំខ្មែរ ខែមេសា ឆ្នាំ២០២៣ខាងមុខនេះ យើងនឹងធ្វើអង្គរសង្ក្រានសារជាថ្មីម្ដងទៀត ពេលនោះសង្ឃឹមថាកីឡាល្បុក្កតោរបស់យើង និងក្លាយទៅជានិមិត្តរូបដ៏សំខាន់ នៃការជួបជុំនៅក្នុងអង្គរសង្រ្កាននៅពេលនោះ»។

ជុំវិញរឿងនេះ លោក ឈត ប៊ុនថង មន្ត្រីស្រាវជ្រាវនៃរាជបណ្ឌិត្យសភាកម្ពុជា និងអ្នកជំនាញទស្សនវិជ្ជា បានប្រាប់កាល​ពីថ្ងៃទី​១ ខែធ្នូ ថា ពាក់ព័ន្ធនឹងការរៀបចំព្រឹត្តិការណ៍អង្គរសង្ក្រាន ឬក៏រៀបចំព្រឹត្តិការណ៍ប្រពៃណីផ្សេងៗ វាគឺជាសុទ្ធតែរឿងដែលមានប្រយោជន៍ ពីព្រោះថាបើកាលណាមានការរៀបចំពីពីប្រ​ពៃណី ដូចជា បុណ្យចូលឆ្នាំ និងបុណ្យផ្សេងៗទៀតរបស់ខ្មែរ។

លោកថា ពិធីបុណ្យទាំងនោះ គឺវាមានន័យថាធ្វើឲ្យប្រពៃណី និងទំនៀមទម្លាប់របស់ខ្មែរ មានភាពរស់ឡើងវិញ ដែលមានជីវិត និងការវិវត្តន៍ ក៏ដូចជាការអភិរក្សផងដែរ។ ក្រៅពីនេះទៀត ទន្ទឹមហ្នឹងមានការរៀបចំហើយ ធ្វើឲ្យមានការវិវត្តន៍ឡើងវិញ​ ​មានន័យថា ការរៀបចំនេះ វាបានផ្សព្វផ្សាយទៅដល់ប្រជាព​ល​រដ្ឋ ក៏ដូចជាភ្ញៀវទេសចរបរទេសផងដែរ ដែលមកចូលរួមទស្សនា។

​លោក ឈត ប៊ុនថង បានបបន្ថែមទៀតថា វាជាបង្រៀន និងផ្សព្វផ្សាយទៅដល់ក្មេងៗជំនាន់ក្រោយឱ្យស្គាល់ពីតម្លៃ ប្រ​ពៃ​​ណី ទំនៀមទម្លាប់ រប្បធម៌របស់ប្រទេសកម្ពុជាជាដើម។

មន្ត្រីស្រាវជ្រាវរូបនេះ បាន​ថ្លែងថា៖ «ប្រសិនជាព្រឹត្តិការណ៍នៃកម្មវិធីទាំងនោះ ត្រូវធ្វើនៅតំបន់ទេស​ចរណ៍​​​ដូចជាខេត្តសៀមរាបដែលជាតំបន់រប្បធម៌ នោះវាជាការបង្ហាញឲ្យបងប្អូនខ្មែរយើង និងភ្ញៀវបរទេស បានស្គាល់ បានឃើញ ពីតំបន់រប្បធម៌នេះ ដើម្បីគេជួយក្នុងផ្សព្វផ្សាយទៅកាន់ប្រជាជាតិនានា និងទេស​ចរណ៍ពិភពលោកនានាផងដែរ តាមរយៈការចូលរួម និងការទស្សនា»។

លោកបាន​បន្ថែមថា ក្រៅពីទទួលបានការផ្សព្វផ្សាយហើយ ប្រទេសកម្ពុជាក៏ទទួលបានកត្តិយស កេរ្តិ៍ឈ្មោះ​ និងទទួលបានថវិកាពីការចំណាយ ដែលមានភ្ញៀវទេសចរចូលមកទស្សនាប្រាសាទ និងដើរក​ម្សា​ន្តផង ដូច្នេះប្រទេសកម្ពុជាទទួលបានប្រយោជន៍ច្រើនណាស់។

ចំណែក លោក លី សំរិទ្ធ អភិបាលរងខេត្តសៀបរាម បានប្រាប់ថា លោកទទួលបានដំណឹង ពីការប្រ​កាសរបស់លោកនាយករដ្ឋមន្រ្តី ហ៊ុន សែនថានឹងមានការរៀបចំព្រឹត្តិការណ៍សង្ក្រានជាថ្មីឡើងវិញ។ ដោ​យឡែកសម្រាប់ខេត្តសៀមរាប ជាក់ស្ដែង គឺមិនទាន់មានផែនការរៀបចំនូវឡើយទេ។

លោក លី សំរិទ្ធ បានប្រាប់ថា៖​ «ការរៀបចំផែនការ គឺយើងត្រូវដឹងស្ថាប័នណាខ្លះ មានភារកិច្ចអី ក្នុងការរៀបចំ ហើយអាជ្ញាធរខេត្តសៀមរាប និងអាជ្ញាធរពាក់ព័ន្ធផ្សេងទៀត ត្រូវធ្វើអីខ្លះចំពោះរឿងហ្នឹង»។ ​

រីឯ លោក ទិត ច័ន្ទតារា ក្រុមការងារផ្សព្វផ្សាយនៃសហភាពសហព័ន្ធយុវជនកម្ពុជា (ស.ស.យ.ក.) បានប្រាប់ឱ្យដឹងដែរថាការរៀបចំព្រឹត្តិការណ៍អង្គរសង្ក្រាន ក្រុមការងាររបស់លោកកំពុងរៀបចំព័ត៌មានមួយចំនួន ដើម្បីធ្វើសន្និសីទសារព័ត៌មានខាងមុខនេះ។

លោក ទិត ច័ន្ទតារា បានថ្លែងថា៖ «អុីចឹង! សន្និសីទសារព័ត៌មាននេះយើងនឹងធ្វើឡើងនៅថ្ងៃទី២០ ខែធ្នូ ឆ្នាំ២០២២ខាងមុខនេះ ហើយសម្រាប់ព័ត៌មានបន្ថែមយើងហ្នឹងជំរាបជូននៅពេលក្រោយ ប៉ុន្តែឥលូវព័ត៌មានមួយចំនួន យើងកំពុងតែរៀបចំផ្សព្វផ្សាយជាសាធារណៈ ដូច្នេះយើងហ្នឹងផ្ដល់ព័ត៌មានបន្ថែមតាមសន្និសីទសារព័ត៌មានតែម្តង»៕ ដោយ៖ជា សុខនី